(გურია ნიუსი, ლანჩხუთი) _ აკეთის მაცხოვრის სახელობის ეკლესიის აღდგენის შესახებ საუბარი კარგა ხანია მიმდინარეობს. ჯერ კიდევ 1986 წელს საქართველოს ძეგლთა დაცვის სამსახურმა მიიღო გადაწყვეტილება, ეკლესიას რესტავრაცია ჩატარებოდა. შეიქმნა კიდეც პროექტი, სამუშაოებიც დაიწყო, გასუფთავდა და გაიწმინდა მიმდებარე ტერიტორია, მაგრამ 90-იანი წლების ცნობილმა მოვლენებმა სამუშაოების დასრულებას ხელი შეუშალა.
ორი წლის წინ, ეკლესიის პროექტის შედგენისათვის თანხა ლანჩხუთის მუნიციპალიტეტის ადგილობრივმა ხელისუფლებამ გამოყო. პროექტი საპატრიარქოს არქიტექტურულ საბჭოზე მოიწონეს და დაამტკიცეს კიდეც.
შეიქმნა მაცხოვრის ეკლესიის აღმდგენი საბჭო, რომლის თავმჯდომარე წარმოშობით აკეთელი, ყოფილი პარლამენტარი, მურმან ქურიძეა.
ამ რამდენიმე დღის წინ, სწორედ მისი თაოსნობით უჩვეულო გამოცოცხლება სუფევდა ეკლესიის ეზოში _ თანასოფლელებთან ერთად ისიც მუშაობდა ეკლესიის ჭიშკრისა და ღობის მოსაწყობად.
როგორც მურმან ქურიძემ გვითხრა, მისთვის დიდი ზეიმია აკეთში ჩამოსვლა: _ ჯერ ჩვენი კუთხე უნდა გვიყვარდეს ძალიან. სწორედ აქედან იწყება საქართველოს სიყვარული, ამიტომ, ყოველთვის დიდი სიხარულით ჩამოვდივარ მშობლიურ სოფელში. მინდა, რომ ამ წმინდა ადგილას ისევ ისევ აღდგეს წირვა-ლოცვა, ისმოდეს გალობა და ამისთვის ყველაფერს გავაკეთებ. ეზოში მოეწყობა ადგილი, სადაც 28 აგვისტოს, მარიამობის დღესასწაულზე დავასვენებთ მაცხოვრის ხატს, რომელიც უწმინდესმა და უნეტარესმა, კათალიკოს პატრიარქმა ილია მეორემ აკურთხა და დღესდღეობით ჩემ ოჯახში ინახება. მენანება ამ სიწმინდესთან განშორება, თუმცა, მისი ადგილი ამ ეზოშია.
ლანჩხუთის მუნიციპალიტეტის გამგებელმა გიორგი გოგუაძემ მადლობა გადაუხადა მურმან ქურიძეს ამ საშვილიშვილო საქმეში სულის და გულის ჩადებისთვის, სოფლის თანადგომისთვის და აღნიშნა, რომ ყოველ ასეთ კარგ წამოწყებაში ადგილობრივი ხელისუფლება მუდამ მათ გვერდით იქნება.
იქ მომუშავე 25 აკეთელს გამგებელმა სამახსოვრო საჩუქრები გადასცა.
ვისაც სურს, ფინანსური წვლილი შეიტანოს აკეთის მაცხოვრის ეკლესიის აღდგენის საქმეში შეუძლია მაგთიდან, ჯეოსელიდან და ბილაინიდან დარეკონ 700 610-ზე.
