“თბილისის საქალაქო სასამართლოს მიერ, მთავარი პროკურატურის შუამდგომლობა დაკმაყოფილდა, საქმეზე ყველა ბრალდებულს დაუზუსტდა ბრალი მხოლოდ სსკ-ის 332-ე მუხლის პირველი ნაწილით, რაც გულისხმობს მოხელის მიერ უფლებამოსილების ბოროტად გამოყენებას. ასევე, საქმე დაბრუნდა პროკურატურაში ბრალდებულების განსარიდებლად,” _ ნათქვამია პროკურატურის განცხადებაში.
ადვოკატების თქმით, პროკურატურამ საქმე გამამართლებელი განაჩენის შიშით გაითხოვა.
ე.წ.” ტრაქტორების საქმესთან” დაკავშირებით “გურია ნიუსმა” საპარლამენტო უმრავლესობის წევრს, თინა ხიდაშელს კითხვა გადაცემა “ბარიერში” დაუსვა.
_ ქალბატონო თინა, მინდა გკითხოთ “ქართული ოცნების” ერთ-ერთ ყველაზე გახმაურებულ საქმეზე, რომელიც მედიაში “ტრაქტორების საქმის სახელითაა ცნობილი. პროკურატურა როდესაც თავისი ინიციატივით შედის შუამდგომლობით და ყველა ბრალდებულს უხსნის ბრალს ერთ-ერთ მუხლში, ეს ბევრი კითხვის ნიშანს აჩენს. როგორც წესი, პროკურატურა, ასე არ იქცევა, როცა საქმეში წელგამართულია. აქვე უნდა გავიხსენოთ ისიც, რომ ამ საქმეზე 8 ადამიანი დააკავეს, მათ შორის 5 ცნობილი მეცნიერი, რომელთაგან ერთ-ერთს წინასწარი პატიმრობისასურთულესი ოპერაცია გაუკეთდა გულზე. მინდა გკითხოთ, იყო თუ არა ეს საქმე პროკურატურის კრახი?
_ მოდით, დაველოდოთ ამ პროცესის დასრულებას და პირობას გაძლევთ, ამის შემდეგ მეტს ვისაუბრებ ამ საქმეზე. ახლა ისეთ ფაზაშია პროცესი, რომ უბრალოდ არ მინდა რაიმე პოლიტიკური თუ სამართლებრივი შეფასებები გავაკეთო. კი, მე ვფიქრობ, რომ ეს საქმე იყო ერთ-ერთი ყველაზე პრობლემური. რატომ მოხდა და რამ გამოიწვია ეს ამბავი, ამაზე საქმის დასრულების შემდეგ ვისაუბრებ.
გამომძიებლების პასუხისმგებლობაზე საუბარი არ სურს ადვოკატ სოსო ბარათაშვილს. მისი თქმით, მთავარია, რომ ამ საქმეზე განაჩენი აღარ დადგება.
“პროკურატურამ დააყენა ორი შუამდგომლობა, პირველი შუამდგომლობით განაცხადა, რომ მას სურს შეწყდეს სისხლის სამართლის საქმე 182-ე მუხლით წარდგენილ ბრალდებაში ყველა ბრალდებულის მიმართ, ეს გახლავთ გაფლანგვა დიდი ოდენობითა და ჯგუფურად. სასამართლომ გამოიტანა შესაბამისი განჩინება ამ ნაწილში, შემდეგ პროკურატურამ დააყენა მეორე შუამდგომლობა და საქმის დარჩენილი ნაწილი გაითხოვა სასამართლოდან განრიდების მიზნით, ანუ ეს საქმე აღარ არის სასამართლოში და შესაბამისად, განაჩენი აღარ დადგება. რაც შეეხება გამომძიებლების პასუხისმგებლობას, ამ საკითხზე საუბარი არ მინდა,” _ ამბობს ბარათაშვილი.
დადგება თუ არა იმ პროკურორებისა და გამომძიებლების პასუხისმგებლობა, რომლებიც ე.წ. “მექანიზატორის” საქმეს იძიებდნენ? ამ კითხვაზე პროკურატურას ცალსახა პასუხი აქვს, გამომძიებლებს კანონი არ დაურღვევიათ.
“რატომ უნდა დადგეს ამ გამომძიებლების პასუხისმგებლობის საკითხი, რამეს ხედავთ თქვენ აქ დანაშაულს? ამ პირებს ბრალი არ მოხსნიათ, უბრალოდ ბრალდება დაზუსტდა და აღნიშნული ბრალდების მიმართ სისხლისსამართლებრივი დევნა გრძელდება 332-ე მუხლით. კიდევ გიმეორებთ, არავის ბრალი არ მოხსნია, მათ მიმართ სისხლისამართლებრივი დევნა გრძელდება,” _ ამბობს მთავარი პროკურატურის საზოგადოებასთან ურთიერთობის სამსახურის უფროსი თემურ დოლიძე.
