(გურია ნიუსი, ლანჩხუთი) _ რამდენიმე დღეა, ლანჩხუთელი მოქალაქეები გვიკავშირდებიან და ამბობენ, რომ ნაგვის გატანის გადასახადზე ბანკში, მომსახურების თანხას _ 1 ლარს თხოვენ: _ ჯერ პროგრამის ჩატვირთვა დაუგვიანდათ, თან რიგებია ბანკში. როცა ხელშეკრულებას ხელი მოვაწერეთ, გვითხრეს ბანკის საკომისიო 20 თეთრი იქნებაო, ახლა კი 1 ლარი გადამახდევინეს, _ გვითხრეს ლანჩხუთლებმა.
ჩვენ ინფორმაცია “ტაოპრივატბანკის” სათავო ოფისში გადავამოწმეთ, სადაც გვითხრეს, რომ საკომისიო 40 თეთრია და არა 1 ლარი: _ როგორც ჩანს, მოქალაქემ 2 თვის გადასახადი გადაიხადა, ან 2 ადამიანი ცხოვრობს ბინაში.
ამ განცხადების შემდეგ, გადავთვალეთ და აღმოვაჩინეთ, რომ ბანკის განცხადება ლოგიკას ექვემდებარებოდა _ თუ ერთ სულზე გადასახადი 60 თეთრია, საკომისიო კი _ 40 თეთრი, გამოდის, რომ ან 2 თვის 60 თეთრია გადახდილი ან კონკრეტულ ბინაში 2 ადამიანი ცხოვრობს!
თუმცა როგორც ირკვევა, გადასახადზე დამატებითი საკომისიო მართლაც 1 ლარია: _ 60 თეთრი უნდა გადამეხადა და საკომისიო თანხის ჩათვლით 1,60 ლარი გადავიხადე! ასევე ჩემს ახლობელს უნდა გადაეხადა 2,50 ლარი, რადგან ის კერძო სახლში ცხოვრობს, მაგრამ გადაახდევინეს დამატებით 1 ლარი, ანუ სულ 3,50 ლარი. ამას წინათ, გამგეობა-საკრებულოს ანგარიშები “ტაოპრივატბანკში” გადავიდა და ეტყობა, მათ კარგ პირობებს სთავაზობენ სესხებზე და მომსახურებაზე, ამის სანაცვლოდ კი, ბანკს რომ ხეირი ჰქონდეს, მოსახლეობას აყაჩაღებინებენ! რა ამბავია 60 თეთრზე დამატებით 1 ლარი? _ კითხულობენ აღშფოთებულები მოქალაქეები.
ჩვენ ისევ დავუკავშირდით “ტაოპრივატბანკის” საინფორმაციო სამსახურს:
_ ნაგვის გატანის გადასახადზე თქვენს ბანკში საკომისიო რამდენია _ 40 თეთრი თუ 1 ლარი?
_ თუ გადარიცხვაა, მომსახურების საზღაურია 1 ლარი, ისე კი კომუნალური გადასახადის გადახდის საკომისიო 40 თეთრია.
_ არავითარი გადარიცხვა, თანხა შემაქვს ბანკში.
_ ახლავე გეტყვით… საკომისიო არის 1 ლარი.
_ ორი დღის წინათაც დაგირეკეთ ამავე ნომერზე და მითხარით, რომ საკომისიო 40 თეთრი იყო!
_ ახლავე აგიხსნით _ თუ თქვენ იხდით გაზი, შუქის, წყლისა და დასუფთავების გადასახადს, 40 თეთრი გახლავთ საკომისიო. რაც შეეხება ნაგვის გატანის გადასახადს…
_ ჩათვალეთ, რომ ეს არის დასუფთავების გადასახადი!
_ თბილისში კომუნალური გადასახადი არის 40 თეთრი, მაგრამ…
_ რა მნიშვნელობა აქვს ამას? ლანჩხუთელები უფრო მდიდრები ვართ, ვიდრე _ თბილისელები? ასეც რომ იყოს, გადასახადი ქალაქების მიხედვით სხვადასხვა რატომ არის? თან მაშინაც გითხარით, რომ ლანჩხუთიდან გირეკავდით!
_ ვერაფერს გეტყვით, ასეთი გახლავთ ჩვენი ტარიფები!
ჩვენ აღნიშნულ თემაზე მუშაობას განვაგრძობთ და მკითხველს სხვა საეჭვო დეტალების შესახებაც მოვუთხრობთ.
