_ საუბარია იმაზე, რომ ისინი ერთ-ერთ მიმართულებად განიხილავენ ჯავახეთის მიმართულებიდან საზღვრის გადმოკვეთას, ეს კი სამხედრო ინტერვენციის გარეშე ყოვლად შეუძლებელია, ანუ თუ სამხედრო ძალა არ იქნება ჩარეული, რუსეთს და სომხეთს ვერ ექნება ერთიანი საზღვარი. ასეთ განცხადებებს აკეთებდა სეპარატისტული ორგანიზაცია „ჯავახკი“, რომელიც მოქმედებს ჯავახეთში და აქვთ ე.წ. დიასპორა რუსეთში. ამ დიასპორის წარმომადგენლები აკეთებდნენ ასეთ განცხადებებს და ძალიან დააშავა ამ ხელისუფლებამ, როცა ამ სეპარატისტული ორგანიზაციის ხელმძღვანელი ჩახალიანი გაათავისუფლა. ეს არის ამ ხელისუფლების დიდი შეცდომა. ახლა უკვე რუსულ და სომხურ პრესაში იბეჭდება ინფრომაცია, რომ ექნებათ ერთიანი საზღვარი, გარდა ამისა, დაიწყო საუბარი იმაზე, რომ კალინინგრადის მსგავსად სარაკეტო დანადგარები რუსეთმა უნდა განათავსოს სომხეთის ტერიტორიაზე და ეს იქნება მიმართული საქართველოს წინააღმდეგ. ამ ეტაპზე გარდა მედიის წარმომადგენლებისა და ექსპერტებისა, უკვე სასომხეთის პრემიერ-მინისტრმა ტიგრან სარქისიანმა განცხადება გაავრცელა და განაცხადა, რომ სასომხეთს და რუსეთს ექნებათ ერთიანი საზღვარი.
_ იქნებ დააკონკრეტოთ, როდის გავრცელდა ეს განცხადება სარქისიანის მხრიდან?
_ ორი დღის წინ. ჩვენი ხელისუფლება ან შეგნებულად დუმს და არ აკეთებს არანაირ განცხადებებს, რაც არასწორია მათი მხრიდან ან ეს შეიძლება მივაწეროთ ხელისუფლების უნიათობას, ვინაიდან მათ არ შესწევთ უნარი მოახდინონ ამ თემაზე რაიმე რეაგირება.
_ თქვენი აზრით, რატომ გავრცელდა ახლა ასეთი განცხადებები რუსეთის და სომხეთის მხრიდან? რეალურია საფრთხე თუ მხოლოდ პროვოკაციის შემცველი განცხადებებია?
_ მოგეხსენებათ ახლოვდება ევროპასთან ასოცირების ხელშეკრულებაზე ხელმოწერის პროცესი და სწორედ ამას ვუკავშირებ ამ ყველაფერს, ამის პარალელურად მოხდა რუსეთის გააქტიურებაც. რუსეთის ერთ-ერთი სტრატეგიული მოკავშირე კავკასიაში არის სასომხეთი, არავისთვის არ არის უცხო, რომ სომხეთი დათანხმდა ევრაზიულ კავშირში გაწევრიანებაზე, მათ უნდათ ერთიანი სავაჭრო სივრცის შექმნა და ეს არის პრაქტიკულად მოდელირებული საბჭოთა კავშირი. აი, ამ ფონზე ჩვენი ხელისუფლება საერთოდ არ რეაგირებს ამ პროვოკაციულ ნაბიჯებზე, არადა განგაშის ზარია შემოსაკვრელი. ჩვენი პარტია ამ საკითხზე უახლოეს დღეებში ჩაატარებს საპროტესტო აქციას სომხეთის საელჩოსთან და მინდა მოვიწოდო ხელისუფლებას-გამოფხიზლდეს!
_ კონკრეტულად რა ნაბიჯები უნდა გადაიდგას დღეს ამ საკითხთან დაკავშირებით მთავრობის მხრიდან?
_ მათ უნდა იმოქმედონ ქართული სახელმწიფოს ინტერესებიდან გამომდინარე. ამ საკითხთან დაკავშირებით არანაირი რეაგირება არ ჰქონია საქართველოს ელჩს სასომხეთში და არც საგარეო საქმეთა სამინისტროს მოუხდენია რეაგირება, რუსეთი არ არის ის სახელმწიფო, რომელიც მხოლოდ ცარიელ სიტყვებს ამბობს, მისი სიტყვების უკან ყოველთვის რაღაც ჩანაფიქრია და ჩვენ ყველამ ვიცით, რომ ბოლო წლების განმავლობაში ჩვენი სახელმწიფოს მიმართ კარგი ჩანაფიქრი ნამდვილად არ აქვს. უნდა იქნეს გამოძახებული საგარეო საქმეთა სამინისტროში სომხეთის ელჩი და მოსთხოვონ პასუხი თუ რას ნიშნავს მათი პრემიერის მიერ გაკეთებული განცხადება.
_ სომხეთი საქართველოს მეზობელი და პატრნიორი ქვეყანაა.
_ მაშინაც ჩვენი მეზობელი იყო, როცა მხარი არ დაუჭირა გაეროს რეზოლუციას აფხაზეთის ტერიტორიაზე დევნილების დაბრუნების შესახებ. აი ჯერ კიდევ მაშინ დაუშვა საქართველოს ხელისუფლებამ შეცდომა ეს საკითხი რომ წაიყრუა. ჩვენი ქვეყნის შესახებ უარყოფითი ტალღა თანდათან მატულობს სომხეთში, თავიდან ეს იყო ექსპერტების და დაბალი რანგის პოლიტიკოსების დონეზე, ახლა უკვე სომხეთის პრემიერ-მინისტრმაც გააჟღერა ანალოგიური ინფორმაცია.
_ უფრო კარგად რომ ავხსნათ, რას ნიშნავს რუსეთს და სომხეთს ჰქონდეს ერთიანი საზღვარი და სად უნდა გავიდეს ეს საზღვარი?
_ რუსეთს და სომხეთს ჰქონდეთ ერთიანი საზღვარი, ეს ნიშნავს იმას, რომ ჩვენ, რუსეთთან ოფიციალური საზღვარი გვაქვს ლარსთან, ლარსსა და სადახლოს შორის მდებარეობს საქართველოს ტერიტორია. მათ უნდა დაიპყრონ ეს ტერიტორია და გააერთიანონ საზღვარი. ეს კი საქართველოში სამხედრო ინტერვენციის განხორციელების გარეშე შეუძლებელია. ვიღაცას შეიძლება ეს წარმოუდგენლად მოეჩვენოს, მაგრამ ჩვენ ვნახეთ 2008 წელს რუსეთი როგორ შემოიჭრა საქართველოში და განახორციელა ღია ინტერვენცია. მიმაჩნია, რომ ეს არ არის მხოლოდ პროვოკაცია და ყველა ბერკეტი უნდა გამოვიყენოთ. უნდა მოვითხოვოთ ახსნა-განმარტებები როგორც რუსეთის, ისე სომხეთის მხრიდან.
_ ეს არის საკითხი, რომელიც არ გადაწყდება არც ხალხმრავალი მიტინგებით და არც აქციებით, რა შედეგს გამოიღებს თქვენს მიერ დაგეგმილი საპროტესტო აქცია?
_ მე ვარ ერთ-ერთი პოლიტიკოსი, რომელსაც სხვა არაფერი ბერკეტი არ გამაჩნია და ამიტომ ვალდებული ვარ ჩემს ხელთ არსებული ყველანაირი საშუალებით გამოვხატო პროტესტი და მოვუწოდო მთავრობას მოახდინოს რეაგირება. ჩვენი აქციის შედეგი იქნება ის, რომ საზოგადოების ფართო ნაწილი გაიგებს შექმნილი მდგომარეობის საფრთხეს და სხვა პოლიტიკური პარტიებიც გაამახვილებენ ამ საკითხზე ყურადღებას. არ შეიძლება დუმილი. საქართველოში არიან საღადმოაზროვნე ადამიანები, რომლებმაც უნდა ამაღლონ ხმა, თორემ შეიძლება მივიღოთ ახალი დაკარგული ტერიტორიები, თუ დროულად არ მოხდა რეაგირება.
