გთავაზობთ მათ შორის რამდენიმე საუკეთესო ვარიანტს, რომელიც მოიხმარება როგორც საწებლად, ასევე უმრავლესი კერძების მომზადების დროსაც.
1. ავიღოთ რვა კგ პომიდორი, ექვსი კგ ბულგარული წიწაკა, ერთი კგ მწარე წიწაკა, ხმელი სუნელები _ თითო ღვინის ჭიქა ქინძი, ცერეცო და უცხო სუნელი. ათი თავი საშუალო ზომის ნიორი. ერთი ბოთლი თეთრი ძმარი, მარილი გემოვნებით. პომიდორი ხარისხიანი შევარჩიოთ, “ხორციანი”. ბულგარულ და მწარე წიწაკას გამოვაცალოთ მარცვლები. მერე პომიდორი, წიწაკა და ნიორი გავატაროთ ხორცსაკეპში, დავამატოთ ხმელი სანელებლები და ძმარი. დავდგათ თავდახურულ მომინანქრებულ ჭურჭელში და ვურიოთ დღეში ერთხელ, 10 დღის განმავლობაში. ბუშტუკები როცა მოშორდება, მზადაა. ასპირინი არ სჭირდება. ჩავასხათ ბოთლებში და შევინახოთ.
2. ხუთი კგ მწიფე პომიდორი გავატაროთ, კილონახევარი ხახვი და მარცვალგამოცლილი კილონახევარი ბულგარული წიწაკა წვრილად დავჭრათ. პომიდორი წამოვადუღოთ, ჩავასხათ ერთი ჩაის ჭიქა ზეთი და ჩავყაროთ დაჭრილი ხახვი და წიწაკა. დავამატოთ ერთი ღვინის ჭიქა ძმარი, ერთი ღვინის ჭიქა ხმელი ქინძი, მარილი გემოვნებით და საათნახევრის განმავლობაში ვადუღოთ დაბალ ტემპერატურაზე. ბოლოს ვუყოთ ათი აბი (ერთი ლისტი) ასპირინი, ცხლად ჩავასხათ ქილებში ან ბოთლებში, დავახუროთ და შევინახოთ გრილ ადგილზე.
3. მოვამზადოთ კეტჩუპი. საჭირო მასალა: 6 კგ პომიდორი, 2 კგ ბულგარული წიწაკა, 1 კგ ვაშლი, სამი ფოთოლი დაფნა, ცოტა მიხაკ-დარიჩინი, გორვალა, შავი წიწაკის მარცვლები, 200 გრამი ნიორი. ყველაფერი ეს ერთად ჩავყაროთ ქვაბში და მოვხარშოთ. შემდეგ გადმოვდგათ, ხახვი და დაფნის ფოთლები ამოვიღოთ. დანარჩენი მასა წვრილ საცერში გავწუროთ (საცერის ბადეში არ უნდა გავიდეს პომიდვრის თუ წიწაკის მარცვლები). გაცრილ მასას დავამატოთ ერთი ჩაის ჭიქა მარილი (გემოვნებით), ერთი ღვინის ჭიქა შაქარი, ერთი ჭიქა თეთრი ძმარი, კარგია, თუ ვაშლის ძმარი გვექნება. მოვურიოთ, ვადუღოთ 15 წუთი. როცა გადმოვდგამთ, ვუყოთ ათი აბი ასპირინი და ცხლად ჩავასხათ ბოთლებში. ძალიან გემრიელია. ზოგი ასეთ კეტჩუპს ერთ ჩაის ჭიქა კარტოფილის ფქვილს ამატებს. მე პირადად არასოდეს დამიმატებია.
