ამის შესახებ ინფორმაციას პარლამენტის პრესსამსახური ავრცელებს. მათივე ინფორმაციით, კანონპროექტზე მუშაობის დაწყების საფუძველი სადაზღვევო სექტორის წარმომადგენლებთან და სხვა დაინტერესებულ პირებთან, ევროპელი და ამერიკელი ექსპერტების მონაწილეობით, შარშან, წლის ბოლოს გამართული შეხვედრა გახდა. პარლამენტმა მაშინვე გამოხატა მზადყოფნა სამუშაო ჯგუფის შექმნის თაობაზე და დღეს საქართველოს სადაზღვევო კომპანიათა ასოციაციაში სწორედ ამ სამუშაო ჯგუფის პირველი მუშა შეხვედრა გაიმართა.
აგრარულ საკითხთა კომიტეტის თავმჯდომარის, გიგლა აგულაშვილისა და სადაზღვევო კომპანიების წარმომადგენლების შეხვედრაზე, აგროდაზღვევის კანონისა და ამასთან დაკავშირებული სხვა მიმართულებების განვითარების თაობაზე ისაუბრეს.
“დაზღვევის ამოქმედების შემთხვევაში, სოფლის მეურნეობაში დასაქმებულ ადამიანთათვის, ფერმერებისათვის შემცირდება რისკები ბუნებრივი სტიქიის შედეგად მათთვის მიყენებული ზარალის შემთხვევაში. ამასთან, ეს არის ორმხრივად სასარგებლო თანამშრომლობის მოდელი, რომელიც აპრობირებულია მსოფლიოში““, – განაცხადა გიგლა აგულაშვილმა.
მისი შეფასებით, დაზღვევის ამოქმედება აგრარულ სფეროში, სოფლის მეურნეობის განვითარებისათვის ერთ-ერთი აუცილებელი კომპონენტია და სახელმწიფო ამ პროცესების თანამონაწილედ შეიძლება იყოს განხილული.
როგორც გიგლა აგულაშვილმა განაცხადა, იმის გამო, რომ აგროდაზღვევა სოფლის მეურნეობის განვითარებისათვის ერთ-ერთ მნიშვნელოვან ფაქტორად განისაზღვრება, საპარლამენტო კომიტეტი და შესაბამისი სამინისტრო აღნიშნული პროექტის განხორციელებისათვის თავს არ დაზოგავენ. მისი თქმით, მიმდინარე წელს სწორედ აგროდაზღვევა იქნება აგრარულ საკითხთა კომიტეტის საქმიანობაში ერთ-ერთი მთავარი პრიორიტეტული მიმართულება.
“სოფლის მეურნეობის სამინისტროსა და უცხოელ ექსპერტებთან ერთად, ჩვენ ვგეგმავთ სპეციალური ჯგუფის შექმნას, რომელიც აღნიშნული მიმართულებით საკანონმდებლო ინიციატივებსა და პროექტებს შეიმუშავებს“, – განაცხადა გიგლა აგულაშვილმა.
შეხვედრაზე გამოითქვა მოსაზრებები მომავალ თანამშრომლობაზე, ითქვა ისიც, რომ კანონპროექტის ზოგადი პრინციპების ფორმირებისას, უპრიანი იქნება სამუშაო შეხვედრები ფერმერებთანაც გაიმართოს, სწორედ მათთან, ვინც ყველაზე მეტად საჭიროებს ამ კანონის მიღებას. შეხვედრის მონაწილეები სამომავლო მუშაობის ფორმატზე შეთანხმდნენ.
