ჩვენი გაზეთის წინა ნომერში ვწერდით ოზურგეთის მუნიციპალიტეტის სოფელ მერიაში, მდინარე ნატანებთან გახსნილი კარიერის შესახებ. დღეს თემას განვაგრძობთ და “გურია ნიუსის” კითხვებს ბუნებრივი რესურსების სააგენტოს გურიის სამსახურის უფროსი ნიკოლოზ ნოზაძე პასუხობს.
_ ბატონო ნიკოლოზ, რამდენი კარიერია ოზურგეთის მუნიციპალიტეტის ტერიტორიაზე?
_ ოზურგეთის მუნიციპალიტეტის ტერიტორიაზე რეგისტრირებულია სულ 76 კარიერი.
_ აქედან რამდენია ლიცენზირებული?
_ ყველას აქვს ლიცენზია. ჩვენი მონაცემებით ასეა.
_ ანუ ყველაფერი წესრიგშია?
_ ზოგიერთს აქვს დარღვევა _ 76-დან დასაჯარიმებელი გვყავს 38 ლიცენზიანტი.
_ შეგიძლიათ, გვითხრათ, კონკრეტულად რა სახის დარღვევებზეა საუბარი და ვის ეხება ეს დარღვევები?
_ ეს არის ლიცენზიის პირობების დარღვევა. წინასწარ ვერ დავაკონკრეტებ.
_ მაშინ თქვენ დაგვპირდით, რომ გვაჩვენებდით შპს “ბლექ-სი გრუპის” ლიცენზიას.
_ “ბლექ-სი გრუპს” ნამდვილად აქვს ლიცენზია.
_ გვაჩვენეთ.
_ შემიძლია, გამონაკლისი დავუშვა და გაჩვენოთ ხელშეკრულება, რომელიც მაშინ გაფორმდა, როდესაც ლიცენზია გადაეცათ ოფიციალურად. ჩვენს სააგენტოს ჰყავს პრესსამსახური და თუ ასეთი კონკრეტული შეკითხვები გაგიჩნდებათ, შეგიძლიათ, დაუკავშირდეთ. სიმართლე გითხრათ, არ შეიძლება ის, რასაც თქვენ მთხოვთ. მოდის ჟურნალისტი და მეუბნება: _ მე ამ ლიცენზიის ნახვა მინდა და მაჩვენეთ. არ მაქვს მე ამის უფლება.
_ ჩვენ მიერ მოპოვებული ინფორმაციით, აღნიშნული შპს მხოლოდ ბრძანების საფუძველზე მუშაობს. ეს არ არის კანონდარღვევა? ეს იყო შპს “კახაბერი-2009”, რომელმაც გაყიდა კარიერი და ახლა მფლობელი არის შპს “ბლექ-სი გრუპი”, რომელიც ჩვენ მიერ მოპოვებული ინფორმაციით, ლიცენზიის გარეშე მუშაობს.
_ არ არის კანონდარღვევა. შეუძლია, იმუშაოს ბრძანების საფუძველზე. აქვს ამის უფლება. მე ეგ სპეციალურად ვიკითხე.
_ ესე იგი, კანონიერია?
_ კი.
_ ლიცენზიების გაცემა რამდენად უზრუნველყოფს გარემოს უსაფრთხოებას და თქვენ მიერ ტარდება თუ არა მონიტორინგი, მდინარეზე არსებული ხიდების მდგომარეობაზე? თუ შეუძლია მდინარეებს ნატანის ბუნებრივად შევსება და რამდენად მოახდენს ეს პროცესები გავლენას შავი ზღვის სანაპიროზე?
_ ბუნებრივი რესურსების სააგენტო ერთი თვეც არ არის, რაც ჩამოყალიბდა. იმიტომ გამოვაცხადეთ ვაკანსია მონიტორინგის სამსახურში _ აღარ გვყავს თანამშრომლები. ახლა ვიწყებთ ყველაფერს. არ გვყავს მონიტორინგის თანამშრომელი, რომ გავუშვათ იქ, ხომ ხვდებით, არა? ახლა ვატარებ კონკურსს იმიტომ, რომ მივიღო ის სპეციალისტები, რომლებიც ქვიშა-ხრეშის ამოღების ზიანის გაანგარიშებაზე მონიტორინგს გაწევენ.
_ მერიაში მოსახლეობას 50 ჰექტრამდე საყანე ფართობები წაართვა მდინარემ და საშიშროება კვლავ ემუქრებათ. შეიძლება, სასაფლაოც წაიღოს წყალმა. სოფელ ოზურგეთშიც, კიტა მეგრელიძის ქუჩაზეც იგივე პრობლემაა.
_ რადგან ლიცენზია არის გაცემული, თავისთავად, სპეციალისტების მიერაა შეფასებული ყველაფერი. დათვალიერებული და შესწავლილია ეგ ადგილები. ტყუილად ლიცენზიას არავინ გასცემდა. თუ ლიცენზია ისე გასცეს, რომ ტერიტორია შესწავლილი არ ჰქონდათ, ეგ უკვე სხვა მიმართულებაა და მკაცრად დაისჯებიან ისინი, ვინც ეს გააკეთა. დღესდღეობით არ ხდება, რომ ვიღაცამ ყალბი ლიცენზია გასცეს. მაგრამ კიდევ გეტყვით, რადგან ჩემი სამსახური ახლა ყალიბდება, მე როცა სპეციალისტებს მოვიწვევ და მონიტორინგის სამმართველო ჩამოყალიბდება, გავუშვებ ჩემს სპეციალისტებს ჯპს-ით (არის ასეთი დანადგარი), რომლებიც განსაზღვრავენ არის თუ არა სალიცენზიო პირობების დარღვევა, გადაცილებულია თუ არა თავის ტერიტორიას. მაშინ ის ორგანიზაცია თავისთავად დაჯარიმდება და ჯარიმასთან ერთად, ზარალის ანაზღაურებაც მოუწევს. ასეთ შემთხვევებში, დიდ ჯარიმებზეა საუბარი.
_ ანუ შეიძლება, ვივარაუდოთ, რომ შემოდგომაზე დიდი ჯარიმების სერია დაიწყება და მოსახლეობის მოთხოვნებს გაითვალისწინებთ?
_კი, აუცილებლად გავითვალისწინებთ მოსახლეობის მოთხოვნებს და შემოდგომაზე სერიოზული მუშაობა წავა. კიდეც გითხარით, რომ 38 ლიცენზიანტი უნდა დავაჯარიმო. ვეცდები, ძალიან მოკლე ვადებში აღმოვფხვრა ეს პრობლემები.
_ ალბათ, იცით, რომ კარიერები არსებულ ხიდებთან 20 კმ-ით უნდა იყოს დაშორებული. გარდა ამისა, ზიანდება ასფალტის საფარი, რკინიგზის გადასასვლელები და ა. შ.
_ გზის დაზიანების შესახებ, უკვე ვესაუბრე გამგეობის წარმომადგენელს, მითითებაც მივეცი, რომ მოდის კარიერიდან მანქანა და აბინძურებს გზას. უკვე ჯარიმებს უწერენ. ადრე ეს საქმე ეხებოდა გარემოს დაცვის ინსპექციას, ახლა თვითმმართველ ორგანოს უკვე შეუძლია, დააჯარიმოს და ოქმი ამოწეროს. ტვირთის მოცულობაზეც არის დაწესებული სტანდარტები, რომ გზა არ დაზიანდეს. მით უმეტეს, ზაფხულში მაღალი ტემპერატურაა და ასფალტის საფარი მეტად ზიანდება, ტალღოვანი ხდება.
“გურია ნიუსთან” საუბარში ექსპერტი რევაზ გეთიაშვილი ამბობს, რომ კარიერების თემა და პრობლემა სერიოზულია და ვიღაც კონკრეტული ადამიანებისა და კომპანიების ინტერესებს ეწირება მოსახლეობის ინტერესები, ზიანდება ინფრასტრუქტურა:
_ თუ ორგანიზაციას არ აქვს აღებული შესაბამისი ლიცენზია, მაშინ კანონდარღვევასთან გვაქვს საქმე. ლიცენზიები როგორ გაიცემა, ეს ცალკე საკითხია _ ისინი ძალიან ხშირად არასწორად გაიცემა. ქვიშა-ხრეშის არასწორი მოპოვების მავნე ზემოქმედება ძალიან ხშირია, ირღვევა ბუნებრივი პროცესი და იქ არსებული ტერიტორია მიაქვს მდინარეს. არ არსებობს ერთიანი საინფორმაციო ბაზა, რომ ქვეყანაში იყოს დადგენილი ადგილები, სადაც კატეგორიულად იქნება აკრძალული კარიერების ამუშავება.
