“ქრისტიან-დემოკრატების” ლიდერი, გიორგი თარგამაძე გურიაში სოფლის მცხოვრებლებთან შეხვედრას განაგრძობს. ამჯერად ის, თანაპარტიელებთან ერთად, ოზურგეთის მუნიციპალიტეტის სოფლების _ თხინვალისა და მელექედურის მცხოვრებლებს შეხვდა. ეს ის სოფლებია, რომლებსაც “ქრისტიან-დემოკრატი” მაჟორიტარი დეპუტატი ჰყავთ მუნიციპალიტეტის საკრებულოში. სოფლებს ძირითადად ერთნაირი პრობლემები აქვთ _ მოშლილია გზები, არ აქვთ წყალი, მოსახლეობა დაუსაქმებელია, სოფლის ახალგაზრდობის ნაწილი სამუშაოდ თურქეთშია გახიზნული.
მოსახლეობასთან შეხვედრისას, გიორგი თარგამაძემ ქართული სოფლის პრობლემების შესახებ ისაუბრა: _ ქართულ სოფელში წლების კი არა, შეიძლება ითქვას, ათწლეულების განმავლობაში ბევრი პრობლემაა დაგროვილი. მთავარი პრობლემა არის ის, რომ დღეს სოფელში მცხოვრებ ადამიანს პერსპექტივის განცდა არ გააჩნია, სახელმწიფოს არ აქვს ქართული სოფლის აღორძინების და განვითარების გრძელვადიანი, კარგად გათვლილი და დამაჯერებელი გეგმა. ეს პრობლემა უნდა აღმოიფხვრას. ჩვენ ხალხს უნდა ვესაუბროთ და ეს გეგმა მათივე პრობლემიდან გამომდინარე უნდა ჩამოვაყალიბოთ და დავიწყოთ მისი გახორციელება, _ თქვა ქრისტიან-დემოკრატების ლიდერმა.
სოფელ თხინვალის მეოთხე ბრიგადის მცხოვრებლებს ყველაზე მეტად წყლის პრობლემა აწუხებთ:
_ კილომეტრებიდან ვეზიდებით წყალს მანქანით. ერთი თვის წინ აღებულ წყალს რომ დალევ, რა ჯანმრთელობა შეგრჩება? გარდა უწყლობისა, სოფელში კიდევ ბევრი პრობლემაა _ ვერ მოხერხდა “ენერგო-პრო ჯორჯიასა” და მოსახლეობას შორის ხელშეკრულების გაფორმება _ ხან ზედმეტი 4 ლარი მაქვს გადასახდელი და ხან _ 8. ისინი არაფერს არ იღებენ თავის თავზე, ყველაფერი, თურმე, აბონენტმა უნდა იკისროს. სოფელი მეწყერულ ზონაში მდებარეობს. გვთავაზობდნენ საცხოვრებელ ადგილს წალკაში, მაგრამ უარი ვთქვით _ აქ დავიბადეთ, გავიზარდეთ და აქ გვინდა დავრჩეთ სიცოცხლის ბოლომდე, _ გულისტკივილი გაუზიარა მოსახლეობამ გიორგი თარგამაძეს.
მათივე თქმით, სოფლიდან სამუშაოდ თურქეთში არამარტო კაცები და ახალგაზრდები, ქალებიც დადიან, რათა ოჯახები შეინახონ.
სოფელ მელექედურში, ერთ-ერთმა ქალბატონმა შეკითხვაზე _ რა პრობლემები აქვს სოფელს, გვიპასუხა: _ გეკითხათ, რა პრობლემა არ არისო _ სოფელი პრობლემებშია ჩაფლული. ისეთი გზაა, ბავშვები სკოლაში რომ წავლენ, შენობაში არ შეისვლებიან. საბავშვო ბაღი გადაიტანეს სადღაც გადაკარგულ ადგილზე; ეკლესიის მშენებლობა შეჩერებულია, გაზი და წყალი არ არის, ეკონომიურად ძალიან გვიჭირს. არაფერი აქ არ კეთდება. მივმართეთ ხელისუფლებას, მაგრამ შედეგი არ ჩანს.
_ რამდენი წელია საუბარია, რომ სასაფლაო შეიღობებოდა, მაგრამ დღემდე არაფერი გაკეთებულა. ახლა დაიწყეს რაღაც ღონისძიებები ამ პრობლემის გადასაჭრელად და იმედია, ბოლომდე მიიყვანენ საქმეს.
შეხვედრების დასასრულ, “ქრისტიან დემოკრატებმა” სოფლებს სამახსოვრო საჩუქრები გადასცეს, თხინვალის ეკლესიას მაცხოვრის ხატი შესწირეს, თხინვალელ და მელექედურელ ბავშვებს კი რამდენიმე ბურთი უსახსოვრეს. გიორგი თარგამაძე თხინვალის მცხოვრებლებს შეჰპირდა, რომ ეკლესიის საბოლოო სახის მიღებაში პარტია საკუთარ წვლილს შეიტანს.
