ბიუჯეტის დამტკიცება ერთხელ უკვე ჩავარდა, რასაც უმცირესობის დეპუტატი თემურ გრიგალაშვილი საკრებულოს თავმჯდომარის პირად ინტერესებს უკავშირებს და აცხადებს, რომ: “პროექის დაუმტკიცებლობა საკრებულოს თავმჯდომარის ინტერესებში შედის. მიზანი ერთადერთია -დედაქალაქის მოსახლეობის ინტერესების საწინააღმდეგოდ ირაკლი შიხიაშვილმა მოახდინოს თბილისის მერიაში ხელისუფლების უზურპაცია და არჩევნებამდე რამდენიმე თვით ადრე ხელში ჩაიგდოს ძალაუფლება”.
უმრავლესობის წარმომადგენელი ზაზა გაბუნია კი ბიუჯეტის პროექტის ბუნდოვანებას “ნაციონალური მოძრაობის” პარტიულ ინტერესებს უკავშირებს და აცხადებს, რომ ბიუჯეტი პარტიულ ინტერესებზეა გათვლილი. დეპუტატისთვის გაურკვეველია რას უნდა მოხმარდეს სხვა ხარჯებში გაწერილი 89 მილიონი ლარი და ამბობს, რომ მერიისა და საკრებულოს ნაციონალებს აშკარად ეტყობათ შეშფოთება, რომ ვეღარ დახარჯავენ პარტიული ინტერესებისთვის საბიუჯეტო თანხებს.
არსებული სახით ბიუჯეტის პროექტს მხარი არ დაუჭირა და თუ ცვლილებები არ შევა არც მომავალში დაუჭერს დამოუკიდებელი დეპუტატი მამუკა კაციტაძე. მისი განცხადებით, არანაირი პოლიტიკური სარჩული არ არსებობს, საჭიროა დაზუსტდეს რიგი საკითხები, თორემ თანხის დახარჯვის პროცესი ბუნდოვანია.
“მუნიციპალური ტრანსპორტის განახლება-10 მილიონი, ბინათმესაკუთრეთა ამხანაგობები-15 მილიონი, ძველი თბილისის რეაბილიტაცია-10 მილიონი, საბავშვო ბაღების რეფორმა-5 მილიონი, ოლიმპიური ფესტივალი-10 მილიონი. უბრალო არითმეტიკა გასაგებია, მაგრამ რაში უნდა დაიხარჯოს ყველაფერი ამის მიღმა თანხა ბუნდოვანია”, _ აცხადებს კაციტაძე და ამ სახით არც ამჯერად აპირებს დოკუმენტისთვის ხმის მიცემას.
არც დამოუკიდებელი დეპუტატის და არც უმრავლესობის აზრს არ იზიარებს მერის მოვალეობის შემსრულებელი სევდია უგრეხელიძე და აცხადებს, რომ ბიუჯეტის არ დამტკიცებით ცენტრალური ხელისუფლება მთელ ძალა-უფლებას ჩაიგდებს ხელში და სწორედ შედეგზეა ახლა დაფიქრება საჭირო.
“თუ კიდევ ჩავარდა ბიუჯეტი, ცენტრალურ ხელისუფლებას საშუალება მიეცემა დაითხოვოს საკრებულო, დანიშნოს მერი და ხელში ჩაიგდოს მთელი ძალაუფლება”.
ბიუჯეტის სამჯერ ჩავარდნის შემთხვევაში კანონით ფედერალური მმართველობის დამყარებას ადასტურებს საკრებულოს თავმჯდომარის მოადგილე გიორგი ტყემალაძეც, მაგრამ აცხადებს, რომ აქამდე საქმე არ მივა, რადგან უმრავლესობას უნდა დამტკიცდეს ბიუჯეტი, ოღონდ კარგად გაწერილი და თბილისელთა ინტერესებს მორგებული. მისი თქმით კონსულტაციების პერიოდში მოხდება რიგ საკითხებზე შეჯერება და იმედოვნებს, რომ ბიუჯეტი აუცილებლად დამტკიცდება.
რა მოხდება თუ დედაქალაქის ბიუჯეტი სამჯერ ჩავარდა? მოხდება თუ არა საკრებულოს დათხოვნა და არჩეული მერის დანიშნული მერით ჩანაცვლება? რამდენად რეალურია პირდაპირი სახელმწიფო მმართველობის დამყარება?
ახალგაზრდა იურისტთა ასოციაციაში აცხადებენ, რომ თუ სამი თვის განმავლობაში არ მოხდება ბიუჯეტის დამტკიცება, მაშინ საკრებულოს და მერის უფლებამოსილება წყდება და პირდაპირი სახელმწიფო მმართველობა მყარდება. პირდაპირი მმართველობის დროს საქართველოს მთავრობა დაითხოვს საკრებულოს და უფლებამოსილება შეუწყდება არჩეულ მერს. მთავრობის მიერ ახალი მერი დაინიშნება. საკრებულოს დათხოვიდან 45 დღის განმავლობაში კი უნდა ჩატარდეს რიგგარეშე არჩევნები საკრებულოში.
