2011 წლის 4 აგვისტოს, ოზურგეთის მუნიციპალიტეტის გამგებლის ქრთამის აღების ბრალდებით დაკავებამ საზოგადოება შეაშფოთა. მძვინვარებს თუ არა ჩვენს ქვეყანაში ელიტარული კორუფცია? გაბედავდა თუ არა ოზურგეთის ახალგაზრდა გამგებელი, გიორგი ტაკიძე მარტო, დამოუკიდებლად ბიუჯეტში ხელების ასე თამამად ფათურს? მართლა კაბინეტში დაბარებულ ხელქვეითს ევაჭრებოდა მუნიციპალიტეტის პირველი ჩინოვნიკი და ქრთამს სთხოვდა? რატომ მაინცადამაინც ახლა? ააგეს თუ არა რაღაც ვერტიკალი, რითაც მთავარ დასაჭერს უმიზნებენ? ეს ის ქვეყანა არ არის, რომლის პრეზიდენტიც ყოველდღიურად გვიჩიჩინებს, რომ ჩვენთან კორუფცია აღარ არსებობს? _ კითხვებს სვამს და დასკვნა გამოაქვს სამოქალაქო საზოგადოებას, რომელიც ამ ფაქტს სწორედ ელიტარული კორუფციის გამოვლინებად მიიჩნევს.
თამაზი, 49 წლის: _ ეს სირცხვილია და არა მარტო ტაკიძისთვის. თეთრი ძაფით ნაკერია ყველაფერი. პირველ რიგში, გამიჩნდა აზრი _ რატომ მაინცადამაინც ამ სამსახურს მოექცნენ ასე? მათ, იქნებ, ჰგონიათ, რომ საზოგადოებამ არ იცის, დანარჩენ სამსახურებთანაც რომ იგივე გარიგებებია? “ატკატებს” ზოგს 35%-იანი წილის სახით სთხოვენ და ზოგსაც, შედარებით ნაკლები _ 15%-ის ოდენობით. ამაზე საუბარი საზოგადოებაში ღიად მიდის. გამგებლის თანამდებობა ის ადგილი არ არის, რომელიც ბოლო მისამართია და თანხა მხოლოდ იქ უნდა დაილექოს. ჩნდება საფუძვლიანი ეჭვი, რომ ეს მიზანმიმართული ოპერაცია იყო. გაგრძელდება თუ არა სხვა ორგანიზაციებშიც მსგავსი ფაქტების გამოვლენა? ჩემი აზრით, ეს არის შუალედური მსხვერპლშეწირვა, დიდი მსხვერპლის ასაყვანად.
გრამიტო, 64 წლის: _ ახლა ამბობენ, რომ დასუფთავების სამსახურის უფროსს “მკვდარი სულები” ჰყავდა და ამ კუთხითაც დიდ ფულს “ტეხდნენო”. მე არ ვიცი, ასე იყო თუ არა, მაგრამ იმას კი ვიტყვი, რომ გოგოლის თუ კომუნისტების პერიოდს, როცა მკვდარი სულები თუ მაოხარი გზირები არსებობდნენ, მომხვეჭელობით ამ ხელისუფლებამ ძალიან გაუსწრო. რომელ სფეროში არ არის “ატკატი”?
ლალი, 38 წლის: _ მე ვერ დავეთანხმები იმათ, ვისაც ტაკიძის კორუმპირებულობის სჯერათ. იგი არის “განტევების ვაცი”. ჩემი აზრით, კურდღელაშვილის ჩვენება ადასტურებს, რომ ტაკიძე საბოლოო წერტილია. თუ ამას მოჰყვება საკრებულოს თავმჯდომარის და გუბერნატორის პასუხისმგებლობის საკითხი, მაშინ დაიჯერებს სამოქალაქო საზოგადოება, რომ ქვეყანაში მართლაც მიდის კორუფციის წინააღმდეგ უკომპრომისო ბრძოლა.
თამუნა, 40 წლის: _ კორუფციის სათავე არის ზემოთ, მაღლა და მაღლა. ერთ-ერთი სახეა ტაკიძე. ისე კი, რაც ახლა მოხდა, არის რამაზ ნიკოლაიშვილის დროინდელი მუშაობის შედეგი, მისი სტილისა და მმართველობის გამოძახილი.
გოგი, 46 წლის: _ ახლა საშიში დროაო, რომ ამბობენ, ტყუილია _ ახლა უშიშთა და ურცხვთა დროა. ამდენ ქრთამს რომ იღებ, უშიშარი და უცხვირპირო არ ხარ? თუ არ აუღია და ისე აბრალებენ, როგორც ზოგი ამბობს, მაშინ ის დამბრალებლები არ არიან უშიშარი ურცხვები? კლასიკური თავხედობაა, როცა მუნიციპალიტეტის პირველი პირი საკუთარ კაბინეტში კორუფციულ გარიგებას აწარმოებს.
სერგო, 78 წლის: _ მე მიყვარს მიშა, ამ პენსიას მას ვუმადლი, შევარდნაძის დრო შავად მახსენდება _ თვეობით პენსიას ვერ ვიღებდი, ჩაი და პური მენატრებოდა. ამ ბაღანამ პრეზიდენტი შეარცხვინა და ხეხოს ახლა ციხის კედლები. ცოდვა კი არის, მარა, დალოცვილო, რამ გაგამწარა?! ხელფასი დიდი გაქვს, ბენზინი არ გაკლია და ტელეფონის ფულს შენ არ იხდი, რით ვერ გაძეხი? თუ ვინმე გაიძულებდა შენი სინდის-ნამუსის წინააღმდეგ წასვლას, რატომ არ დატოვე იქაურობა და არ გამოიქეცი? ასეთ სახელს, თუ კაცი გქვია, ცივი ჭადის ჭამა არ გერჩივნა? არ ვიცი, რა დავარქვა ამ ყველაფერს!
