უფლებადამცველი აცხადებს, რომ ახალი ხელისუფლების მოსვლის შემდეგ ბიზნესის დატერორებისა და ეკონომიკურ-ფინანსური დანაშაულებების თვალსაზრისით წინა ხელისუფლების მიერ განხორციელებული ტერორის ფარგლებში, პროკურატურაში შესულია 9250 განცხადება.
“მინდა დავუსვა კითხვა ირაკლი ღარიბაშვილს, არის თუ არა მოქალაქეთა ამ განცხადებებში კონკრეტულად გიორგი ბადაშვილის მიმართ საჩივარი? მე მაქვს ინფორმაცია, რომ არის. საზოგადოებაში არსებობს კითხვები-აქვს თუ არა მთავარ პროკურორს წილი იმ დანაშაულებრივ ქმედებებში, რომელსაც წინა ხელისუფლება ბიზნესის წინააღმდეგ ახორციელებდა?”
უფლებადამცველის განცხადებით, ასეთი კითხვების არსებობა გასაკვირი არც არის, რადგან გიორგი ბადაშვილი 2006 წლიდან 2012 წლის პირველ ოქტომბრამდე ახორციელებდა ხელმძღვანელი პირის უფლებამოსილებას ფინანსურ პოლიციაში და აქვე მიმართავს ახალ პროკურორს, გასცეს ამომწურავი პასუხები ყველა კითხვაზე, რაც გაჩნდა მის მიმართ და არ დაუშვას ხელისუფლების იმიჯის კიდევ ერთხელ შელახვა.
ლორთქიფანიძე მიმართავს პრემიერ-მინისტრს, როგორც ახალი პროკურორის წარმდგენს, იუსტიციის მინისტრს, რადგან სწორედ მას ევალება ზედამხედველობა პროკურორზე და მთავარ პროკურორს, რომ სასწრაფოდ წარმოადგინონ არგუმენტაცია, წინააღმდეგ შემთხვევაში უფლებადამცველი თავად წარმოადგენს კონკრეტულ ფაქტებს.
“მოვუწოდებ გვაცნობონ, არის თუ არა მოქალაქეთა მხრიდან შესულ საჩივრებში კონკრეტული საჩივრები ბადაშვილის მიმართ. თუკი ისინი უახლოეს დღეებში ამაზე განცხადებას არ გააკეთებენ, გპირდებით, ამავე სტუდიაში გავაკეთებ პრესკონფერენციას და წარმოვადგენ მტკიცებულებას,მაგრამ მაშინ მარტო არ ვიქნები. მირჩევნია, მთავარმა პროკურორმა სიმართლეს თვალი გაუსწოროს და თავად გააკეთოს განცხადება”, _ განაცხადა უფლებადამცველმა “რეპორტიორის” პრესკლუბში დღეს გამართულ ბრიფინგზე.
ლორთქიფანიძის თქმით, უმჯობესია გენერალურმა პროკურორმა თქვას, რომ მასთან დაკავშირებით არის საჩივრები, მაგრამ ჰქონდეს არგუმენტაცია და გასცეს პასუხი.
