პროკურატურის ინფორმაციით, საქმე 1 100 000 ლარს ეხებოდა და თუკი მართლაც ჰქონდა გარიგებას ადგილი, მარტო გასულ წელს, კურღელაშვილს ტაკიძისთვის 360 000 ლარი უნდა მიეტანა. დასუფთავების სამსახურის ყოფილი უფროსის თქმით, მან მხოლოდ 20 000 ლარი მიუტანა ტაკიძეს, რაც, ბუნებრივია, ბევრ კითხვას ბადებს. ტაკიძეს თავისუფლად შეეძლო კურდღელაშვილისთვის პრობლემები შეექმნა და მინიმუმ სამსახურიდან გაეშვა, მით უმეტეს, რომ მან “დავალება” ვერ შეასრულა და მოთხოვნილი ქრთამი სრულად არ გადაიხადა. პროკურატურა არ ადასტურებს თუ რატომ ვერ, ან არ გადაიხადა კურდღელაშვილმა დანარჩენი თანხა და რატომ დუმდა ამის შესახებ გამგებელი, რომელსაც, ფინანსებს, კანონის თანახმად, ზემდგომი _ საკრებულო უმტკიცებს. საკრებულოს თავმჯდომარე, ალეკო მამეშვილი “გურია ნიუსთან” საუბარში ამბობს, რომ ფინანსების შემოწმება ხდებოდა.
კურდღელაშვილის ჩვენებაში ბევრი უზუსტობაა, რომელსაც იურისტები და ტაკიძის კოლეგები ღიად უსვამენ ხაზს. ყველა თანხმდება ერთზე _ გამგებელი აიპ-ს ხელშეკრულებას არ უფორმებს. თუმცა, კურდღელაშვილი მაინც ამ ჩვენებას “აწვება”. აღსანიშნავია ისიც, რომ ტაკიძესთან ერთად დაკავებული კურდღელაშვილი უკვე თავისუფალია. როგორ შევიტყვეთ, იგი ხელმეორედ, ჩვენების ვიდეოჩაწერისთვის მიიყვანეს პროკურატურაში. ჩვენი წყაროს ინფორმაციით, ამჟამად მერაბ კურდღელაშვილი თბილისში, ახლობლის სახლში იმყოფება და ჟურნალისტებთან კონტაქტზე არ გამოდის.
პროკურატურა საქმის ძიებას განაგრძობს. როგორც ჩვენთან პირად საუბარში ერთ-ერთმა ძალოვანმა მაღალჩინოსანმა აღნიშნა, არ არის გამორიცხული, ტაკიძემ ძიება სხვა კვალზე გაიყვანოს, კვალზე, რომელსაც გამოძიება კარგა ხანია ჩაუსაფრდა. ჩვენ მიერ მოპოვებული ინფორმაციით, გამგებელმა უკვე მისცა ჩვენება, თუმცა, არ ვრცელდება ინფორმაცია, რას ჰყვება ტაკიძე. ჩვენებაში, კომპეტენტური წყაროს ცნობით, პროკურატურა მას გარიგებას სთავაზობს. სასჯელს შეუმცირებენ და არ არის გამორიცხული პირობითი მსჯავრი, საპროცესო გარიგების შესაბამისად შეუფარდონ, ოღონდ იმ პირობით, თუ ის იმ ადამიანებს დაასახელებს, რომლებიც “წილში ჰყავდა”.
ტაკიძე რომ ამ საქმეში მარტო ვერ იქნებოდა, ფაქტია. მისი თანამშრომლების თქმით, ყოველი დოკუმენტის გაფორმებისას, გიორგი ტაკიძე ძალიან ფრთხილი და დაკვირვებული იყო. სწორედ ამიტომ უჭირთ მისი კორუმპირებულობის დაჯერება. ოზურგეთის გამგეობაში იმასაც ვერ იჯერებენ, რომ თუკი ამხელა თანხა “ტყდებოდა”, როგორ ახერხებდა ტაკიძე ამას დამოუკიდებლად, ზემდგომთან შეთანხმების გარეშე. როგორც ჩვენი წყარო ამბობს, ტაკიძე ძალიან მძიმე ვითარებაშია და მისი მორალურად გატეხვა ყოველ წუთსაა მოსალოდნელი. ჩვენი წყარო არც იმას გამორიცხავს, “გიორგი ტაკიძემ, იმის მოლოდინში, რომ უპატრონებენ, ჭკუა იხმაროს და არაფერი თქვას”. მას 15 წლამდე თავისუფლების აღკვეთა ემუქრება.
გურიაში ეს პირველი კორუფციული სკანდალი არ არის, გასული წლის სექტემბერში პროკურატურამ ჩოხატაურის მუნიციპალიტეტის საკრებულოს მმართველი ფრაქციის თავმჯდომარეზე, შოთა სირაძის წინააღმდეგ სისხლის სამართლის საქმე აღძრა. საქმე ასობით ყალბი დოკუმენტის გაცემას ეხება. სირაძემ მიმალვა მოასწრო. ჩვენი წყარო ამბობს, რომ კი არ მოასწრო _ მოასწრებინეს. მისივე თქმით, ჩოხატაურის მუნიციპალიტეტის ხელმძღვანელობამ, საფრთხე მაშინ იგრძნო, როცა პროკურატურამ ლეგალიზაციის კომისიის დოკუმენტაცია წაიღო შესასწავლად.
_ როცა სირაძეს უწყება მოუვიდა, ის უკვე ჩოხატაურში აღარ იყო, _ ამბობს ჩვენი წყარო.
სირაძის სასამართლო პროცესი ჯერ არ დასრულებულა. უნდა ითქვას, რომ ამ საქმეში ბევრი კითხვის ნიშანია. ბევრ ეჭვს ისიც ბადებს, რომ პირველივე სხდომაზე პროკურატურამ საპროცესო გარიგების შეთავაზება გააკეთა, თან მიზერულ თანხად _ 5000 ლარად. მიუხედავად ამისა, სირაძე არ გამოჩენილა. როგორც წყარო ამბობს, ეს ერთგვარი “ხაფანგია” და სირაძის თანამზრახველები არც ისეთი ჭკუასუსტები არიან, რომ ამ ანკესს წამოეგონ. მეორე წყარო კი ირწმუნება, რომ ყველაფერი “ზემოთაა” დაგეგმილი და სირაძე არსადაც არ გადაკარგულა _ მას არც კი ეძებენ და უბრალოდ, ურჩიეს, სასურველ დრომდე თვალს მიფარებოდა.
_ ეს დიდი კორუფციული სქემა იყო. ერთი ადამიანი ვერ შეძლებდა ასობით ყალბი დოკუმენტი გაეცა. ყველაფერი დღისით, მზისით ხდებოდა. სირაძის კომისიას ხომ ზედამხედველები ჰყავდა?! მის ანგარიშებს ხომ საკრებულო ისმენდა?! ამიტომ, აბსურდია იმის მტკიცება, თითქოს სირაძემ ეს ყველაფერი მარტომ გააკეთა. ეს რომ ასე ყოფილიყო, საპროცესო გარიგებაზე წამოვიდოდა. სავარაუდოდ, სირაძე წამოვა კიდეც, მაგრამ არ ანებებენ, რადგან ამ გარიგებას აღიარებითი ჩვენება და იმ ადამიანების დასახელება მოჰყვება, რომლებიც თვეების განმავლობაში სირაძეს “მწვანეს” უნთებდნენ. ეს მარტივი არითმეტიკაა, _ ამბობს ჩვენი წყარო.
პროკურატურასთან დაახლოებული პირი ამტკიცებს, რომ ის რაც სირაძესთან არ გამოუვიდათ, გამოუვათ ტაკიძესთან:
_ თუმცა, მოულოდნელი არაფერი არ უნდა იყოს. თავიდან ყველას ეგონა, რომ სირაძის საქმე ბომბს ააფეთქებდა, მაგრამ როგორც ჩანს, ჯერ ამის დრო არ არის _ მერაბიშვილს არ დავიწყებია მისი თანამშრომლების სამსახურიდან გათავისუფლება. ნურც იმას დაივიწყებთ, რომ მაშინ, ადეიშვილმა მერაბიშვილს საკუთარი სიძლიერე დაუმტკიცა. დარწმუნებული იყავით, რომ ეს ყველაფერი მალე აფეთქდება. ბევრი ადამიანი ზის ნაღმზე, რომელსაც საკუთარი საჯდომით ინახავს _ ერთი წაბორძიკება და ყველაფერი დასრულდება! _ მიაჩნია ჩვენს წყაროს.
ჩვენი ინკოგნიტო რესპონდენტი დარწმუნებულია, რომ ტაკიძის ამბავი ვალერი ჩიტაიშვილს არ შეეხება და ის თანამდებობას მაინც შეინარჩუნებს, რადგან ჩიტაიშვილი, რამაზ ნიკოლაიშვილს, როგორც “კარგი შემსრულებელი”, ჯერ კიდევ სჭირდება _ წინ ხომ არჩევნებია! თუმცა, ფაქტი ერთია _ ბოლო ერთ წელიწადში განვითარებულმა მოვლენებმა ცხადჰყო, რომ გურიაში თანამდებობებზე, კორუმპირებული ან კორუფციაში ეჭვმიტანილი ადამიანები ინიშნებიან. მათი დამნიშვნელები, მათ საქმიანობაზე კანონის ძალით ზედამხედველები კი, მხოლოდ მხრებს იჩეჩენ _ ჩვენ არაფერი ვიცოდითო და… მუშაობას “ჩვეულ რიტმში” აგრძელებენ.
