ირმას სამხატვრო აკადემია აქვს დამთავრებული. ამბობს, რომ ხატვა მისთვის მხოლოდ ჰობი არ არის, მაგრამ ცდილობს, მხოლოდ ერთი ხელოვანის შემოქმედებით არ შემოიფარგლოს…
“ერთი კონკრეტული ნამუშევარი არ მაქვს, ჩემთვის არსებობენ ისეთი შემოქმედებითი ადამიანები რომლებსაც დიდ პატივს ვცემ და ვისგანაც დიდი დოზით ვიღებ ინსპირაციას. გამოვყოფ ლეონარდოს, ყველა დროის გამორჩეულ “ანატომისტს”, სწორედ მან შემაყვარა ხატვა. მახსოვს, ბავშობაში ხშირად ვათვალიერებდი მისი ნამუშევრების კატალოგს და ვცდილობდი მასავით სუფთა შტრიხი გადმომეცა, თუმცა ეს არ საზღვრავს ჩემს შეხედულებებს და არ ქმნის “ბარიერს” იმისთვის, რომ ისეთივე ინტერესით ვადევნო თვალი თანამედროვე ხელოვნებას და “არტისტებს”.
ამ ბოლო დროს, მიჭირს ადამიანს, რომელიც ხელოვნების სფეროში მოღვაწეობს, ვუწოდო მხოლოდ მხატვარი, რადგან, თანამედროვე ხელოვნება ითხოვს ძალიან ბევრ სფეროში ჩართულობას და არსებულ პრობლემებზე პასუხის გაცემას. ზოგადად, ვცდილობ მარტო ერთის შემოქმედებით არ შემოვიფარგლო. ძალიან მაინტერესებს, რა ხდება ჩემს ირგვლივ და როგორ მოქმედებს ეს ყველაფერი ჩემს მსოფლმხედველობაზე. შემიძლია გამოვყო რამდენიმე, ვისი შემოქმედება ჩემთვის ყველაზე ახლოა. და მაინც, ამ სიაში პირველს შევიყვანდი “არტისტ” AI WEIWEI-ს თავისი “მზესუმზირებით” და პროექტით “NEVER SORRY” . რომელიც შლის საზღვრებს ხელოვნებასა და პოლიტიკას შორის, JEFF KOONS “Celebration series” და კიდევ გამოვყოფდი იაპონელ ნეოპოპის მიმდევარს Takashi Murakami – ის თავისი “საყვარელი” პოკემონი პერსონაჟებით.
_ ყველაზე დიდი სირთულე რა არის თქვენს სფეროში, დამკვეთი მხოლოდ გამზადებულ მასალას ხედავს…
_ ყველაზე დიდი სირთულე… დავფიქრდები, რომელი ერთი გამოვყო რადგან ძალიან ბევრი სირთულეა ჩემს სფეროში. პირველ რიგში, ეს არის შემთხვევა როდესაც “დამკვეთი” ვერ ერკვევა შენი მუშაობის სტრუქტურაში და ყველაფერი ძალიან მარტივად ეჩვენება. აქვე მოვიყვან ერთ მაგალითს, რომელიც უფრო კარგად ახსნის რას ვგულისხმობ. წარმოიდგინეთ სიტუაცია, როდესაც ნახევარ საათში გთხოვენ ისეთი ვიზუალის აწყობას რომელიც არარეალური გეჩვენება და რომლის ასაწყობად საჭირო მასალის 100% -დან მხოლოდ 30 % გაქვს, დანარჩენი შენი წარმოსახვის ნაყოფი უნდა გახდეს, მაგრამ აქ კიდევ ერთი პრობლემაა, არსებობს ისეთი ვიზუალი როგორიცაა ბანერი ან პოსტერი სადაც დიდი ყურადღება ექცევა გამოსახულებას, რომლის შემადგენელი და წამყვანი მხარეა “ფოტოგამოსახულება”, რომელსაც დიზაინერი ვერანაირად “ააწყობს”. საბოლოო ჯამში, ეს ყველაფერი აისახება შემოქმედებით პროცესზე და მიღებული პროდუქტის ხარისხზე.
_ სამხატვრო აკადემია დაამთავრეთ და კარგად ხატავთ, არის თუ არა ეს უპირატესობა თქვენს საქმიანობაში?
_ რაც თავი მახსოვს, ყოველთვის ვხატავდი და ყოველთვის მინდოდა “მხატვრობა”. ხატვის მიმართ ინტერესი ბავშვობიდან მქონდა, მართალია ყველა ბავშვი ასე თუ ისე ხატავს, მაგრამ ჩემს შემთხვევაში სხვანაირად იყო ყველაფერი. როგორც დედაჩემი მიყვება, 2 წლიდან უკვე მაძლევდა აკვარელებს და ფუნჯებს სახატავად. ეს იყო ჩემთვის ყველაზე დიდი ბედნიერება. ამიტომ, არავის გაკვირვებია როდესაც 7 წლის ასაკში ჩემი დაჟინებული თხოვნით მიმიყვანეს სახელმწიფო სამხატვრო სასწავლებელში, რომელიც მოიცავდა 10 წლიან სწავლებას. იქ უკვე საბოლოოდ დავრწმუნდი იმაში, რომ ეს ის სფეროა, სადაც განვაგრძობდი პროფესიულ ზრდას. სასწავლებელი დავამთავრე გრაფიკის განხრით, შემდგომ ჩავაბარე აკადემიაში, თავიდან ძალიან ბევრს ვფიქრობდი სპეციალობაზე და საბოლოოდ, ავირჩიე მედიახელოვნების ფაკულტეტი გრაფიკული დიზაინის მიმართულებით, რადგან ის ყველაზე მეტად აკმაყოფილებდა დღევანდელობას და დიდი ინტერესი მქონდა მეცადა ჩემი თავი სხვა განხრაში. ამიტომ ჩემთვის ბევრი რამ უფრო ადვილია და ასე ვთქვათ “მაუსი” უკეთ მემორჩილება. აქედან გამომდინარე, დანამდვილებით შემიძლია ვთქვა, რომ ხატვა ძალიან მიადვილებს მუშაობის პროცესს, აუცილებელია სამუშაოს პარალელურად აკეთო ბევრი ჩანახატი, ამ დროს შეიძლება თავში მოგივიდეს უამრავი იდეა, რომელსაც ვერასდროს ჩაანაცვლებს ტექნიკა.
_ რა სიახლეებია 2014 წელს დიზაინის სფეროში?
_ სიახლე მუდმივი პროცესია დიზაინის სფეროში. ძირითადად გამოვყოფდი შემდეგ კრიტერიუმებს რაც ჩემი აზრით უპასუხებს 2014 წლის ტენდენციებს. ეს არის ბრტყელი გამოსახულება, სადა დიზაინი და გაფორმება, ჩვენ ირგვლივ არსებული საგნები დღითიდღე იხვეწება და იქმნება ახალი ფორმები. ამიტომ ყურადღება უნდა მიექცეს კონტურს და ამ კონტურის სისუფთავეს, რომ ის იყოს ლაკონური და მარტივად აღსაქმელი.
მინიმალიზმიც აქტუალურია. ასევე დიდი მნიშვნელობა ენიჭება ტიპოგრაფიას, როგორც გამოსახულების განუყოფელ ნაწილს, რის მეშვეობითაც შეგვიძლია გადმოვცეთ ფორმა, ან მთლიანი დიზაინი ავაწყოთ მხოლოდ მასზე დაყრდნობით. ფერი უნდა იყოს კონტრასტებზე აწყობილი, მკვეთრი რაც მიიპყრობს ყურადღებას. აქტუალურია ვარდისფერი ტონალობები. ხშირად გამოიყენება ორი ფერის სქემა, შედეგად ვიღებთ უფრო მარტივ დიზაინს, ამ მეთოდით შეგვიძლია, ასევე მეტი დრამატულობა შევძინოთ გამოსახულებას.
_ რა რჩევას მისცემდი დამწყებ დიზაინერებს?
ჩემი რჩევაა… როდესაც დაეუფლები რაიმე ახალს, არ გაჩერდეთ ამაზე და სხვა სიახლის ძებნას შეუდექით. თვალი ადევნეთ ახალ ტენდენციებს. რაც უნდა მონოტონურად მოგეჩვენოთ თქვენი სამუშაო პროცესი, იყავით ოპტიმისტურად განწყობილი, რადგან დიზაინის სფეროს არ გააჩნია “სტერეოტიპები” და თქვენ თამამად შეგიძლიათ შექმნათ რაიმე ახლი და განსხვავებული. მაგრამ ამასთან, საჭიროა დიდი შრომა, რომ სასურველ შედეგს მიაღწიოთ.
(ნახატის ავტორი: ირმა შონია)
