მიხელ ჯანელიძის განცხადებით, 2013 წელს მთლიანმა საგარეო სავაჭრო ბრუნვამ 10.8 მილიარდი აშშ დოლარი შეადგინა, რაც რეკორდული მაჩვენებელია და 2012 წლის მაჩვენებელს 6 %-ით აღემატება.
მისი განცხადებით, განსაკუთრებით აღსანიშნავია, რომ ექსპორტი 22 %-ით გაიზარდა და 2,9 მილიარდი აშშ დოლარზე მეტი შეადგინა, რაც, ასევე, რეკორდული მაჩვენებელია. თუ 2012 წელს ექსპორტის წილი საგარეო ვაჭრობაში შეადგენდა 23 %-ს, 2013 წელს მან 27 % შეადგინა. შესაბამისად, საანგარიშო პერიოდში სავაჭრო დეფიციტი 500 მილიონი აშშ დოლარით შემცირდა. რაც შეეხება იმპორტს, ის 0,4 %-ით გაიზარდა და 7,9 მილიარდი აშშ დოლარი შეადგინა.
მსუბუქი ავტომობილების გარდა, რომლის რეექსპორტსაც ახორციელებს საქართველო, ძირითად საექსპორტო პროდუქციას წარმოადგენს ფეროშენადნობები, თხილი, სპილენძის მადნები და კონცენტრატები, აზოტოვანი სასუქები, ყურძნის ნატურალური ღვინო, მინერალური წყლები, სპირტიანი სასმელები, ოქრო და ნახშირბადიანი ფოლადის წნელები (ე.წ. „არმატურა”).
ამასთან, აღსანიშნავია სოფლის მეურნეობის პროდუქციის ექსპორტის ზრდა: ციტრუსები (175 %); ღვინო (94 %), თხილი (93 %); მინერალური წყლები (71 %); მსხვილფეხა რქოსანი პირუტყვი (21 %); სპირტიანი სასმელები (15 %). რაც შეეხება სამრეწველო პროდუქციის ექსპორტს, მისი მაჩვენებელი ყველაზე მეტად გაიზარდა ფოლადის წნელების, სპილენძის კონცენტრატებისა და ტექსტილის ნაწარმის შემთხვევაში.
ეკონომიკისა და მდგრადი განვითარების მინისტრის მოადგილემ, მიხეილ ჯანელიძემ განსაკუთრებული ყურადღება გაამახვილა ექსპორტის მაჩვენებლის ზრდაზე ევროკავშირის ქვეყნებში, რომელმაც 608 მილიონ აშშ დოლარს მიაღწია და 72% შეადგინა.
2013 წელს საქართველოს საგარეო სავაჭრო ბრუნვამ ევროკავშირის ქვეყნებთან 2879 მლნ. აშშ დოლარი შეადგინა, რაც წინა წლის მაჩვენებელზე 3%-ით მეტია. საქართველოს საგარეო სავაჭრო ბრუნვაში ევროკავშირის ქვეყნების წილმა 27% შეადგინა, მათ შორის ექსპორტში 21% და იმპორტში 29%.
ექსპორტი გაიზარდა დსთ-ს ქვეყნებთან ვაჭრობაშიც და მან 30% (1,621 მლნ. აშშ დოლარი) შეადგინა. ზოგადად, დსთ-ის ქვეყნებთან საგარეო სავაჭრო ბრუნვამ 2013 წელს 3787 მლნ. აშშ დოლარი შეადგინა (2012 წელთან შედარებით 17%-ით მეტი). საქართველოს საგარეო სავაჭრო ბრუნვაში დსთ-ის ქვეყნების წილი 35% იყო, მათ შორის, ექსპორტში 56% და იმპორტში – 28%.
