“გულისტკივილით აღვნიშნავთ ბოლო პერიოდში ენერგეტიკის სამინისტროს დაუმსახურებელ კრიტიკას სახელმწიფოსათვის მნიშვნელოვანი პროექტის – “ხუდონჰესის” ირგვლივ, თუმცა ესეც არ აღმოჩნდა საკმარისი და მას დაემატა სამინისტროს დადანაშაულება ამ საკითხთან დაკავშირებულ შეხვედრაზე უარის თქმაში.
ღიად ვაცხადებთ, სამინისტროს კარი ყოველთვის ღიაა ყველა მონაწილე მხარისთვის, როგორც “ხუდონჰესის” ასევე სამინისტროს ყველა სხვა აქტივობებთან დაკავშირებით შეხვედრების და დისკუსიების გასამართად. სოფელი ხაიშის მოსახლეობასთან დიალოგზე და კონსტრუქციულ დისკუსიაში მონაწილეობაზე სამინისტროს არასდროს უარი არ უთქვამს, და ჩვენთვის ამის მითითება უბრალოდ ზედმეტად მიგვაჩნია. ხაზი უნდა გაესვას იმას, რომ სამინისტრო და პირადად კახა კალაძე, სრულად იზიარებს ადგილობრივი მოსახლეობის წუხილს და უზრუნველყოფს ინვესტორთან თუ ხელისუფლებასთან მათი კანონიერი უფლებების დაცვას, რაც არაერთხელ გაჟღერებულა სამინისტროს წარმომადგენლების და თავად მინისტრის მხრიდან.
როგორც ყველასთვის ცნობილია, სახალხო დამცველი კანონით მისთვის მინიჭებული უფლებამოსილების ფარგლებში ავლენს ადამიანის უფლებათა და თავისუფლებათა დარღვევის ფაქტებს და ხელს უწყობს დარღვეული უფლებებისა და თავისუფლებების აღდგენას. შესაბამისად, ასეთი ფაქტების არარსებობის პირობებში, ან თუნდაც სათანადო წესით ასეთი ფაქტების დადგენამდე, სახალხო დამცველის მხრიდან საჯაროდ პოზიციის დაფიქსირება, მითუმეტეს სახელმწიფოებრივი მნიშვნელობის პროექტთან დაკავშირებით, უხერხულად მიგვაჩნია. უნდა აღინიშნოს, რომ ენერგეტიკის სამინისტრო პატივს სცემს სახალხო დამცველის ინსტიტუტს და მიგვაჩნია, რომ სახალხო დამცველის მიერ გაკეთებული თითოეული განცხადება და თითოეული დაფიქსირებული პოზიცია დიდი ყურადღების საგანია საზოგადოებისთვის და მეტ სერიოზულობას მოითხოვს. კიდევ ერთხელ უნდა ითქვას, რომ ენერგეტიკის სამინისტროში სახალხო დამცველის აპარატიდან შეხვედრის თხოვნა ოფიციალურად არ შემოსულა და სამინისტროს სახალხო დამცველთან და ადგილობრივ მოსახლეობასთან შეხვედრაზე უარი არ უთქვამს. გვსურს ახლაც გამოვხატოთ სურვილი და მზადყოფნა სახალხო დამცველთან შეხვედრების და კონსულტაციების გასამართად და ღრმად გვჯერა, რომ შევძლებთ მის დარწმუნებას იმაში, რომ კახა კალაძის უწყების მხრიდან ადამიანის უფლებების დარღვევას ადგილი არ ჰქონია. რაც შეეხება “ხუდონჰესის” პროექტის განხორციელების მიზანშეწონილობის და აუცილებლობის საკითხის განხილვას და გადაწყვეტას, იგი სცილდება სახალხო დამცველის უფლებამოსილების და კომპეტენციის ფარგლებს.” _ ნათქვამია განცხადებაში, რომელიც ენერგეტიკის სამინისტრომ დღეს გაავრცელა.
გუშინ სახალხო დამცველის მიერ გაკეთებულ განცხადებას საპასუხო წერილი მოჰყვა ხუდონჰესის ინვესტორი კომპანიის “ტრანს ელექტრიკას” მხრიდანაც.
“კომპანია “ტრანს ელექტრიკა ჯორჯია” თავიდანვე დაინტერესებული იყო თანამშრომლობით სახალხო დამცველის ოფისთან. სწორედ, ჩვენი კომპანიის ინიციატივით მოხდა ჩვენი შეხვედრა თქვენთან, რათა მოგვეწოდებინა სრული ინფორმაცია პროექტის განხორციელების შესახებ. აღნიშნულ შეხვედრაზე, რომელიც 2013 წლის 11 დეკემბერს სახალხო დამცველის ოფისში ჩატარდა, “ტრანს ელექტრიკა ჯორჯიას” წარმომადგენლებმა სახალხო დამცველს წარვუდგინეთ გარემოზე ზემოქმედების შეფასების ანგარიშის წინასწარი ვერსია და ასევე განსახლების სამოქმედო გეგმის პირველი ფაზის ანგარიში, (ეს ის ანგარიშებია, რაც კანონმდებლობით გათვალისწინებულია პროექტის განხორციელების ამ ეტაპზე). თუმცაღა, ჩვენს გაოცებას ნამდვილად იწვევს სახალხო დამცველის განცხადება, იმის შესახებ, რომ კომპანიას არ გააჩნია განსახლების გეგმა და კომპანია უარს აცხადებს ხაიშის მოსახლეობასთან შეხვედრაზე.”
გუშინვე, სახალხო დამცველის მიერ “გურია ნიუსისთვის” მიცემულ კომენტარს, სადაც ის პროექტის განხორციელების პროცედურებზე საუბრობდა, საპასუხო განცხადება მოყვა ენერგეტიკის მინისტრის მოადგილის, ხუდონჰესის პროექტის კოორდინატორის, ილია ელოშვილისგან, რომლის განცხადებითაც სახალხო დამცველი პროცედურებში ვერ ერკვეოდა და მისი პასუხი არაკომპეტენტური იყო.
უჩა ნანუაშვილის განცხადებით: “პირველ რიგში ხდება გარემოს ზემოქმედების შეფასება. თუ როგორ მოახდენს კონკრეტული ჰესის აშენება გარემოზე ზემოქმედებას. მომზადება ანგარიში, რომელიც საზოგადოებისთვის გაეცნობა. შემდეგ ხდება მშენებლობაზე ნებართვის მიღება. ბოლოს კი ხდება მემორანდუმის და ხელშეკრულების გაფორმება ხელისუფლებასა და ინვესტორს შორის. ჩვენთან ყველაფერი უკუღმა დაიწყო. ანუ არსებობს მხოლოდ ხელშეკრულება, მემორანდუმი სამინისტროსა და ინვესტორ კომპანიას შორის და არ არსებობს ქვემო რგოლები. ყველაფერი უკუღმა დაიწყო. სწორედ ეს არის იმის საფუძველი, რომ ამ საქმეში არის გარკვეული დარღვევები.”
ილია ელოშვილი: თქვენთვის მოცემულ ინტერვიუში ბატონი ნანუაშვილი აცხადებს, რომ ჯერ ხდება გარემოს ზემოქმედების შეფასება, თუ როგორ მოახდენს კონკრეტული ჰესის აშენება გარემოზე ზემოქმედებას. მომზადება ანგარიში, რომელიც საზოგადოებისთვის გაეცნობა. შემდეგ ხდება მშენებლობაზე ნებართვის მიღება. ბოლოს კი ხდება მემორანდუმის და ხელშეკრულების გაფორმება ხელისუფლებასა და ინვესტორს შორის.
სრული პასუხისმგებლობით ვაცხადებ, რომ მსოფლიოში არცერთი ჰესი არ შენდება ამ პრინციპით და არცერთი ინვესტორი არ მოქმედებს ამგვარი პრინციპით. აბსოლუტურად გაუგებარია, საიდან მოიტანა სახალხო დამცველის ოფისმა ამგვარი პრაქტიკა.
როგორ წარმოგიდგენიათ, ინვესტორი შევიდეს, დახარჯოს მილიარდობით დოლარი რაიმე პროექტზე და ეს გააკეთოს ისე, რომ არ იცოდეს, სხვა ინვესტორის მფლობელობაში ან სარგებლობაში ხომ არ არის ეს ობიექტი? ან რაიმე სხვა პროექტი ხომ არ მიმდინარეობს ამ ადგილას?
თუკი სახალხო დამცველის ოფისი დაინტერესებულია მართლა ობიექტურად გააშუქოს ეს პროცესი და არ იყოს მხარე ან ვინმეს გავლენის ქვეშ მოქცეული, მოვუწოდებთ მას, იქონიოს კომუნიკაცია ჩვენთან.”
