აღნიშნულთან დაკავშირებით მუნიციპალიტეტის მხარეთმცოდნეობის მუზეუმში მუზეუმის დაარსების 55 წლისთავი აღნიშნეს, რომელზედაც მიწვეულნი იყვნენ სამუზეუმო გაერთიანების მოქმედი და ყოფილი თანამშრომლები. გამგეობის და საკრებულოს, კულტურის სამსახურის, აიპების ხელმძღვანელები. საღამო მიჰყავდა სამუზეუმო გაერთიანების დირექტორს შოთა ჩანტლაძეს.
ეს იყო საღამო გარდასულ დღეთა გახსენების, რომელიც თბილ ურთიერთობებზე გახლდათ აგებული. საღამოზე ისაუბრეს მუზეუმის ყოფილმა დირექტორმა სულიკო ვაშალომიძემ, ყოფილმა მეცნიერ-მუშაკმა ნარგიზ დოლიძემ, ჩაისუბნის საჯარო სკოლის პედაგოგმა ლიანა თოდუამ, კულტურის განყოფილების ყოფილმა უფროსმა რეზო თედორაძემ. აღინიშნა, რომ აუცილებელია ძველი და ახალი თაობის შეხვედრა, ძველის არდავიწყება, სიახლეების მოძიება, რომ ჩვენი რაიონის ღირებულებები, აქ მოღვაწე პიროვნებები მკვეთრად წარმოჩინდნენ.
ღონისძიების დასასრულს, ლიანა თოდუამ და რეზო თედორაძემ სამახსოვრო საჩუქრები გადასცეს მუზეუმს.
