აქედან, 14 ოჯახს სასწრაფოდ გამოსახლება ესაჭიროება, ხოლო დანარჩენს _ ხელისუფლებისგან დახმარება. იმ შემთხვევაში, თუ მათ ხელისუფლება ზამთრის დადგომამდე დახმარებას არ გაუწევს, შესაძლოა, 44 ოჯახის საცხოვრისი, დანარჩენი 14 მსგავსად, გეოლოგების დასკვნის საფუძველზე, პირველ კატეგორიას განეკუთვნოს, ხოლო პირველი კატეგორიის მქონე ოჯახები საერთოდ უსახლკაროდ დარჩნენ.
82 წლის გივი დონაძე სამი წელია საწოლს არის მიჯაჭვული. მისი ჯანმრთელობის მდგომარეობა ძალიან მძიმეა. ოჯახში ორი პენსიონერი და ერთი უმუშევარი ცხოვრობს. მათი შემოსავალი მხოლოდ პენსიაა.
დონაძეების საცხოვრებელი გეოლოგების დასკვნით, საშიშროების მიხედვით, პირველ კატეგორიას განეკუთვნება, მაგრამ, მიუხედავად ამისა, ისინი სოციალურ შემწეობას მაინც ვერ იღებენ; არც გამგეობიდან მიუღიათ რაიმე სახის დახმარება.
“რვა წელზე მეტია, საცხოვრებელი სახლი დაიმეწყრა, თუმცა ახლა უკვე კრიტიკულ სიტუაციას მიაღწია, რადგან ყოველი ზამთრის შემდეგ, სახლს ნაპრალები უჩნდება. მოსვლით მოდიან, ნახულობენ, გვპირდებიან და მიდიან. ასე გრძელდება უკვე სამ წელზე მეტია. სახლი მარცხნივაცაა გადახრილი და მარჯვნივაც”, _ გვითხრა ოჯახის დიასახლისმა.
თავად ოჯახის უფროსი, გივი დონაძე ამბობს, რომ იმედი აქვს მისი გასაჭირის შესახებ ცენტრალურ ხელისუფლებაშიც გაიგებენ, რადგან ადგილობრივ ხელისუფლებას მათ დასახმარებლად დღემდე არაფერი გაუკეთებია: _ ჩემთან გუბერნატორი ჩიტაიშვილი და გამგებელი ტაკიძეც იყვნენ. მათ დაადასტურეს, რომ დახმარება მჭირდება და სახლი დანგრეულია. გვპირდებიან, გვპირდებიან და ამ დაპირებებში სახლი თავზე გვენგრევა. ბაბუა, კი არ ვმათხოვრობ, უბრალოდ, ვითხოვ იმას, რაც მეკუთვნის. ხომ არის 5000 ლარი გამოყოფილი ბიუჯეტიდან? არც ის მომცეს, თორემ საკმარისი რომ არ არის, ამაში ყველა დამერწმუნება. ჩემი მეუღლე ავადმყოფია, სამჯერ არის ნაოპერაციევი. ორივეს წამლები გვჭირდება. რამდენს იშოვის ჩემი უმუშევარი შვილი? ამ სახლის დაშლას, თუნდაც აშენებას რაც სჭირდება, მაგდენს არავინ მომცემს, მაგრამ ცოტა რომ შევამაგრო, ხომ შეიძლება?! დარწმუნებული ვარ, ვეღარ გაუძლებს კიდევ ერთ ზამთარს, _ გვიყვება მოხუცი და აგრძელებს: _ წამლების საყიდლად რომ მყოფნიდეს ჩვენი პენსია, ესეც დიდი შეღავათი იქნებოდა.
შარშან 300 ლარი მივიღეთ ციტრუსის რეალიზაციიდან შემოსავალი. თხილი ცოტა გვაქვს და ეს შემოსავალი მხოლოდ ცოტა ხნით გვყოფნის. არ შეიძლება, ასე მიატოვოს მთავრობამ გლეხობა და ყველაფერი მას დააკისროს. როგორი მისაცემია 44 ლარი ერთ ტომარა სასუქში?! ჩვენ მხოლოდ პენსიაზე ვართ დამოკიდებულნი და ვცდილობთ, შიმშილით არ დავიხოცოთ. სოციალური სუბსიდიების სააგენტომ 57 500 ქულა მოგვანიჭა! რა ნახეს, ნეტავ, ჩემს ოჯახში?! მე დავარდნილი ვარ, მეუღლე პენსიონერი ავადმყოფია, წამლებზე დამოკიდებული. ოჯახში სხვა არავინ მუშაობს. ასე კი არ ვიყავი, სხვისთვის სათხოვარი რა მჭირდა, სახლიც მქონდა, კარიც და შემოსავალიც. მდიდარი თუ არ ვიყავი, ერთ საშუალო ოჯახს რომ შეეფერება, ისე კი ვცხოვრობდით. ვითხოვ, სპეციალურმა კომისიამ შეისწავლოს ჩემი ოჯახის მდგომარეობა.
ბატონი გივის მოსაზრებით, ადამიანები კი არ უნდა ცოცხლობდნენ, უნდა ცხოვრობდნენ: _ დღეს მოსახლეობის 10%-ი ცხოვრობს, ისიც პრეზიდენტის გარემოცვა, მერაბიშვილი და მისნაირები, დანარჩენები კი ჩემსავით ცოცხლობენ. რასაც ვყვები, იწერება, ხომ? კაი, ჩაიწერეთ, არ მგონია, მაგისთვის ვინმემ დამიჭიროს. დამიჭირონ თუ უნდათ, მაინც დაჭერილი არ ვარ სამი წელია?! პენსიის დარიგება რომ შეჩერდეს, ხალხი დაწყდება მშიერი. ჩემი ნალაპარაკევი ანტისახელმწიფოებრივი კი არაა, მე ვთქვი საერთო მდგომარეობა და ჩემი ოჯახის გასაჭირი. ყანას თუ შემოსავალს ეძახიან, ისიც იკითხონ, რამდენი სჭირდება მოსავლის მოყვანას. თან ჭახვათაში გვაქვს საყანე ფართობები. ერთი თხილია, რომელსაც 20 დღეში მოკრეფენ, გაყიდიან და მორჩა გლეხის შემოსავალი.
თამაზ ცერცვაძის ოჯახი კი არც სოციალურ დახმარებას იღებს და არც მუნიციპალიტეტის ბიუჯეტიდან მიუღია დახმარება.
მისი მეუღლის, თინიკო ცერცვაძის თქმით, გამგეობაში ორჯერ იყო მისული: _ წინა ზამთარში ვიყავი და ასე მითხრეს, ამ წელში არ გვაქვს თანხები და ახალი წლიდან გვექნებაო. მეორე სართულზე ღამის გათევა შეუძლებელია, უკანა კედელიც დაზიანებულია და იატაკიც. აქ ყველგან მეწყერსაშიში ზონაა. გეოლოგებიც იყვნენ მოსულები, დახმარებას შეგვპირდნენ. წასასვლელი არსად მაქვს, თორემ, როგორ შეიძლება ასეთ მდგომარეობაში ცხოვრება?! ზამთარში და ცუდ ამინდში განსაკუთრებით მეშინია, ბავშვებს ხიფათი არ შეემთხვეს. არანაირი დახმარება არ გვაქვს. გამგებელმა გია ტაკიძემ მითხრა, რომ შესაძლებელია ალტერნატიული საცხოვრებლის გამონახვა; ამაზეც თანახმა ვართ, მაგრამ ჯერ საიმედო არაფერი ჩანს.
სოფელ თხინვალის მაჟორიტარი დეპუტატი, მერაბ ხომერიკი მიიჩნევს, რომ დონაძეების და ცერცვაძეების ოჯახებს დროული დახმარება მართლაც სჭირდება.
მისი თქმით, ანალოგიურ მდგომარეობაში ამ სოფელში ბევრი ცხოვრობს. სოფელი მცირემიწიანია და მხოლოდ ციტრუსი და თხილი აქვთ. ისიც მცირე რაოდენობით და გლეხობაც მხოლოდ ამით ასულდგმულებს ოჯახს.
როგორც ოზურგეთის მუნიციპალიტეტის გამგეობაში აცხადებენ, უსახლკარო და შეჭირვებული ოჯახებისთვის, 2011 წელს ბიუჯეტიდან 50 000 ლარია გამოყოფილი. მათი თქმით, უპირატესობა მრავალშვილიან ოჯახებს ენიჭებათ, სადაც მცირეწლოვანი ბავშვები ცხოვრობენ.
გამგეობაში გადაჭრით ვერ გვიპასუხეს, მოხვდებიან თუ არა აღნიშნული ოჯახები მიმდინარე წელს უსახლკაროთა და შეჭირვებულთა დახმარების პროგრამაში.
