სოფლის პროგრამის ფარგლებში სოფლისთვის გამოყოფილი თანხების მითვისებაში ადანაშაულებს.
_ სოფლის პროგრამის დახმარების ფარგლებში, ზოტის მოსახლეობამ სარიტუალო ატრიბუტიკის შეძენა გადაწყვიტა. იგი ახალი უნდა ყოფილიყო, თუმცა, თამაზ ჯინჭარაძის ჩარევითა და ზეგავლენით, ზოტის რწმუნებულმა, რაულ კონცელიძემ ნახმარი ატრიბუტიკა მოიტანა, რომელიც 25-30 წლის წინანდელია _ მაგიდები დამპალია, გადასახური “ბრეზენტიც” არ ვარგა, ჭურჭელიც უხარისხოა. არადა, ამ სარიტუალო ატრიბუტიკაში 9 000 ლარია გადახდილი. სოფელში მოტანას არც ერთი თავმოყვარე ადამიანი არ იკადრებდა, თამაზ ჯინჭარაძემ კი უკადრებელი აკადრა ზოტელებს. საინტერესოა, როგორ აპირებს ბუღალტრული დოკუმენტაციის მოგვარებას ჯინჭარაძე, როცა ზოტში მოტანილი სარიტუალო ატრიბუტიკა 500 ლარიც არ ღირს? სრული პასუხისმგებლობით ვამბობ, რომ 8 500 ლარი მითვისებული აქვს თამაზ ჯინჭარაძეს. ვითხოვ, რომ ამ საქმით გამოძიება დაინტერესდეს, აღიძრას სისხლის სამართლის საქმე და დამნაშავე დაისაჯოს, _ ამბობს “გურია ნიუსთან” საუბრისას ამირან ირემაძე.
ჩოხატაურის მუნიციპალიტეტის გამგებლის მოვალეობის შემსრულებლის თამაზ ჯინჭარაძის თქმით, სოფლის პროგრამებთან მას კავშირი არა აქვს და არც ერთი პროექტის განხილვაში არ ჩარეულა: _ არა თუ შესრულებაში, განხილვაშიც კი არ ჩავრეულვარ, არანაირი შეხება ამ პროექტთან არ მაქვს. შეგიძლიათ დაინტერესდეთ, ჩაატაროთ ჟურნალისტური გამოძიება. აღიძრას სისხლის სამართლის საქმე და გაირკვეს, რა ხდება. მე სრული პასუხისმგებლობით ვაცხადებ, რომ ამ საქმესთან არანაირი კავშირი არ მაქვს. მზად ვარ, ნებისმიერ შეკითხვაზე გაგცეთ პასუხი, თუმცა, მიმაჩნია რომ მსგავს აბსურდულ, საფუძველსმოკლებულ განცხადებებზე კომენტარის გაკეთება მიზანშეწონილი არ არის.
ირემაძის ბრალდებებს აბსურდულს უწოდებს ზოტის რწმუნებული, რაულ კონცელიძე. მისი თქმით, სარიტუალო ატრიბუტიკის შეძენის დროს, ამირან ირემაძე მისი მოადგილე იყო და ამ პროცესებში თავადაც იყო ჩართული:_ როცა სოფელმა სარიტუალო ატრიბუტიკის შეძენა გადაწყვიტა, მივიღეთ გადაწყვეტილება, რომ აგვერჩია რამდენიმე ადამიანი, რომელიც პირადად ნახავდა შესაძენ ინვენტარს და იქნებოდა პასუხისმგებელი ამ შესყიდვაზე. ეს ყველაფერი დოკუმენტურად არის გაფორმებული. ირემაძის ბრალდებები აბსურდულია. იმ პერიოდში იგი ჩემი მოადგილე იყო და ყველა პროცესში იღებდა მონაწილეობას. ეს ატრიბუტიკა ძალიან ბევრმა გამოიყენა და ზოტში ვერ ნახავთ ადამიანს, რომელიც იტყვის, რომ რაიმე ცუდად გაკეთდა და, შესაბამისად, ამ შენაძენით უკმაყოფილოა, _ აღნიშნა კონცელიძემ.
სოფელ ზოტისთვის 450-ადგილიანი სარიტუალო ატრიბუტიკის შესყიდვაზე გაფორმებული ხელშეკრულება 2013 წლის 4 ოქტომბრით არის დათარიღებული და იგი ოზურგეთში, ანგელინა ჭინჭარაძისგან 9 300 ლარად არის შეძენილი.
როგორც ოფიციალური დოკუმენტიდან ირკვევა, ამავე წლის, 8 ოქტომბერს ზოტის მცხოვრებლებსა და გამგეობას შორის დადებულია შეთანხმება, რომლის თანახმადაც, ზოტის ტერიტორიული ორგანოს მცხოვრებლებმა “შეამოწმეს და მიიღეს სარიტუალო მომსახურებისთვის მოწყობილობა და ჯამ-ჭურჭელი”. შეთანხმებაში, რომელსაც ხელს 10 ადამიანი აწერს, აღნიშნულია, რომ შეთანხმების ტექსტი ზოტის მოსახლეობისთვის ცნობილია და მასზე გაკეთებული ხელმოწერებიც შეთანხმებულია.
