შეხვედრაში რამდენიმე ათეული არასამთავრობო ორგანიზაციის, ევროკავშირის წარმომადგენლობის და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის წამომადგენლები მონაწილეობდნენ.
შეხვედრის მიზანი მონაწილეებისთვის 2014-2020 წლების პროგრამის პრიორიტეტების გაცნობა და საქართველოსთვის მნიშვნელოვანი საკითხების წინ წამოწევა იყო.
როგორც შეხვედრის მიმდინარეობისას გამოიკვეთა, შავი ზღვის აუზის საზღვრისპირა ქვეყნებისთვის რამდენიმე პრიორიტეტული საკითხია, თუმცა მათი საბოლოო ჩამოყალიბებისთვის არასამთავრობო ორგანიზაციებს ვადა 2016 წლამდე აქვთ.
როგორც პრეზენტაციისას მომხსენებლებმა აღნიშნეს, ჩატარებული კვლევების მიხედვით, რამდენიმე თემატური ამოცანა იკვეთება. მათ შორის: სოციალური ჩართულობისა და სიღარიბის წინააღმდეგ ბრძოლის ხელშეწყობა; გარემოს დაცვა და კლიმატის ცვლილებასთან ადაპტირება და რეგიონებისადმი ხელმისაწვდომობა.
თუმცა, გარდა ამ სამი თემატური ამოცანისა, გამოყოფილია რამდენიმე პრობლემატური საკითხი, რომელზეც საქართველომ არჩევანი უნდა გაკეთდეს.
მათ შორისაა მცირე და საშუალო ბიზნესის ხელშეწყობის პროგრამა, ტურიზმი, სოფლის ეკონომიკა, ახალი ტექნოლოგიები და განათლება, ადგილობრივი კულტურული მემკვიდრეობის ხელშეწყობა და ისტორიული მემკვიდრეობის მხარდაჭერა, ადგილობრივი, რეგიონული მმართველობის მხარდაჭერა, რეგიონული ინტეგრაცია და საერთო გამოწვევები უსაფრთხოებისა და უშიშროების საკითხებში. მოცემული ამოცანებიდან საქართველომ ყურადღება ქვეყნისთვის მნიშვნელოვან საკითხზე უნდა გაამახვილოს და დამატებით 4 პრიორიტეტი აირჩიოს, რომლის მიხედვითაც მომზადებული პროექტი 2014-2020 წლებში განხორციელდება. ამისთვის კი ევროკავშირი პროგრამაში მონაწილე ქვეყნებისთვის საერთო ჯამში 30 მილიონ ევროს გამოყოფს.
როგორც შეხვედრაზე აღინიშნა, პირველი ნაბიჯები 2016 წლისთვის გადაიდგმება, მანამდე რამდენიმე მოსამზადებელი შეხვედრა და პრიორიტეტების ჩამოყალიბება უნდა მოხდეს.
აღსანიშნავია ისიც, რომ საქართველოს კონფლიქტური რეგიონები – აფხაზეთი და სამხრეთ ოსეთი პროგრამაში მონაწილეობას ვერ მიიღებენ.
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის წარმომადგენელმა აღნიშნა, რომ აფხაზეთის და სამხრეთ-ოსეთის პროგრამაში ჩართვა ვერც წინა წლებში მოხერხდა.
“შეუძლებელია კონფლიქტურმა რეგიონებმა ამ პროექტში მიიღოს მონაწილეობა, რადგან ადგილზე არ მოქმედებს საქართველოს კანონმდებლობა. ადრეც იყო მცდელობები განათლების პროგრამებში ჩაგვერთო ისინი, მაგალითად, ერასმუსის პროგრამაში, მაგრამ არასამთავრობო ორგანიზაციების და სახელმწიფოს მცდელობა მცდელობად დარჩა”, – განაცხადა სამინისტროს წარმომადგენელმა.
შეგახსენებთ, რომ შავი ზღვის აუზის ერთიანი ოპერაციული პროგრამა 2007-2013 (Black Sea JOP) არის ევროკავშირის სამეზობლო და პარტნიორობის ინსტრუმენტის (ENPI) შემადგენელი ნაწილი და მიზნად ისახავს შავი ზღვის რეგიონის ეკონომიკურ და სოციალური განვითარების მხარდაჭერას.
მასში საქართველოს გარდა გაერთიანებულია ბულგარეთი, რუმინეთი, საბერძნეთი, თურქეთი, უკრაინა, სომხეთი და მოლდოვა.
პროგრამის კონკრეტული მიზნებია: სოციალურ-ეკონომიკური განვითარების ხელშეწყობა საზღვრისპირა რეგიონებში; თანამშრომლობა ერთიანი გამოწვევების დასაძლევად; კონტაქტების მხარდაჭერა.
დაფინანსების მიღებისთვის აუცილებელია შერჩეული პრიორიტეტები ყველა ქვეყნისთვის მისაღები და მნიშვნელოვანი იყოს. სამუშაო შეხვედრები პრიორიტეტების შესარჩევად 2014 წლის თებერვლის თვეშიც გაიმართება.
