“პრემიერს მინისტრების ხელფასისა და დანამატის განსაზღვრის უფლება არ აქვს”

როგორც იგი “გურია ნიუსთან” აცხადებს, “საჯარო სამსახურის შესახებ” კანონით საჯარო მოხელეთა (მათ შორის პრემიერისა თუ მინისტრების) ხელფასი შეიძლება შედგებოდეს 3 კომპონენტისგან: (ა) თანამდებობრივი სარგო; (ბ) პრემია; (გ) კანონით გათვალისწინებული დანამატი.
“ამ ჩამონათვალიდან თანამდებობრივი სარგო და დანამატი და/ან მისი ოდენობა დადგენილი/განსაზღვრული უნდა იყოს კანონით. თუმცა, მას არა კანონი, არამედ პრემიერი განსაზღვრავს, რაც დარღვევაა,” _ ამბობს ალაფიშვილი.

მისი თქმით, მინისტრთა თანამდებობრივი სარგოები 2005 წლიდან პრეზიდენტ მიხეილ სააკაშვილის ბრძანებულებით განისაზღვრებოდა.
“იგივე კანონის 37-ე მუხლი ამბობს: მეორე მნიშვნელოვანი კომპონენტი, რასაც დანამატი ჰქვია, ესეც კანონით უნდა იყოს განსაზღვრულიო. ამ შემთხვევაში მინისტრებთან მიმართებაში ასეთი კანონი არ არსებობს და რაც შეეხება ფაქტობრივ გარემოებას, ეს განსაზღვრულია პრემიერის ბრძანებით, თუმცა არცერთ შემთხვევაში შესაბამისი კანონი არ არსებობს. ანუ კანონშეუსაბამობაა.

მაგალითისთვის, პრეზიდენტის, მოსამართლის, საკონსტიტუციო სასამართლოს წევრთა ხელფასები სპეციალური კანონებითაა განსაზღვრული, ამავე წესით უნდა იყოს მთავრობის წევრთა თანამდებობრივი სარგოებიც და დანამატებიც. იმიტომ, რომ კანონი სხვადასხვაგვარად ვერ იქნება წაკითხული. ანუ მოსამართლესთან მიმართებაში დაცული უნდა იყოს კანონი და მინისტრებთან მიმართებაში არა?!
დამკვიდრებული კანონშეუსაბამო პრაქტიკა ახალი ხელისუფლების პირობებშიც გრძელდება და პრემიერი განსაზღვრავს თანამდებობროვი სარგოებისა და დანამატების ოდენობას,” _ აღნიშნავს იურისტი.

ალაფიშვილი აცხადებს, რომ ხარვეზის აღმოსაფხვრელად ორი გამოსავალი არსებობს.
“ერთი, რომ პარლამენტმა საჯარო სამსახურის შესახებ კანონის მე-9 და 37-ე მუხლებში შეიტანოს ცვლილება და თანამდებობრივი სარგოსა და დანამატის დამტკიცების უფლება პრემიერს მისცეს, ან ეს კანონი არ უნდა შეცვალოს და მიიღოს ცალკე კანონები, რომლითაც მთავრობის წევრთა თანამდებობრივ სარგოებსა და სახელფასო დანამატებს განსაზღვრავს, ისევე როგორც მოსამართლეების შემთხვევაში,” _ განაცხადა ალაფიშვილმა.

აღნიშნულ საკითხზე კომენტარისთვის “გურია ნიუსი” მთავრობის კანცელარიის იურიდიული დეპარტამენტის ხელმძღვანელ შალვა თადუმაძეს დაუკავშირდა. მან კომენტარზე უარი თქვა და მიზეზად მოუცლელობა დაასახელა. ამასთან, გვთხოვა, რომ კითხვები გაგვეგზავნა და მოგვიანებით დათქმულ დროს გვიპასუხებდა. თუმცა, შალვა თადუმაძეს “გურია ნიუსის” ზარებისა და შეტყობინებებისთვის აღარ უპასუხია.