გასულ პარასკევს, ბახმაროში ტრადიციული დოღი გაიმართა. დოღის შესახებ მკითხველს უკვე ვესაუბრეთ, დრევანდელი რეპორტაჟი კი ბახმაროს სხვა კუთხით დაგანახებთ.
ფერისცვალების სახელობის ეკლესიიდან სანთლისა და საკმეველის სასიამოვნო სურნელი გამოდის, ეზოში კი “დოსტები” სხვადასხვა ნივთებს გვთავაზობენ: ხის ხმლები, კოვზები, ტროსტები, კაიმაღი, წინდები… ბახმაროს ცენტრში რამდენიმე მაღაზიაც ფუნქციონირებს, სადაც ბავშვების სათამაშოების ფართო არჩევანიცაა, თუმცა, პატარების უმრავლესობა “ჩინურ ზიპლიპიტოს” მაინც “დოსტების” ნამუშევარს ამჯობინებს. ცხენზე ჯირითობა კურორტის ჩვეული გასართობი საშუალებაა, თუმცა, ძვირი _ ერთ საათი 20(!!!) ლარი ღირს.
კურორტზე სანატორიუმის წინ პარკია გაშენებული. იქ რამდენიმე ატრაქციონი დგას, მაგრამ მათი მდგომარეობა საკმაოდ საგანგაშოა _ თუ პატარამ მასზე სრიალი მოინდომა, დიდი ყურადღებაა საჭირო. პარკში მდებარე ატრაქციონები კარგა ხანია რემონტს საჭიროებენ. არადა, თუ კარგად დავაკვირდებით, აღმოვაჩენთ, რომ არც ისე დიდი ხნის წინ უნდა შესულიყო ექსპლუატაციაში.
ბახმაროში განსაკუთრებული რიგები ხორცის გამყიდველებს უდგათ. მართალია, წუწუნებენ, ხანდახან ვერაფერს ვყიდითო, მაგრამ საკუთარი თვალითაც ვნახეთ, რომ ხორცის მყიდველების საკმაოდ დიდი რიგებია. შეუმოწმებელი ხორციც იყიდება _ უბან-უბან კლავენ და უცებ “იცლიან ხელს”.
საკმაოდ ხშირად, მდინარე ბახვისწყალი გარუჯვის საშუალებად იქცევა ხოლმე. მზიან ამინდში დამსვენებლები “ზაგარს” მდინარეზე იღებენ. თევზაობის მოყვარულები მდინარის აღმართს აუყვებიან ხოლმე და თუ გაუმართლათ, ერთ-ორ კალმახსაც დაიჭერენ.
უცხოელებიც სტუმრობენ კურორტს _ ისინი კარვებს შლიან და რამდენიმე საათით ერთ ადგილზე ისვენებენ, შემდეგ სხვა ადგილზე გადადიან და ასე ატარებენ საკურორტო სეზონს.
ჩვენ ერთ-ერთ დამსვენებელს გავესაუბრეთ. მართალია, მან ვინაობის გამხელა არ ისურვა, მაგრამ, მისი მოსაზრება საინტერესოა, რადგან იგი გერმანიის მოქალაქეა და ყოველწლიურად საქართველოში იმიტომ ჩამოდის, რომ ბახმაროსი დაისვენოს:
_ ისევ “კომუნიზმში” ვართ? ვის ატყუებენ _ ეს გაკეთდა, ის გაკეთდაო? ათი წელია ბახმაროში დავდივარ და გეკეთებული არაფერი მინახავს. ელემენტარული პირობებიც კი არ არის. ასეთი კურორტი გვაქვს და ვერ ვიყენებთ. რომელ ტურისტებზე საუბრობენ? ქართველებიც აღარ ამოდიან, ისეთი მდგომარეობაა!
_ მაინც რა არ მოგწონთ?
_ რა უნდა მომეწონოს? აი, ამ წუთას შუქი გაგვითიშეს. ასე ხშირად ხდება! წყალი ბევრგან არ მოდის! გზაზე ასფალტის ადგილზე მიწა ჩაყარეს! რომელი საუკუნეა?!
_ გინდათ თქვათ, რომ ბოლო 10 წლის მანძილზე არაფერი გაკეთებულა ბახმაროში?
_ არაფერი! ამ დროს “უკეთესობა” ყოველწლიურად მუდამ ერთი მხრივ არის _ ქეიფის კუთხით წინ მიდიან! ყოველწლიურად, დოღის დღეს “სეფას” გაჭიმავენ და მიდის ქეიფი და დროსტარება! აი, ამაში ხარჯავენ ფულს. სირცხვილია _ არაფერს არ აკეთებ და ხალხს მაინც ნუ გადარევ ამ ტაშფანდურით! გერმანიის მოქალაქე კი ვარ, მაგრამ ქართველი ვარ და გული მწყდება, რომ არაფერი კეთდება. 15 ცხენი მონაწილეობს დოღში და 50-იაო, იძახიან. ამაშიც კი იტყუებიან!
_ თქვენ რა იცით, რამდენი მონაწილეობდა?
_ იქ არ ვიყავი? 15, მაქსიმუმ, 17-18 ცხენი მონაწილეობდა. ძალიან გთხოვთ, დაწერეთ, რა ხდება ამ კურორტზე _ რატომ უნდა იყოს ასეთი ადგილი უყურადღებოდ? ფულს მთავრობის გასაძღომ ტაშ-ფანდურზე რომ ხარჯავენ, ცოტა კურორტსაც მოახმარონ!
წლევანდელი დოღი გამართვამდე მოექცა ჩრდილში _ წინასწარი ინფორმაციით, მთავარი “რბოლა” სახელისუფლო კულისებში უნდა გამართულიყო, მაგრამ ფართოდ დაანონსებისა და დიდი მზადების მიუხედავად, კურორტზე არ გამოჩენილან არც შს მინისტრი ვანო მერაბიშვილი და არც იუსტიციის მინისტრი ზურაბ ადეიშვილი. და საერთოდ, დოღზე ხელისუფლების ბობოლა წარმომადგენლები არ ჩამოსულან.
არადა, თუ ვინ ჩამოვიდოდა და ვინ ვის გვერდით იქნებოდა, ამის მიხედვით უნდა გარკვეულიყო რეგიონის პოლიტიკური მომავალი! “სამთავრობო შატალოს” შემდეგ “გამყარდა” ინფორმაცია, რომ რეგიონში გავლენები შეინარჩუნა რამაზ ნიკოლაიშვილმა, და მოქმედმა გუბერნატორმა _ სწორედ ვალერი ჩიტაიშვილის კადრად ასახელებენ ოზურგეთის ახალ გამგებელს ილია ვაშაყმაძეს.
ბოლო წლის მანძილზე რა არ მოხდა გურიაში _ შეცვალეს სამხარეო და სამივე რაიონის პროკურორები; “პენსიაზე” გაუშვეს პოლიციის სამხარეო და რაიონული სამმართველოების უფროსები; დააპატიმრეს გუბერნატორის უახლოესი მეგობარი, გამგებელი ტაკიძე და 4 საჯარო მოხელე, ერთი გამგებელი დაჭერას გადაურჩა, “ნაცმოძრაობის” ფრაქციის თავმჯდომარე ძებნაშია… და ამ დროს ჩიტაიშვილი თანამდებობას ინარჩუნებს!
ჩვენი წყაროს ინფორმაციით, ჩიტაიშვილის მთავარი საფრთხე აქამდე ლანჩხუთის გამგებელი გია გოგუაძე იყო. მართალია, ორივე მხარე ამ ფაქტს უარყოფდა, მაგრამ კულუარებში არ მალავდნენ, რომ გურიის სამხარეო ადმინისტრაციის დერეფნებში ჩიტაიშვილს სულ უფრო ახლოდან “ესმოდა” გოგუაძის “საგუბერნატორო ხმა”. ახლა კი, როგორც წყარო ამბობს, ჩიტაიშვილს პირველად თავისი გუბერნატორობის ისტორიაში, მიეცემა სრული კარტ-ბლანშის საშუალება _ სავარაუდოდ, იგი გზიდან ჩამოიშორებს (ან ყველაფერს გააკეთებს ამისთვის) მისთვის მთავარ კონკურენტ გოგუაძეს. ბოლო დროს სულ უფრო ვრცელდება ხმები, რომ ლანჩხუთის გამგებლის პერსონით სამართალდამცველები ინტერესდებიან, თუმცა, ოფიციალურად ეს არ გაჟღერებულა. როგორც წყარო ამბობს, კუდ-ი იმაზეც “აშაირებია” გამგებელს, ლამის მთელი წლის თანხა ანგარიშზე რომ გაქვს, აბა, რას ხარჯავო? ვინ მოიგებს პოლიტიკურ-საინფორმაციო თუ კულუარულ ომს, ამაზე ბევრი რამ იქნება დამოკიდებული. ბოლო ინფორმაციით, გია გოგუაძემ უკვე დაწერა განცხადება გათავისუფლების შესახებ და მის მოვალეობას მოადგილე ნუგზარ ღლონტი ასრულებსო, თუმცა იმასაც ამბობენ, რომ გამგებელი შვებულებაში გავიდა. რამდენიმე დღის წინანდელი ინფორმაციით, გოგუაძეს განცხადების დაწერა სურდა, მაგრამ არ დააწერინესო.
როგორც წყარო ამბობს, დაძაბულობამ გუბერნატორსა და რამაზ ნიკოლაიშვილის ფავორიტ გამგებელს შორის მას შემდეგ მიაღწია პიკს, რაც გია გოგუაძე ტაკიძის დაკავების დღეს ოზურგეთში ჩასულა და ჩიტაიშვილისთვის უთქვამს _ მთელ გუნდს დარტყმას გვაყენებ, პასუხისმგებლობა აიღე და გადადექიო. ამაზე გუბერნატორს მწვავე რეაქცია ჰქონია _ შენ არავინ გეკითხება, მე წავალ თუ არაო. მოგვიანებით, ჩიტაიშვილს “ზემოთ” გაურკვევია, რომ “განცხადებას არ დაწერდა”.
ერთი საინტერესო დეტალიც _ ვალერი ჩიტაიშვილი ლანჩხუთური ვიზიტებისას, უმეტესად, რევაზ ჩიტიძის გვერდით დგას. ცნობილი ფაქტია, რომ მომავალი საკრებულოს თავმჯდომარის პოლიტიკაში დაბრუნების გადაწყვეტილება აცანაში, საიდუმლო შეხვედრაზე მოხდა, რომელსაც ჩიტაიშვილიც ესწრებოდა. კულუარებში ამის შემდეგ ისიც ითქვა, რომ ამით ჩიტაიშვილმა ნიკოლაიშვილი გაანაწყენა და მათ შორის დღემდე ცივი ურთიერთობა დამყარდა.
დასასრულ, კიდევ ერთხელ პრეზიდენტის უკვე მერამდენედ “გადადებულ” ვიზიტზე: თითქმის ყოველი საკურორტო სეზონისას, ფერისცვალების წინადღეს დაანონსებული “პრეზიდენტის ვიზიტიც” არ შედგა. როგორც ჩვენი წყარო ამბობს, გურულ ჩინოსნებს დაუცაცხანეს _ გია ტაკიძემ სირცხვილი გვაჭამა და პრეზიდენტის ჩამოსვლას აღარ ელოდოთო. მართალია, გასულ წელს პარლამენტის ვიცე-სპიკერი მიხეილ მაჭავარიანი “სამომავლოდ” დოღში უშუალო მონაწილეობით “დაგვემუქრა”, მაგრამ, როგორც ჩანს, გურიაში “საჭენაოდ” ან არ ეცალა, ან ასე იყო საჭირო პოლიტიკურად.
წყაროს ინფორმაციით, თუ ვინ “გააჭენებს” გურიას და ვის ექნება ცხენი შესაკაზმი, ამ კვირაში საბოლოოდ გაირკვევა!
