ოზურგეთის მუნიციპალიტეტის საკრებულომ, 1 აგვისტოს დღის წესრიგით გათვალისწინებული 14 საკითხი, დაახლოებით, ერთ საათში განიხილა და დაამტკიცა კიდეც. მანამდე კი, საკრებულოს თავმჯდომარემ, ალეკო მამეშვილმა იმ დეპუტატების მისამართით, რომლებიც ბოლო რამდენიმე სხდომას რეგულარულად აცდენენ, უკმაყოფილება გამოთქვა: _ უკმაყოფილება მინდა გამოვთქვა დასწრებასთან დაკავშირებით. დღევანდელ სხდომას მხოლოდ 22 დეპუტატი ესწრება. არიან დეპუტატები, რომლებიც ბოლო პერიოდში სტაბილურად არ ესწრებიან სხდომებს. არაერთხელ მივმართე აპარატის უფროსს, მაგრამ შედეგი არ არის, _ აღნიშნა მამეშვილმა დღის წესრიგის წაკითხვამდე.
ყველაზე მნიშვნელოვანი საკითხი, რომელიც სხდომაზე რამდენიმე წუთში ჩაიკითხეს, ოზურგეთის მუნიციპალიტეტის 2011 წლის დამტკიცებულ ბიუჯეტში შეტანილი კიდევ ერთი ცვლილება იყო.
_ გამგეობის მიერ შემოტანილია პროექტი, რომელიც გულისხმობს შემოსავლების ზრდას 56 700 ლარით. 2011 წლის 7 თვის მონაცემებით, არის შემოსავლების სახეები, რომლებიც 100%-ით შესრულდა, ზოგიერთი 220% -ით(?!) და იმ გადაუდებელი აუცილებლობიდან გამომდინარე, ანუ სასწავლო წლის დაწყებასთან დაკავშირებით, მოგვეცა საფუძველი, დამტკიცებულ ბიუჯეტში შეგვეტანა ცვლილებები, _ თქვა ოზურგეთის მუნიციპალიტეტის გამგეობის საფინანსო-საბიუჯეტო სამსახურის უფროსმა, ლია ქათამიძემ და ამის შემდეგ ცვლილებების დაკონკრეტება დაიწყო.
ქათამიძის თქმით, მოსაკრებელი ტოტალიზატორებიდან შესრულდა 100%-ით, წლის ბოლომდე მობილიზებული იქნება 15 000 ლარი; სათამაშო აპარატებიდან დამატებით მობილიზებული იქნება 35 000 ლარი; მოსაკრებელი მშენებლობის დაწყების ნებართვისთვის შესრულდა 100%-ით _ წლის ბოლომდე ბიუჯეტში შემოვა 3 100 ლარი; სასოფლო-სამეურნეო დანიშნულების მიწის არასასოფლო-სამეურნეო მიზნით გამოყოფისას, სანაცვლო მიწის ათვისების ღირებულებისა და მიყენებული ზიანის ანაზღაურებიდან მიღებული შემოსავალი შესრულებულია წლიური გეგმის 220%-ით, ანუ ბიუჯეტში დამატებით შემოსულია 3 600 ლარი.
საკრებულომ მიიღო გადაწყვეტილება, რომ მიღებული შემოსავლებიდან დაფინანსდეს: შეჭირვებულ მოქალაქეთა სამედიცინო მომსახურების პროგრამა _ 2 000 ლარი. სკოლების ხელშეწყობის პროგრამა _ 25 000 ლარი. სკოლამდელი სააღმზრდელო-საგანმანათლებლო ცენტრი 25 000 ლარი. ახალგაზრდულ საქმეთა პროგრამები 700 ლარი. საცხენოსნო კლუბი “მარულა” და მუნიციპალური ტრანსპორტი 2 000-2 000 ლარი.
აღნიშნულ ცვლილებებთან დაკავშირებით, შეკითხვა მხოლოდ ოპოზიციონერ დეპუტატს ლელა ნაცვალაძეს გაუჩნდა: _ სკოლის ხელშეწყობის არა ერთი პროგრამა გახორციელდა, თუმცა, რეალურად იმ სკოლებს, რომლის სარემონტო სამუშაოებისთვის საკმაოდ სოლიდური ფინანსები დაიხარჯა, კიდევ დახმარება სჭირდება. მაინტერესებს, იმ სკოლების ჩამონათვალი, რომლის ხელშეწყობასაც ტენდერის გამოცხადების შემდეგ აპირებთ. მაღალია ალბათობა, ისევ ის სკოლები დააფინანსოთ, რომელიც გასულ წლებში გარემონტდა. ვიცი, რომ #1 საჯარო სკოლისთვის გარკვეული თანხა გამოიყო, თუმცა, ხელმეორედ გასაკეთებელია, _ თქვა ქათამიძის მისამართით ნაცვალაძემ.
ვინაიდან საფინანსო-საბიუჯეტო სამსახურის უფროსს კითხვაზე პასუხი არ ჰქონდა, მას მუნიციპალიტეტის გამგებელი წაეშველა, თუმცა, არც გია ტაკიძე აღმოჩნდა ინფორმირებული _ მისი ნათქვამი რომ გავიმეოროთ, არ ახსოვს ზეპირად და კონკრეტულად, თუ რომელი სკოლების ხელშეწყობა იგეგმება. რაოდენ გასაკვირიც არ უნდა იყოს, გამგებელს განათლებისა და მეცნიერების სამინისტროს მიერ გამოცხადებული ტენდერების შესახებ უფრო მეტი ინფორმაცია აღმოაჩნდა, ვიდრე ბიუჯეტიდან გამოყოფილი თანხებით დაგეგმილი საქმიანობების შესახებ.
მამეშვილი წინგადადგმულ ნაბიჯად მიიჩნევს შეჭირვებულ მოქალაქეთა სამედიცინო მომსახურების პროგრამის 2 000 ლარით გაზრდას; ხოლო სკოლების და ბაღების 50 000 ლარით ხელშეწყობის პროგრამას, მისი სიტყვებით რომ ვთქვათ, “პრინციპში, დადებითად მიიჩნევს”.
ასევე, ცვლილება შეიტანეს სახელმწიფო შესყიდვის გეგმაში, კონკრეტულად კი “შენობის მოწყობის სამუშაოები”, დეპუტატების თანხმობის საფუძველზე, 25 000 ლარით გაიზარდა. რომელი შენობის მოწყობისთვის დაიხარჯება აღნიშნული თანხა, სხდომაზე არ დაუკონკრეტებიათ.
დეპუტატებს კითხვები არც ოზურგეთის მუნიციპალიტეტის სპორტის განვითარების ცენტრის და სასპორტო სკოლის ხელმძღვანელების მიერ გაწეული საქმიანობის ანგარიშის მოსმენის შემდეგ გასჩენიათ.
