როგორც ირაკლი შიხიაშვილმა განმარტა, საკრებულო მოტივირებულია ქალაქს ჰქონდეს თბილისელებისათვის სასარგებლო ბიუჯეტი და ის არ იყოს მორგებული კონკრეტული პოლიტიკური ორგანიზაციის საარჩევნო კამპანიაზე.
“დეკემბერში საკრებულომ განიხილა 730 მილიონიანი და არა 785 მილიონიანი ბიუჯეტის პროექტი, რომელიც ჩაუშლელად, მხოლოდ და მხოლოდ ერთ ფურცელზე იყო განთავსებული.
ჩვენ გვაინტერესებს და მოვითხოვთ იანვრის თვის 1/12 ხარჯს. აუცილებელია ვიცოდეთ, როგორ გახარჯა ფული მერიამ პრიორიტეტების მიხედვით. იქმნებოდა ფონი თითქოს საკრებულო პრობლემას უქმნიდა მერიას. დაბრალება იოლია, მაგრამ, მოდით ვისაუბროთ დასაბუთებულად.
საკრებულო მოტივირებულია ქალაქს ჰქონდეს თბილისელებისათვის სასარგებლო ბიუჯეტი და ის არ იყოს მორგებული კონკრეტული პოლიტიკური ორგანიზაციის საარჩევნო კამპანიაზე.
საკრებულოს რეაქცია არის ადეკვატური და არავის ჯიბრით არ ვწელავთ ამ თემას. დღეს ბიუჯეტი ჩვენი პასუხისმგებლობის ქვეშ უნდა იყოს მიღებული და მისი დეტალურად შესწავლის შემდეგ გვეცოდინება, თუ რას ვუჭერთ მხარს,” _ განაცხადა ირაკლი შიხიაშვილმა.
მისივე თქმით, მერიის მიერ განახლებული ბიუჯეტი თავდაპირველად კომისიებს დაურიგდებათ და დოკუმენტის დამტკიცებამდე დეტალურად მოხდება მისი განხილვა.
“წინა თვეში შემოსული ბიუჯეტის პროექტი შეადგენდა 730 მილიონ ლარს და მას ჰქონდა მიკრული მხოლოდ ერთი ფარატინა ფურცელი, სადაც იყო დამატებული 55 მილონი ლარი, რაც პრობლემატურად მივიჩნიეთ. დღეს შემოტანილი ბიუჯეტი მოიცავს 785 მილიონ ლარს. პროცედურულად ის უკვე დაეწერა თავმჯდომარის მიერ კომისიებსა და ფრაქციებს. ვიწყებთ ინტენსიურ მუშაობას და გადავწყვეტთ დავუჭერთ თუ არა მხარს უმრავლესობა ბიუჯეტის ამ პროექტს,” _ განაცხადა საკრებულოს იურიდიული კომისიის თავმჯდომარემ დავით ჯინჭარაძემ.
“საბიუჯეტო კოდექსის მიხედვით ქალაქის მერიას იანვრის თვეში დასახარჯად ჰქონდა 60 მილიონამდე ლარი. იმ ფონზე, როდესაც კეთდება განცხდებები მათი წარმომადგენლების მხრიდან, რომ პრობლემები შეიქმნა, ჩვენ ბუნებრივია დავინტერესდით რა პრიორიტეტებსა დ ამოცანებზე გადანაწილდა ეს თანხა. ბიუჯეტისახლახანს შემოსული პროექტი საკმაოდ სქელტანიანი დოკუმენტია და მას სჭირდება დაწვრილებითი კვლევა. ჩვენ მივუთითეთ რამოდენიმე მუხლი, სადაც ვთვლით, რომ არის ძალიან მაღალი რისკი პოლიტიკური კორუფციისა და ჩვენ განსაკუთრებული ინტერესით გავეცნობით სწორედ ამ ნაწილს, თუ რამდენად არის ეს რისკები მოხსნილი და ეს იქნება ერთ-ერთი მთავარი მიზეზი ჩვენი მხარდაჭერისა თუ უნდობლობის გამოცხადებისა,” _ აღნიშნა ფრაქცია “ქართული ოცნება – დემოკრატიული საქართველოს” თავმჯდომარემ ზაზა გაბუნიამ.
დედაქალაქის 2014 წლის ბიუჯეტის განახლებული პროექტი მერიამ საკრებულოში დღეს შეიტანა, რომლის განხილვაც საკრებულოს იანვრის სხდომაზე მოხდება.
