ადვოკატ მაგდა კოტრიკაძის თქმით, სერგო თეთრაძის წამების საქმე პროკურატურამ თავიდანვე დაყო სამ ეტაპად. პირველი იყო სისაური-ტერაშვილის ეპიზოდი. კოტრიკაძის განცხადებით, ესენი არიან პატიმრები, რომლებსაც უშუალოდ დაევალათ ციხეში სერგო თეთრაძეზე სექსუალური ხასიათის ძალადობა და წამება. ადვოკატი აცხადებს, რომ მათზე დადგა გამამტყუნებელი განაჩენი, თუმცა მისთვის გაუგებარია, რატომ ჩათვალა საჭიროდ პროკურატურამ ერთი წლის წინ მათთან საპროცესო შეთანხმების გაფორმება. ძიების მეორე ეტაპი, ადვოკატის თქმით, საქალაქო სასამართლოს გადაწყვეტილებით დასრულდა.
“მინდა საზოგადოების ყურადღება მივაპყრო ერთი ძალიან მნიშვნელოვანი ფაქტისკენ – თავიდანვე გამოძიება წავიდა არასწორი მიმართულებით და აქ გარკვეული პიროვნებების ინტერესები იკვეთება. მოგეხსენებათ, სასამართლო პროცესით დადგენილია, რომ როცა სერგო თეთრაძე გადაიყვანეს გლდანის ციხეში, ის უკვე სასტიკად ნაწამები იყო. აქაც განხორციელდა მასზე არაადამიანური მოპყრობა, მაგრამ ძირითადად, მისი წამება განხორციელდა თავდაცვის სამინისტროში,” _ აღნიშნა მაგდა კოტრიკაძემ.
ადვოკატის განცხადებით, მისი და თეთრაძის მეუღლის მოთხოვნით, თავდაცვის მინისტრმა ირაკლი ალასანიამ ის ადამიანები, რომლებიც უშუალოდ მონაწილეობდნენ თეთრაძის დაკავებაში, გადაიყვანა კადრების დაქვემდებარებაში, რაღაც პერიოდის განმავლობაში ცნობილი გახდა, რომ ეს ადამიანები ისევ დაუბრუნდნენ მაღალ თანამდებობებს.
“სასამართლოს მიერ გამამტყუნებელი განაჩენი დადგა ციხის იმ თანამშრომლების მიმართ, რომლებმაც ბოლოს მიიღეს სერგო თეთრაძის წამებაში მონაწილეობა, მაგრამ მისი დაკავება და წამება თავდაპირველად განხორციელდა თავდაცვის სამინისტროში. ბატონო ირაკლი, როგორც საზოგადოებას, ასევე ოჯახის წევრებს აინტერესებთ, რატომ არიან ეს ადამიანები ისევ მაღალ თანამდებობებზე. მე თავიდანვე მოვითხოვე, რომ გიორგი ქევხიშვილი და რობერტ გრიგალაშვილი, რომლებიც ზედამხედველი პროკურორები იყვნენ თეთრაძის საქმის და ისევ რჩებოდნენ პროკურორებად, ჩამოშორებულიყვნენ გამოძიებას, რადგან რასაკვირველია გავლენას მოახდენდნენ ამ საქმის მიმართულებაში. საინტერესოა ისიც, რატომ გახდა საჭირო, რომ ხათუნა კალანდაძემ, რომელიც იმ პერიოდში საგამოძიებო ნაწილის უფროსის მოადგილე იყო, დააყენა სასამართლო პროცესზე შუამდგომლობა და ეს ადამიანები მოხსნა დასაკითხთა სიიდან. პასუხი ერთია – იმიტომ, რომ ეს ადამიანები რამეში არ ჩაჭრილიყვნენ, ამას კურირებდა ლაშა ნაცვლიშვილი და ეტყობა კიდეც გამოძიებას. მოგმართავთ დააზუსტოთ და დაადგინოთ, რამდენად მონაწილეობდნენ თქვენი უწყების თანამშრომლები თეთრაძის საქმეში და დამნაშავენი გაათავისუფლოთ თანამდებობებიდან,” _ მიმართა თავდაცვის მინისტრს თეთრაძის ადვოკატმა.
როგორც კოტრიკაძე ამბობს, მთავარ პროკურორთან შეხვედრის შემდეგ იმედი აქვს, გამოძიების მესამე ეტაპი სამართლიანად წარიმართება და ყველა დამნაშავე იქნება გამოვლენილი.
მოსამართლე ბესიკ ბუგიანიშვლის პოზიცია და გადაწყვეტილება მიუღებელია სერგო თეთრაძის მეუღლისთვისაც. ნანა თეთრაძის თქმით, მეგის ქარდავას გამართლება წამების ამ ეპიზოდში ყოვლად გაუმართლებელია. აქვე ნანა თეთრაძემ შეახსენა თავდაცვის მინისტრს მისთვის ნათქვამი სიტყვები, რომ თეთრაძის საქმის გამოძიება მისი ღირსების საქმე იყო, ამიტომ მიმართა ირაკლი ალასანიას დაელოდოს გამოძიების შედეგებს და საქმეში მონაწილე ყველა მაღალჩინოსანი გაათავისუფლოს სამსახურიდან.
“ჩემი მეუღლე 2011 წლის 23 სექტემბერს გარდაიცვალა, 27 სექტემბერს კი ალასანიამ თავდაცვის სამინისტროსთან პიკეტზე განაცხადა, რომ მისთვის ყველაფერი იყო ცნობილი და ახლა ის ადამიანები ისევ მაღალ თანამდებობებზე მუშაობენ”.
თეთრაძის მეუღლე აცხადებს, რომ არ შეეგუება განაჩენს და ბოლომდე იბრძოლებს მოთხოვნის დასაკმაყოფილებლად. ნანა თეთრაძის მოთხოვნაა სრულად რეაბილიტირებული იყოს მეუღლის სახელი.
თავდაცვის მინისტრმა აღნიშნულთან დაკავშირებით გააკეთა განცხადება და აღნიშნა, რომ პროკურატურიდან მოვიდა წერილი, სადაც წერია, რომ ამ ადამიანებს თეთრაძის წამებაში მონაწილეობა არ მიუღიათ და შესაბამისად, აღდგენილნი არიან თანამდებობებზე.
შეგახსენებთ, რომ თბილისის საქალაქო სასამართლოს გადაწყვეტილებით ფაცაციას, ყაჭეიშვილს და მუხაძეს სერგო თეთრაძის საქმესთან დაკავშირებით თავისუფლების 9 წლის აღკვეთა და საჯარო სამსახურში თანამდებობის დაკავების უფლების 3 წლის ვადით ჩამორთმევა მიესაჯათ.
