ოზურგეთის მუნიციპალიტეტის მთისპირის თემში შემავალი სოფლების მცხოვრებლების ერთი ნაწილი ტყეკაფად მიუვალი ადგილების გამყოფის გამოყოფას აპროტესტებს _ ისინი სატყეო დეპარტამენტის და ხელისუფლების წარმომადგენლებისგან ყურადღების მიქცევას ითხოვენ.
_ გასაგებია, რომ სადაც სატყეო დეპარტამენტი გვეტყვის, იქ უნდა მოვჭრათ საშეშე მერქანი, მაგრამ ეს ისეთი მიუვალი ადგილებია, გვიჭირს ხის მოჭრა. მაგალითად, თუ ვანისქედელ მცხოვრებლებს მოგვიწია უკანავაში წასვლა, თან ცხენით, რადგან ტრაქტორით ან მანქანით ვერ წავალთ, დაახლოებით, ნახევარი დღე მაინც მოვუნდებით კონკრეტულ ადგილამდე მისვლას. ჩვენი თხოვნაა, სადაც პრობლემების გარეშე მივალთ, იქ მოგვაჭრევინონ ხე, _ თქვეს მთისპირელებმა ბუნებრივი რესურსების სააგენტოს გურიის სამსახურის უფროსთან ნიკოლოზ ნოზაძესთან და ამავე სააგენტოს თანამშრომელთან, ბესიკ ქარჩავას შეხვედრის დროს.
ნოზაძემ თქვა, რომ ის თბილისში ამ საქმესთან დაკავშირებით მიემგზავრება და სადაც ტყე-კაფები არის გამოყოფილი, აუცილებლად გაკეთდება მისასვლელი გზა, რომ მოსახლეობამ პრობლემის გარეშე დაამზადოს საშეშე მერქანი:
_ ჩვენ ვიმოქმედებთ კანონის ფარგლებში _ სადაც იქნება გამოყოფილი ტყე-კაფი, იქ მოხდება ხის მოჭრა და არა სხვა ადგილებში. გასაგებია თქვენი პრობლემები, მაგრამ კანონის დარღვევას არავინ აპირებს. გაკეთდება გზა და რა პრობლემა უნდა იყოს? _ თქვა მან.
ნოზაძეს და ქარჩავას ზუსტი დრო არ დაუსახელებიათ, თუ როდის დაიწყება ტყე-კაფებში გზის მიყვანა.
საბოლოოდ, მოსახლეობა და ბუნებრივი რესურსების სააგენტოს წარმომადგენლები ვერაფერზე შეთანხმდნენ. ჩინოვნიკები მოსახლეობის პრობლემებზე მეტად ჩვენი იქ მისვლის მიზეზით დაინტერესდნენ: _ თქვენ საიდან გაიგეთ და ვინ გითხრათ, რომ აქ მოსახლეობა მოდიოდა?! _ გვკითხა ცნობისმოყვარე ქარჩავამ.
