ნარმანიას უწყება 2014 წელს 16 ხიდის და 2 გვირაბის აშენებას აპირებს

“გზის საფარი მოეწყო 28,4 კილომეტრზე, ხოლო მოძრაობა გაიხსნა 15,4 კილომეტრზე, ეს მაშინ, როცა 2012 წელს ცენტრალურ ავტომაგისტრალზე მხოლოდ კილომეტრნახევარი გზა გაიხსნა. დასრულდა და ექსპლუატაციაში შევიდა ქობულეთის შემოვლითი გზის 12,4-კილომეტრიანი მონაკვეთი. დაიწყო ქობულეთის შემოვლითი გზის მომდევნო 19-კილომეტრიანი მონაკვეთის შენებლობა, რომელიც 2016 წელს დასრულდება. მიმდინარეობს ზესტაფონი-ქუთაისის შემოვლითი გზის 15 კილომეტრიანი, ქუთაისის შემოვლითი გზის 17 კილომეტრიანი და ქუთაისი-სამტრედიის გზის 14 კილომეტრიანი მონაკვეთების მშენებლობა. მათი დასრულება 2014-2015 წლებში ეტაპობრივად მოხდება,” _ განაცხადა ნარმანიამ.
მისივე თქმით, სამუშაოები მიმდინარეობს რუისი-აგარის 19 კილომეტრიან მონაკვეთზე, სადაც 3,5 კილომეტრი გზა უკვე დაგებულია.
“სატენდერო პროცედურები დასრულდა თბილისი-რუსთავის, აგარა-ზემო ოსიაურისა და სამტრედია-გრიგოლეთის მონაკვეთებზე, სადაც გამარჯვებული კომპანიები სამუშაოებს 2014 წლიდან დაიწყებენ. მიმდინარეობს ჩუმათელეთი-ზესტაფონის, ანუ რიკოთის უღელტეხილის მონაკვეთის ტექნიკურ-ეკონომიკური შეფასების დოკუმენტის შემუშავება. 2014 წელს ჩქაროსნულ ავტომაგისტრალზე სამუშაოები ერთდროულად 7 მონაკვეთზე, ჯამში 140 კილომეტრზე, წარიმართება. დაიწყება აგარა ოსიაურის მონაკვეთის მშენებლობა – სამშენებლო გზის სიგრძე შეადგენს 12 კილომეტრს. ამჟამად მიმდინარეობს სატენდერო პროცედურები, რომლის დასრულების შემდეგაც დაიწყება მშენებლობა; ასევე ვაპირებთ დავიწყოთ სამტრედია-გრიგოლეთის გზის მშენებლობა – სამშენებლო გზის სიგრძე 30 კილომეტრია. სატენდერო პროცედურები დასრულდა, ამჟამად მიმდინარეობს მომდევნო მონაკვეთის პროექტირება; დაიწყება თბილისი-რუსთავის ავტომაგისტრალის მშენებლობა – სამუშაოების განახორციელებს ტენდერში გამარჯვებული კომპანია “სინოჰიდრო კორპორეიშენ ლიმიტედი”.
სამუშაოები დაიწყება პირველ და მესამე მონაკვეთებზე, ხოლო მეორე მონაკვეთზე დეტალური პროექტის მომზადება დასრულებულია და გადაგზავნილია დონორ ორგანიზაციასთან (აზიის განვითარების ბანკი). დონორის თანხმობის შემდეგ გამოცხადდება ტენდერი; პირველი და მესამე მონაკვეთების ბიუჯეტი 88,761,128.95 ლარია,” _ აღნიშნა ნარმანიამ შეხვედრისას.
მისივე თქმით, 2014 წელს დასრულდება რუისი-აგარის მონაკვეთის მშენებლობა.
“ბეტონის საფარი მოეწყობა 16 კილომეტრიან მონაკვეთზე. მოეწყობა 4 ხიდი, 2 ხიდი-ესტაკადა, 5 გზაგამტარი. პროექტის ღირებულება – 70,8 მილიონი ლარი; დასრულდება ქუთაისის შემოვლითი-სამტრედიის მონაკვეთის მშენებლობა – 2013 წელს მოეწყო 6.2 ბეტონის საფარი. გზის მშენებლობა დასრულდება 2014 წელს. ჯამში აშენდება 3 ხიდი და 5 გზაგამტარი. სამშენებლო გზის სიგრძე 25,6 კილომეტრია, ხოლო პროექტის ბიუჯეტი 115 მილიონ ლარს შეადგენს. გრძელდება ზესტაფონი-ქუთაისი-ქუთაისის შემოვლითი გზის მშენებლობა – 2013 წელს ქუთაისის შემოვლით გზაზე მოეწყო 6,2 კილომეტრი ბეტონის საფარი. მთლიანობაში სამშენებლო გზის სიგრძე შეადგენს 32.5 კილომეტრს. ქუთაისის შემოვლითი გზის მშენებლობა 2014 წელს დასრულდება, ხოლო ზესტაფონი-ქუთაისის გზის მშენებლობა – 2015 წელს. პროექტის ჯამური ღირებულებაა 245,5 მილიონი ლარი; გრძელდება ქობულეთის შემოვლითი გზის II ლოტის მშენებლობა – სამშენებლო სამუშაოები 2013 წელს დაიწყო და 2016 წელს დასრულდება. მთლიანობაში აშენდება 16 ხიდი და 2 გვირაბი. პროექტის ჯამური ღირებულება 209,8 მილიონი ლარია,” _ აღნიშნა შეხვედრისას ნარმანიამ.
მინისტრის მიერ წარმოდგენილი 2014 წლის სამოქმედო გეგმის მიხედვით, პრიორიტეტულია საერთაშორისო და შიდასახელმწიფოებრივი მნიშვნელობის გზების რეაბილიტაციაც.
“2013 წელს რეაბილიტაცია ჩაუტარდა 260 კილომეტრ გზას, ანუ 60 კილომეტრით მეტს, ვიდრე 2012 წელს, 45 ხიდს (2012 წელს მათი რაოდენობა 28 იყო) და 5 გვირაბს, მაშინ, როცა 2012 წელს მხოლოდ 2 გვირაბი რეაბილიტირდა. სამინისტრო, ასევე, დიდ ყურადღებას უთმობდა სასოფლო გზებისა და სხვა შიდასახელმწიფოებრივი გზების რეაბილიტაციას. მუნიციპალური განვითარების ფონდის მიერ წელს 21 ასეთი გზა შეკეთდა, რომელზეც 15 მილიონ ლარზე მეტი დაიხარჯა. მიმდინარეობს, ასევე, 31 მილიონი ლარის სამუშაოები. გაიხსნა საერთაშორისო მნიშვნელობის მცხეთა-სტეფანწმინდა-ლარსის კობი-გუდაურის 19-კილომეტრიანი მონაკვეთი, შეკეთდა იქ არსებული გვირაბები და გალერეა, გარკვეულ მონაკვეთებში გაფართოვდა გზა. ლარსის საბაჟო-გამშვები პუნქტის განახლების შემდეგ რეაბილიტაცია ჩაუტარდა საქართველო-რუსეთის საზღვართან არსებული ნეიტრალური ტერიტორიის კილომეტრნახევრიან მონაკვეთს. შეკეთდა იქ არსებული ხიდი და გვირაბი; აქტიურად მიმდინარეობდა წყალტუბო-ლენტეხის, დედოფილსყარო-ქვემო ქედის, ალპანა-უწერის, ალპანა-ორბელის, შუქრუთი-უსახელო-კორბოულის, წყალტუბო-ხონის, იგოეთი-ლამისყანის, ინგირი-შამგონის, მუხური-თაიას, საჯიჯაო-ლესიჭინეს, ჯვარი-ჩქვალერი-საჩინოს, მონგირი-ახუთის, თბილისი-თიანეთის, თიანეთი-ჟინვალის, ზარზმა-ადიგენისა და სხვა გზების რეაბილიტაცია. 2014 წელს რეაბილიტაცია ჩაუტარდება 250 კილომეტრ საავტომობილო გზას და 30 საავტომობილო ხიდს. აგრეთვე, აშენდება 5 ახალი ხიდი,” _ აღნიშნა ნარმანიამ შეხვედრისას.