მოვაჭრეები, რომლებიც უკვე ერთი კვირაა ბაზრის ქალაქგარეთ გადატანას აპროტესტებენ, აცხადებენ, რომ შესაძლებელია ეს ხანძარი ხელოვნურად იყოს გაჩენილი, რადგან ისინი საპროტესტო აქციის შეწყვეტას მოთხოვნის დაკმაყოფილებამდე არ აპირებენ.
შეგახსენებთ, რომ აქციის მონაწილეებმა შიდა ქართლის გუბერნატორის, ზურაბ რუსიშვილის თანამდებობიდან გათავისუფლებაც მოითხოვეს.
ჩვენ უფლებადამცველ გიორგი ლაღიძეს დავუკავშირდით, რომელიც აქციების პირველი დღიდან გორელი მოვაჭრეების გვერდით არის და ყველა მოლაპარაკებას ესწრებოდა.
_ ვესწრებოდი გორში ჩატარებულ ყველა მოლაპარაკებას, შედეგი რომ არ დადგა, ეს ადამიანები თბილისში ჩამოვიდნენ და კანცელარიასთან გააგრძელეს აქციები ბაზრის იმავე ტერიტორიაზე დარჩენის მოთხოვნით. მე პირადად მრჩება შთაბეჭდილება, რომ ხელისუფლება ლობირებს ინვესტორს, თუმცა ამ ინვესტორს ფული არსაიდან არ ჩამოუტანია და არ ჩაუდვია საქართველოში. დღეს თქვენთან პირველად ვამბობ და ამ თემას უახლოეს დღეებში სპეციალურ ბრიფინგზეც განვაცხადებ – ამ ინვესტორებმა 4 მილიონ ნახევარი ლარი აიღეს “ქართუ ბანკიდან” და ისე შეიძინეს ტერიტორია. იმ დროს “ქართუ ბანკის”“ გორის ფილიალის მმართველი იყო ამჟამინდელი შიდა ქართლის გუბერნატორი. ეს ყველაფერი მოვაჭრეებს უჩენს ეჭვს, რომ ინვესტორებს ხელისუფლებაში მფარველობენ.
_ მოვაჭრეები ამბობენ, რომ ხანძარი ხელოვნურად არის გაჩენილი. თქვენ რა კომენტარს გააკეთებთ ამ საკითხზე?
_ არ შეიძლება დავარღვიოთ უდანაშაულობის პრეზუმცია და დანამდვილებით ვინმეს დაადო ხელი, მაგრამ მოვაჭრეებმა მითხრეს, რომ ძველი ბაზრის დირექტორმა, ბოჭორიშვილმა მათ უთხრა-თუ აქ ხანძარი გაჩნდება, არაფერში არ დამადანაშაულოთო. აი, ამის გამო აქვთ ეჭვი, მაგრამ კიდევ ვიმეორებ, არ უნდა დაირღვეს უდანაშაულობის პრეზუმცია. ამ საქმით შესაბამისი ორგანოები უნდა დაინტერესდნენ და მათი პრეროგატივაა სიმართლის დადგენა.
_ სურსათის უვნებლობის სააგენტო აცხადებს, რომ გორის ბაზარში ანტისანიტარია იყო და იქ შეძენილი პროდუქტი ჯანმრთელობისთვის სახიფათოა…
_ ამ განცხადებით სურსათის უვნებლობის სააგენტომ გაამყარა ინვესტორის პოზიცია. მოვაჭრეებმა განაცხადეს, რომ მოახდენდნენ ბაზრის ეტაპობრივ დაკეტვას, თავიანთი ხარჯებით გაარემონტებდნენ, ანტისანიტარიას მოსპობდნენ და ყველა სტანდარტს დააკმაყოფილებდნენ, მაგრამ ამაზე მათ უარი ეთქვათ. ეს ადამიანები ძალიან ცუდ დღეში არიან, მათ ძველ ადგილებზე ფული აქვთ გადახდილი, ახალა კი ე.წ. ინვესტორი, რომელიც ძველი ბაზრის მესაკუთრეც არის, ახალ ადგილებზე კიდევ თანხას სთხოვს. ხელისუფლებამ გაწირა ეს ადამიანები და ლუკმა-პურის გარეშე დატოვა. მათ უკან ოჯახებია, ყველას ბანკის ვალი აქვს. რა ქნან? ამ ადამიანების უმეტესობა თავდაუზოგავად იბრძოდა “ქართული ოცნების” გამარჯვებისთვის, ახლა კი იმედი ისე გაუცრუვდათ, რომ აღარ მალავენ უკმაყოფილებას. ეს ხალხი გაჩერებას არ აპირებს, საქმე სამართლებრივ ჩარჩოებში გადავა.
ზარალი ჯერ დათვლილი არ არის, მაგრამ როგორც მოვაჭრეები ამბობენ, დიდი იქნება.
