“გვყავდა წყვილები, რომლებსაც ხელოვნურ განაყოფიერებაზე მოძღვრის კურთხევა ჰქონდათ”

_ რა განსხვავებაა ხელოვნურ და ბუნებრივი გზით ჩასახულ ბავშვებს შორის?

_ სტატისტიკურად, ინ-ვიტრო განაყოფიერებით დაბადებული ბავშვები დაავადების მაჩვენებლით ან სხვა ქცევითი ნორმებით არანაირად არ განსხვავდებიან საერთო პოპულაციის ბავშვებისაგან. უფრო მეტიც, ზოგად პოპულაციასთან მიმართებაში ისინი ცოტა უფრო ჯანმრთელნიც კი არიან, რადგან მუცლადყოფნის პერიოდში ექიმის მუდმივი დაკვირვების ქვეშ იმყოფებიან. გარდა ამისა, ოჯახები, რომლებშიც ეს ბავშვები იბადებიან , არიან ბევრად მოტივირებულნი და მომზადებულნი, ვიდრე სადღაც, პირობითად რომ ვთქვათ, აულში ჩასახული ბავშვის მშობლები, რომლებიც წლების განმავლობაში არ ყოფილან ექიმთან. თუმცა ინ-ვიტრო განაყოფიერებით დაბადებულ ბავშვებს ბუნებრივი გზით დაბადებული ბავშვებისგან რაიმე განსაკუთრებული დადებითი ან უარყოფითი ნიშანი არ გამოარჩევთ.

_ “პრობლემატურნი იქნებიან ის ბავშვებიც, რომლებიც ხელოვნური განაყოფიერებით დაიბადნენ და მათი სიცოცხლე მრავალი ემბრიონის განადგურების შედეგად განვითარდა“- ეს არის ამონარიდი საშობაო ეპისტოლედან. მიგაჩნიათ, რომ ადამიანის ხელოვნურად შექმნა ქრისტიანობასთან შეუსაბამოა?

_ სამწუხაროდ, არ მომისმენია პატრიარქის ქადაგება და შესაბამისად მის შეფასებას არ ვეცდები, მაგრამ პირადად გაახლდით სამედიცინო უნივერსიტეტში გამართულ შეხვედრაზე, სადაც საბერძნეთის საპატრიარქოს მაღალი რანგის სასულიერო პირი იყო მოწვეული. ჩემმა კოლეგებმა მას სწორედ ხელოვნურ განაყოფიერებაზე ჰკითხეს, რაზედაც სასულიერო პირმა მიუგო, რომ ინ-ვიტრო განაყოფიერებას უშვილობის სამკურნალო ერთ-ერთ დარგად მიიჩნევს. რაც შეეხება ჩემს პოზიციას, გეტყვით, რომ არ ვთლი ამას ქრისტიანობასათან შეუსაბამოდ, ეს რომ ასე იყოს , ამ პროცედურას ჩემს კლინიკაში არ ჩავატარებდი ისევე , როგორც არ ვაკეთებ აბორტს, არა იმიტომ რომ ეს რთული ოპერაციაა და ვერ შევასრულებ, უბრალოდ აბორტი პიროვნულად მიუღებელია ჩემთვის. თუმცა საპატრიარქოს ტელევიზიაში შეხვედრის დროს ვთქვი, რომ აბორტის აკრძალვა განსაკუთრებული შედეგის მომტანი არ იქნება. ის უფრო გაუკუღმართდება და ბევრად მძიმე შედეგს მივიღებთ. მიმაჩნია , რომ უნდა გამოვიყენოთ ყველა საგანმანათლებლო რესურსი ,რათა არ დავდგეთ როგორც ჯანმრთელობის, ასევე სულიერი პრობლემების წინაშე.

_ ეპისტოლეში საუბარია იმაზეც, რომ ხელოვნური განაყოფიერებით დაბადებული ბავშვები მოზრდილობაში პრობლემატურნი იქნებიან. ამ მოსაზრებას აქვს მეცნიერული ახსნა?

_ არ მესმის რას ნიშნავს “იქნებიან”. ამ მეთოდით პირველი ბავშვი 1978 წელს გაჩნდა და შესაბამისად შეგვიძლია ვიმსჯელოთ იმაზე, რაც არის დღეს, მომავალში რა იქნება და რა პრობლემების წინაშე დადგებიან ისინი, ამაზე როგორ შემიძლია ვიმსჯელო? თუმცა თუ ვინმეს აინტერესებს, შეუძლია შეისწავლოს ამ ადამიანების ცხოვრება და ის პრობლემები, რასაც ისინი გადააწყდნენ.

_ ეპისტოლეში ხაზი გაესვა იმ გარემოებას, რომ ასეთი ბავშვების სიცოცხლე სხვა მრავალი ემბრიონის განადგურების შედეგია. რა პროცედურას გულისხმობს ინ-ვიტრო განაყოფიერება?

_ პროცედურა გულისხმობს იმას, რომ აიღო რამდენიმე კვერცხუჯრედი, გაანაყოფიერო და იქედან გადაიტანო ის, რომელიც უკეთესია. დანარჩენი ემბრიონები კი, თუ განვითარდებიან და ხუთ დღემდე მიაღწევენ, შეგვიძლია გავყინოთ და საჭიროების შემთხვევაში გამოვიყენოთ. რაც შეეხება ეპისტოლეში ნახსენებ „მრავალი ემბრიონის განადგურებას“, მოდით ეს პროცესი ძალიან მარტივი მაგალითის ფონზე განვიხილოთ. დავუშვათ, თბილისში წუხელ 100 ქალი განაყოფიერდა ჩვეულებრივი წესით. ამ განაყოფიერებული ემბრიონებიდან ზოგი ჩამოიფცქვნება, ზოგი ვერ მიემაგრება, ზოგი მიემაგრება და მერე ჩამოიშლება და აქედან მხოლოდ 25 პროცენტი მივა სამშობიაროში ცხრა თვის შემდეგ . რა თქმა უნდა, არ ვგულისხმობ მათ, ვინც ორსულობას ხელოვნურად შეწყვეტს. ანუ ხდება ემბრიონების ბუნებრივი გადარჩევა. იმ სამედიცინო პროცედურებით კი, რომელსაც ხელოვნური განაყოფიერება ჰქვია, 100 ქალიდან დაახლოებით 40 % აქვს შანსი, რომ მივიდეს ორსულობამდე და შვილის გაჩენამდე . თუმცა აქ არის ერთ გარემოება, როდესაც პაციენტს ეყოლა შვილი და აღარ სჭირდება დანარჩენი ემბრიონები. ასეთ შემთხვევაში, ბუნებრივია აღარ ხდება მათი განვითარება.

_ საშობაო ეპისტოლე სუროგაციის თემასაც შეეხო. როგორც ჩანს ეკლესიისთვის შვილის ამგვარი მეთოდით ყოლა მიუღებელია.

_ როგორც სამედიცინო, ასევე იურიდიული კანონმდებლობით, სუროგაცია დაშვებულია ჩვენს ქვეყანაში. ცალკეული მაღალი სასულიერო თუ არასასულიერო პირების ხედვა უბრალოდ ხედვაა , ადამიანის სწორი განვითარებისათვის მთავარი კანონმორჩილებაა. პირადად მე არ მესმის, რატომ უნდა წაართვა ერთადერთი ნუგეში ადამიანს, რომელსაც შვილის გაჩენა უჭირს .მსოფლიო ცხოვრობს, ვითარდება და თუ გვინდა, რომ ცივილიზაციას მოვწყდეთ, ეს იდეა ჩემისთანა თავისუფალი ადამიანისათვის მაინდამაინც მომხიბლავი არ არის.

თუ ჩვენ ვერ გამოვალთ ნებისმიერი ერთი ადამიანის აზრის უპირობოდ მიღება-გაზიარებისაგან, ეს ჩვენი კულტურისა და განვითარების მაჩვენებელი იქნება.

_ თქვენი კლინიკისთვის თუ მოუმართავს სასულიერო პირის ოჯახს და ინ-ვიტრო განაყოფიერება უთხოვია?

ასეთ პაციენტს ვერ ვიხსენებ, თუმცა გვყავდა წყვილები, რომლებსაც ხელოვნურ განაყოფიერებაზე მოძღვრის კურთხევა ჰქონდათ. ინ -ვიტრო განაყოფიერება ჩვენს ქვეყანაში დაახლოებით 10 წელია არსებობს და რატომ გახდა ეს თემა პრობლემური დღეს არ მესმის? ამის სანაცვლოდ რას ვთავაზობთ უშვილო წყვილებს, რომლებიც ბავშვის აყვანასაც კი ვერ ახერხებენ, რადგან მრავალწლიან რიგში უწევთ დგომა? იმედი ვიქონიოთ, რომ მომავალში საპატრიაქო სხვა თვალით შეხედავს ამ საკითხს და ადამიანის გაჩენის ყველა მეთოდს აკურთხებს.