(გურია ნიუსი, ლანჩხუთი) _ პარასკევს, ლანჩხუთში, “ქრისტიან-დემოკრატების” ლიდერები: გიორგი თარგამაძე, გიორგი ახვლედიანი და ლევან ვეფხვაძე იმყოფებოდნენ და ორაგვისღელის უბნის მცხოვრებლებს შეხვდნენ. შეხვედრის დაწყებამდე, “ქრისტიან-დემოკრატების” ლიდერებმა ორაგვისღელის უბანში არსებულ სამრეკლოში ხატი დააბრძანეს, უბნის უხუცეს ადამიანს, ცნობილ პოლიგრაფისტს ჭოლა ჩხაიძეს საათი უსახსოვრეს, ხოლო რამდენიმე პატარას ბურთები გადასცეს. “ქრისტიან-დემოკრატების” ლიდერებმა საკმაოდ ვრცლად ისაუბრეს ქვეყანაში არსებული მდგომარეობისა და კრიზისული სიტუაციიდან თავის დაღწევის შესაძლებლობაზე. თუმცა, საუბრისას, ოპოზიციონერები ხშირად ახსენებდნენ, რომ მათ უსამართლოდ სდებენ ბრალს მმართველ პარტიასთან გარიგებაში.
_ ქვეყანაში საკმაოდ სერიოზული პრობლემებია და ამიტომ ვუწევთ ოპონირებას ხელისუფლებას, მაგრამ სამწუხაროდ, ჯერჯერობით ის ბერკეტი არ გაგვაჩნია, რომ მთავრობა დავაკომპლექტოთ. ჩვენს პარტიას შეუძლია ცუდიც დაინახოს და კარგიც; ამიტომაც, ხშირად გვეძახიან “ნაციონალებთან” ხართ ახლოსო. ეს ასე ნამდვილად არ არის. კარგია, რომ კრიმინოგენული სიტუაცია დასტაბილურდა, მაგრამ სამაგიეროდ, ჩვენისთანა პატარა ქვეყანას 24 ათასი პატიმარი ჰყავს. პირველ რიგში, უნდა მოხდეს სასამართლოს გამიჯვნა პოლიციისგან _ სწორედ აქედან უნდა დავიწყოთ ქვეყნის შენება, _ ითქვა შეხვედრაზე.სტუმრებმა ყურადღება გაამახვილეს განათლების სისტემაში მიმდინარე რეფორმის ხარვეზებზე. “ქრისტიან-დემოკრატებს” მიაჩნიათ, რომ ტურიზმი, სოფლის მეურნეობის გაძლიერების გარეშე, ვერ განვითარდება და საკუთარ დამსახურებასაც გაუსვეს ხაზი:
_ სოფლის მეურნეობის მხარდაჭერის პროგრამისთვის წელს გაცილებით მეტი თანხაა გამოყოფილი, ვიდრე გასულ წელს იყო. მომავალში ვფიქრობთ, რომ ეს თანხა 80 მილიონამდე გაიზრდება. ამაში დიდი წვლილი ჩვენ მიგვიძღვის და ვამაყობთ კიდეც.
ფასების მატებასა და გაძვირებაზე საუბრისას, სტუმრებისგან “ნაციონალური მოძრაობის” საარჩევნო სლოგანის: “გასაკეთებელი კიდევ ბევრია”, ახალი პერიფრაზიც მოვისმინეთ _ “გასაძვირებელი კიდევ ბევრია!” ბოლოს, პოლიტიკოსებმა საზოგადოებას ურჩიეს, რომ ხელისუფლებას წინასაარჩევნო დაპირებები ხშირად შეახსენონ.
როგორც ჩანს, წინასაარჩევნო მარათონი გურიაში უკვე ოფიციალურად გაიხსნა.
