ამ კითხვას პასუხი დღეს იუსტიციის მინისტრმა თავად გასცა და დაადასტურა, რომ ჯოლოხავა მართლაც იმყოფებოდა მასთან მიღებაზე როგორც ერთი რიგითი მოქალაქე, რომელზეც დაშვებული იყო საშვი და შეშინებული ყოფილი პატიმარი მოწმის დაცვის პროგრამაში ჩართვას სთხოვდა.
“მე შემიძლია, ვთქვა, რომ თანავუგრძნობ მოქალაქე ჯოლოხავას, რომელსაც მე 2013 წლის თებერვალში შევხვდი, როგორც ეს აჩვენა საშვთა ბიუროს მონაცემებმა. მე მას შევხვდი ოფიციალურად და მასზე იყო დაშვებული საშვი, როგორც ნებისმიერ მოქალაქეზე, ვისაც ვხვდები ჩვეულებრისამებრ. ის იყო ძალიან დაშინებული, ნუ ეწყინება, მაგრამ პირდაპირ ვიტყვი, რომ შემეცოდა როცა ვუსმენდი. დეტალურად ყვებოდა, თუ როგორ აწამებდნენ ციხეში და როგორ აიძულებდნენ ყოფილიყო აგენტი. მან ბევრი ისეთი ინფორმაცია მოყვა, რომლის გამომჟღავნებაც ჩემი მხრიდან უპრიანი არ იქნება. ამის შემდეგ ითხოვა მოწმის დაცვის პროგრამაში ჩართვა, რადგან ეშინოდა. მაშინვე დავუკავშირდი მაშინდელ მთავარ პროკურორ არჩილ კბილაშვილს და მეორე დღესვე ეს ადამიანი გადავაბარე მას, რომელსაც ის დაცვის პროგრამაში უნდა ჩაერთო და თუ საჭიროდ მიიჩნევდა, უნდა დაეკითხა კიდეც. ამის შემდეგ ჩემთვის უცნობია, თუ რა საუბარი შედგა ჯოლოხავასა და პროკურატურის მაშინდელ ხელმძღვანელებთან – ერთის მხრივ, კბილაშვილთან და მეორეს მხრივ, ლაშა ნაცვლიშვილთან, სამწუხარო ფაქტია, როგორც ჩანს, ჯოლოხავა სათანადოდ ვერ იქნა დაცული პროკურატურის მაშინდელი ხელმძღვანელობისგან. იმედი მაქვს, ახალი მთავარი პროკურორი გამოასწორებს მათ შეცდომას,“ _ განაცხადა წულუკიანმა.
