მაგალითად, შპს “საქენერგოკომპლექტი”, რომელიც 2004 წელს არის დაფუძნებული, “ნაციონალური მოძრაობის” დროს საკმაოდ დიდ შემოსავალს იღებდა. ამ კომპანიის ერთ-ერთი დამფუძნებელი და 51%-იანი წლის მფლობელი სწორედ გიორგი ჩხაიძეა.
როგორც გაირკვა, ეს კომპანია, სწორედ “ნაციონალების” დროს ახერხებდა, ეკონომიკური საქმიანობა აფხაზეთში განეხორციელებინა.
კანონში ოკუპირებული ტერიტორიების შესახებ წერია, რომ ოკუპირებულ ტერიტორიაზე ეკონომიკური საქმიანობის გახორციელება მხოლოდ სპეციალური ნებართვით არის შესაძლებელი.
კანონის მეექვსე მუხლის მეორე პუნქტის თანახმად, “საქმიანობის გახორციელება დაშვებულია მხოლოდ განსაკუთრებულ შემთხვევაში სპეციალური თანხმობით, რომელიც გაიცემა საქართველოს მთავრობის სამართლებრივი აქტით დადგენილი წესით, თუ ეს ემსახურება საქართველოს სახელმწიფო ინტერესებს, კონფლიქტის მშვიდობიანი მოგვარების, დეოკუპაციის, ომით დაზარალებულ მოსახლეობას შორის ნდობის აღდგენის ან ჰუმანიტარულ მიზნებს”.
გიორგი ჩხაიძის თქმით, აფხაზეთის ტერიტორიაზე ეკონომიკური საქმიანობის ნებართვა მას პრემიერ გილაურის თანხმობით მიეცა.
_ ბატონო გიორგი, გვითხარით, რომ “ნაციონალებმა” მიწები წაგართვეს, რომ მაგ დროს ქვეყნიდან გაქცევა მოგიხდათ და ა.შ. თუმცა, ერთ-ერთი კომპანია, რომლის 51 პროცენტის მფლობელი ხართ და რომელსაც საკმაოდ ბევრი პროექტი აქვს გახორციელებული, სწორედ “ნაციონალური მოძრაობის” ხელისუფლებაში ყოფნის დროს არის დაფუძნებული. როგორ მოახერხეთ ეს იმ დროს, როცა, თქვენი სიტყვებით, “ნაციონალები” გდევნიდნენ?
_ როცა ვთქვი, ვიყავი წასული,-მეთქი, ნახეთ რომელ წელს წავედი და რომელ წელს ჩამოვედი. კომპანიის დაფუძნება მხოლოდ და მხოლოდ ჩამოსვლით არ ხდება.
_ როგორ მოახერხეთ იმ დროს, როცა თქვენი სიტყვებით გავიწროვებდნენ, გართმევდნენ, გქონოდათ კომპანია…
_ მაგაზე გაცილებით მსხვილი კომპანიები მქონდა…
_ მით უმეტეს.
_ მაგ პერიოდში სხვა ენერგეტიკული კომპანიაც მქონდა, რომელსაც მაგაზე მეტი შემოსავალი ჰქონდა. ერთი მეორეს როგორ გამორიცხავს, ეგ მაინტერესებს. ის, რაც წამართვეს, ხომ არის ფაქტი? ის, რომ წასული ვიყავი ქვეყნიდან, ეგეც ფაქტია.
_ ისიც ფაქტია, რომ ამ დროს ბევრი ფული იშოვეთ…
_ რაზეა ლაპარაკი. იმიტომ, რომ ვაკეთებდი საქმეს.
_ ბახმაროში თითქმის ყველას ჩამოართვეს მიწები, თქვენ კი არა…
_ კი, ბატონო. და მერე?
_ და როგორ მოახერხეთ ეს? “ნაციონალურ მოძრაობის” დროს, ბევრი ვიცით, ვისაც ყველაფერი ბოლომდე წაართვეს.
_ არა, როგორ? ძალიან ბევრი რამე მასე არ არის. ყველას ყველაფერს არ ართმევდნენ _ ართმევდნენ იმას, რაც მათთვის იყო საინტერესო იყო.
_ ენერგეტიკა არ იყო მათთვის საინტერესო სფერო?
_ სამშენებლო ნაწილი არა. ერთადერთი კომპანია ვიყავით, რომელიც ფიზიკურად არსებობდა საქართველოში და ასრულებდა სამუშაოს.
_ “ატკატები” მიგქონდათ ვინმესთან?
_ არავისთან. ენერგეტიკის სფერო მათთვის იყო უფრო პრობლემური, იქ ვიღაცას საქმე უნდა ეკეთებინა და იმან, რაც გაკეთდა იმ წლებში, 100 პროცენტით გადაიარა ჩვენზე. არის სფერო, რომელსაც ფული მოაქვს და არის სფერო, რომელშიც მუშები ყველას სჭირდება.
_ ის, რაც წაგართვეს და რაც იშოვეთ ენერგეტიკის სფეროში, ერთმანეთს აბალანსებს?
_ ეს როგორი შეკითხვებია და იცით, საით მიგყავთ საუბარი?
_ ვსვამთ შეკითხვებს იმ დოკუმენტებზე დაყრდნობით, რომელიც ოფიციალური გზით მოვიპოვეთ…
_ მე, რაც ვიმუშავე, იმაში მივიღე შემოსავალი. წამართვეს ჩემი. რა კავშირი აქვს ან რა შუაშია ერთი მეორესთან? მე თუ ვმუშაობ, ვარ კომპანია, ვიღებ შემოსავალს. თქვენ რისი თქმა გინდათ, რომ რაც მე ვიმუშავე და მივიღე შემოსავალი, აკომპენსირებს იმას, რაც წამართვეს და ეს კარგია? რომელი კომპენსაცია წარმოგიდგენიათ ბიძაჩემის დაპატიმრების ფასად?! მე ამას მასე ვერ ვუყურებ.
_ სწორად ვერ გაგვიგეთ _ დაგიჭირეს ახლობლები, წაგართვეს ქონება, გაგაქციეს ქვეყნიდან და ამავე დროს ბიზნესი გაგაკეთებინეს, თანაც ყოველგვარი წილებში ჩაჯდომის გარეშე?!
_ ეს ნამდვილად ასე იყო. 2008 წლის შემდეგ, არც ერთი სახელმწიფო პროექტი არ მაქვს გაკეთებული და ეს ერთადერთი კომპანიაა, რომელიც მუშაობს აფხაზეთის ტერიტორიაზე.
_ როგორ ახერხებდით აფხაზეთში ეკონომიკურ საქმიანობს, გქონდათ სპეციალური ნებართვა?
_ დადგენილება ნახეთ? რა თქმა უნდა, მქონდა, _ დაგვიზუსტა ჩხაიძემ და განგვიმარტა, რომ ეს ნებართვა მას იმდროინდელმა პრემიერმა, ნიკა გილაურმა მისცა.
ჩხაიძის თქმით, ბოლოს აფხაზეთში 2013 წელს იყო. მისივე განმარტებით, აღნიშნული კომპანია დღეს დაშლილია და ამის მიზეზი პარტნიორებს შორის არსებული გაუგებრობაა.
_ ბატონო გიორგი, “ნაციონალების” დროს ძლიერი კომპანია “ოცნების” დროს დაიშალა?
_ არა. მას შემდეგ დაიშალა, რაც ფინანსური შემოვიდა. პარტნიორმა სხვა კომპანია დააარსა, _ გვითხრა ჩხაიძემ.
გუბერნატორი ამბობს, რომ აფხაზეთში ზუგდიდიდან გადადიოდა და იქ შესვლისთვის საჭირო საშვს შესაბამისი, რთული პროცედურების გავლის შემდეგ აძლევდნენ: _ მე მქონდა უფლება დამეთვალიერებინა ის ობიექტები, რომლის მშენებლობაც ჩვენი კომპანიის მიერ მიმდინარეობდა აფხაზეთში, _ დასძინა ჩხაიძემ და დააკონკრეტა, რომ “საქენერგოკომპლექტი” ბოლო წლებში საერთაშორისო პროექტებსაც ახორციელებდა.
ჩვენ შევეცადეთ გაგვერკვია, რა მიზნით მისცა აფხაზეთში ეკონომიკური საქმიანობის ნებართვა ნიკა გილაურმა გიორგი ჩხაიძეს, თუმცა, უშედეგოდ _ ყოფილმა პრემიერმა კომენტარის გაკეთებაზე უარი განაცხადა:
_ საქართველოში არ ვიმყოფები და მედიასთან არანაირ თემაზე კომენტარს არ ვაკეთებ, _ აღნიშნა “გურია ნიუსთან” სატელეფონო საუბრისას ნიკა გილაურმა.
