ოზურგეთის მუნიციპალიტეტის გამგებლის მოვალეობის შემსრულებლად დანიშვნიდან რვა დღის შემდეგ, ლავრენტი ქვილორიამ ოზურგეთის მუნიციპალიტეტის საკრებულოს თავმჯდომარის სახელზე განცხადება დაწერა და უარი განაცხადა დაკისრებული მოვალეობის შესრულებაზე. ჩვენი წყარო ამბობს, რომ ეს თავიდანვე ასე იყო განსაზღვრული და ქვილორიას არავინ დანიშნავდა გამგებლად. ამას ის ფაქტიც ადასტურებს, რომ რეგიონული განვითარების და ინფრასტრუქტურის მინისტრის, რამაზ ნიკოლაიშვილის მიერ, ოზურგეთელ ჩინოსნებთან მოწყობილ დახურულ თათბირზე, ქვილორია ჩამოთვლილ კანდიდატურებშიც კი ვერ მოხვდა…
საინტერესოა, რომ, ჩვენი წყაროსვე ინფორმაციით, ყოფილი გამგებლის ორმა მოადგილემაც, ლავრენტი ქვილორიას მსგავსად, უარი თქვეს გამგებლის მოვალეობის შესრულებაზე.
მიხეილ გოგოტიშვილი ჩვენთან საუბრისას ზუსტ დროს არ ასახელებს, თუ როდის განაცხადა ოფიციალურად უარი გამგებლის მოვალეობის შესრულებაზე.
_ სიმართლე რომ გითხრათ, იყო საუბრები და რაღაც მოსაზრებები, მაგრამ ჩემი გადაწყვეტილება ასეთია _ არ ვყოფილიყავი მოვალეობის შემსრულებელი.
_ ოფიციალურად გაქვთ დაწერილი განცხადება, რომ უარი თქვით მოვალეობის შესრულებაზე?
_ კი, დიდი ხანია, _ თუმცა, გოგოტიშვილს არ დაუკონკრეტებია, როდის მოხდა ოფიციალური უარის წარდგენა ხელისუფლებაში.
რაც შეეხება გამგებლის კიდევ ერთ მოადგილეს, ლაშა ღლონტს, მანაც უარი თქვა მოვალეობის შესრულებაზე:
_ კი, შემომთავაზეს, მაგრამ უარი განვაცხადე.
_ კონკრეტულად ვინ შემოგთავაზათ?
_ არა, საერთოდ იყო საუბარი, მაგრამ თავი შევიკავე ამ ეტაპზე.
_ თქვენც დაწერეთ ოფიციალური განცხადება, რომ უარს ამბობთ გამგებლის მოვალეობის შესრულებაზე და როდის მოხდა ეს?
_ კი, გუშინ დავწერე (ინტერვიუ ჩაწერილია 23 აგვისტოს).
კომენტირებისას, თუ რატომ თქვა უარი გამგებლის მოვალეობის შესრულებაზე, ლავრენტი ქვილორიამ “გურია ნიუსთან” თქვა:
_ იმიტომ, რომ წლის ბოლოა და რეაბილიტაციის კურსი მაქვს გასავლელი.
_ და, ახლა წლის ბოლოა?
_ ერთი თვით მივდივარ; 15 ნოემბერს ვაპირებ წასვლას; ამ დროს მიდის ახალი ბიუჯეტის დაგეგმარება და შედგენა… ამ კურსს შეიძლება ორი თვე დასჭირდეს და ამიტომ.
_ ეს მაშინაც ხომ იცოდით, როდესაც გამგებლის მოვალეობის შემსრულებლად დაინიშნეთ?!
_ ვიცოდი, მაგრამ კანდიდატის მონახვამდე, მოადგილეს ეკუთვნოდა მოვალეობის შესრულება. მაგრამ თუ ეს ვალდებულება სამ-ოთხ თვეს გაგრძელდებოდა, ამ ვადებში ვერ ჩავეტეოდი.
