სოფელ შრომის მცხოვრებლებმა “გურია ნიუსის” ოზურგეთის განყოფილებას განცხადებით მიმართეს და დახმარება სთხოვეს. განცხადებას სოფლის 50 მკვიდრი აწერს ხელს.
“მოგეხსენებათ, რომ საქართველოს პრეზიდენტმა 2013 წელი გამოაცხადა ქვეყნის ეკონომიკური გარდატეხის თარიღად, თან მთელი საქართველოს მასშტაბით, ყველგან ახალ გზებს, წყალმომარაგებას, 24-საათიან ენერგომომარაგებას და უმუშევრობის 16%-იდან 10%-მდე შემცირებას დაგვპირდა.
შესაძლებელია, ასეც მოხდეს, მაგრამ ეს არამც და არამც არ ეხება და არც შეეხება ოზურგეთის მუნიციპალიტეტის 1450-კომლიან, წლების მანძილზე მივიწყებულ, უპატრონოდ დარჩენილ, მაგრამ ოდესღაც მდიდარ, სახელოვან, გალაღებულ, ომის და შრომის ორდენოსან სოფელ შრომას, სადაც დღემდე არც გზებია მოწესრიგებული, არც წყალმომარაგებაა, არც გაზი, არც 24-საათიანი შუქი, უმუშევრობა კი 90 %-ია. წამყვანი დარგები მოშლილია, ხოლო მეციტრუსეობიდან აღებული შემოსავალი მინიმალურია, რომელიც ვერ ანაზღაურებს მასზე დახარჯულ მინიმუმსაც;
ფერმერთა საყანე ფართობები შემოუღობავია და წყალსაწრეტი არხები გაუკვალავი, რადგან ოზურგეთის მუნიციპალიტეტის ბიუჯეტში არ ჩაითვალა პრიორიტეტად ადგილობრივი მოსახლეობისთვის ესოდენ მნიშვნელოვანი საკითხი, რის გამოც, თითოეული გლეხის მარჩენალი სიმინდის მოსავლის 60-70 % ყოველწლიურად იღუპება.
სოფლად სამედიცინო დახმარება არ არსებობს, რადგან კანონით დადგენილი ორი ექიმისა და ოთხი ექთნის ნაცვლად, ფიზიკურად არავინ შემოგვრჩა, ხოლო თუ არიან, მხოლოდ გარდაცვალებას აფიქსირებენ.
ყოველივე ზემოხსენებულ და სხვა მოუგვარებელ პრობლემებთან ერთად, წლების მანძილზე, ყოვლად გაუსაძლისი და მოუწესრიგებელი, დღემდე რჩება 24-საათიანი სრულყოფილი ენერგომომარაგება, თუ საერთოდ შეიძლება, მას მომარაგება ვუწოდოთ. არც ერთხელ არ შეცვლილა სადენები და საყრდენები, მიუხედავად არაერთი დაპირებისა და ჩვენი მოთხოვნისა.
“ენერგო-პრო ჯორჯიას” ხელმძღვანელები კი, მრავალი წლის მანძილზე, უზრუნველად სარგებლობენ ე.წ. შეუცვლელი სადენებიდან მათთან მოდენილი ფულითა და შემოსავლით ისე, რომ არც ერთი თეთრი არ დაუხარჯავთ ინფრასტრუქტურის განახლებისთვის. ერთადერთი, რაშიც შეიძლება, გაისარჯონ და თავი შეიწუხონ, ეს არის ყოველ მეტრში გაწყვეტილი სადენების გადაბმა-გადახლართვა, რის გამოც გამოწვეული ენერგიის ზედმეტი დანაკარგების ანაზღაურება გაჭირვებულ გლეხკაცს აწვება კისერზე.
ამასთან, კანონით, გურიაში დადგენილი ტარიფით კილოვატზე 13 თეთრია გადასახადი, ჩვენ კი, განსაკუთრებით “მდიდარ” და “ბედნიერ” სოფლის მოსახლეობას, 15 თეთრს გვახდევინებენ. არავინ უწყის, სად ილექება ეს თანხები?! ამას ემატება მუდმივი გათიშვების სერია; ავარიები, რომლის გამომწვევი მიზეზები უთვალავია, მუდამ ხდება. ერთადერთი იმედი, რამაც შესაძლებელია, აიძულოს “ენერგო-პრო ჯორჯიას” ხელმძღვანელები იმოქმედონ, ესაა გამრიცხველიანება. ბოლო ხუთი წელია გვპირდებიან, რომ გააკეთებენ, მაგრამ, ალბათ, ვიღაც-ვიღაცებს არ აწყობს ხალხის კისერზე ნაშოვნი ფულის გათეთრება. 2010 წლის არჩევნებზეც ჩვენი მაჟორიტარი დეპუტატი, გოჩა შანიძე დაგვპირდა, რომ სოფლის ორივე მხრიდან _ თხინვალიდან და ურეკიდან დაწყებული გამრიცხველიანება სოფელ შრომაში შეერთდებოდა, თუმცა, ეს არ გვეღირსა.
როდემდე უნდა ირღვეოდეს მოსახლეობის უფლებები?!
გთხოვთ, განგვიმარტოთ, კურორტ ურეკზე მიბმული სოფელი შრომა ეკუთვნის თუ არა ოზურგეთის მუნიციპალიტეტს, გურიას ან საერთოდ, საქართველოს? შეეხება თუ არა 2013 წლის დეკლარირებული ეკონომიკური აღმასვლები ჩვენი სოფლის თითოეულ მოსახლეს?” _ ნათქვამია განცხადებაში.
ოზურგეთის მუნიციპალიტეტის სოფელ შრომის რწმუნებული, დავით ჯაბუა “გურია ნიუსთან” საუბარში ამბობს, რომ პრობლემები მალე მოგვარდება.
_ ბატონო დავით, როგორც სოფელ შრომის მცხოვრებლები ამბობენ, მათ პრობლემად აქვთ ქცეული წყლის, შიდა თუ ცენტრალური გზების მოუწესრიგებლობა, საყანე ფართობების შეღობვა. ელექტროენეტგიით მომარაგება. როგორ აპირებთ ამ პრობლემების მოგვარებას?
_ შუქის პრობლემა ჩვენ არ გვაქვს? არის გამრიცხველიანების პრობლემა და ისიც მალე მოწესრიგდება, სისტემა არის ძალიან ძველი, კომუნისტების დროიდან არ შეცვლილა და იმიტომ არის ავარიები. ყველაფერი შესაცვლელია _ ბოძები, ხაზები, მრიცხველები დასამონტაჟებელია. მე დაფიქსირებული მაქვს ყველაფერი და შეცვლიან, ალბათ. ჯერ არ არის დაფინანსებაში, მომავალში გააკეთებენ. საყანე ფართობებზე რა ხდება? შეღობილია, მავთულები შევუძინეთ და ღობავენ. რაც შეეხება გზებს, ცენტრალური გზის შეკეთება მალე დაიწყება, ჩასმულია პროექტში და უნდა გაკეთდეს. ველოდებით ყოველდღე.
_ კონკრეტული დრო გვითხარით, როდის დაიწყება სოფელ შრომაში არსებული პრობლემების მოგვარება?
_ ზუსტად არ ვიცი და რა გითხრათ?! მე ყოველი თვის დასაწყისში მეუბნებოდნენ, რომ ამ თვიდან ყველაფერი მოგვარდებაო. ყოველდღე დაიწყებაო და ჯერ არაფერი არ ჩანს. ვერ ვიტყვი ზუსტად.
_ ანუ თქვენ დააყენეთ გზების საკითხი ადგილობრივ ხელისუფლებასთან?
_ კი. პროექტში ჩასმულია და გაკეთდება. ამ შემოდგომაზე აუცილებლად უნდა გაკეთდეს, _ გვითხრა სატელეფონო საუბარში სოფლის რწმუნებულმა.
