ოზურგეთის #60 საოლქო საარჩევნო კომისიაში შევიდა ოზურგეთის მუნიციპალიტეტის საკრებულოს განკარგულება საკრებულოს წევრის, ილია ვაშაყმაძის უფლებამოსილების ვადამდე შეწყვეტის შესახებ.
#60-ე ოზურგეთის საოლქო საარჩევნო კომისიის თავმჯდომარის, ზვიად თენიეშვილის თქმით, საკრებულოს წევრობის სტატუსის შეუთავსებლობას საჯარო მოხელის თანამდებობრივ მდგომარეობასთან არეგულირებს “საქართველოს საარჩევნო კოდექსის” 111 მუხლი და კანონი “ადგილობრივი თვითმმართველობის შესახებ”. თუ საკრებულოს წევრობის კანდიდატმა უარი განაცხადა საკრებულოს წევრობაზე, საკრებულოს წევრი ხდება პარტიულ სიაში რიგით მომდევნო კანდიდატი. საკრებულოს გამოკლებული წევრის ადგილმონაცვლეობის წესს კი, ასევე “საქართველოს საარჩევნო კოდექსის” 126-ე მეორე პრიმა მუხლს არეგულირებს.
კულუარებში საუბრობენ, რომ პარტიულ სიაში ვაშაყმაძის შემდეგ მდგომი გურიის სამხარეო ადმინისტრაციის მთავარი სპეციალისტი ანი ჩუბინიძე უარს იტყვის საკრებულოში შესვლაზე და ეს პატივი ამჟამად ააიპ “ოზურგეთის კომუნალური სამსახურის” ხელმძღვანელს, თეიმურაზ ქინქლაძეს ერგება.
ჩვენ შევეცადეთ მოგვეპოვებინა ანი ჩუბინიძის კომენტარი და გაგვეგო, აპირებდა თუ არა ის საკრებულოში შესვლას, მაგრამ მან ჩვენს ზარებს არ უპასუხა.
