(გურია ნიუსი, ოზურგეთი) _ “შეაჩერეთ ქალაქის დამახინჯება”, “ქალაქი, რომელიც ქალაქს აღარ ჰგავს” _ ასეთი წარწერები “თავისუფალმა დემოკრატებმა” საკუთარ ოფისში, დაფაზე დაწერეს და იმ ობიექტების სურათები დაურთეს, რომელიც, მათი აზრით, ქალაქს ამახინჯებენ.
პარტიის ადგილობრივმა ლიდერმა, თემურ სალუქვაძემ ამ საკითხს სპეციალური პრესკონფერენციაც მიუძღვნა: _ “თავისუფალმა დემოკრატებმა” ქალაქის ნაწილი შემოვიარეთ და ნანახმა მოლოდინს გადააჭარბა. ეს არის ძალიან აღსაშფოთებელი, სამწუხარო ფაქტი, რომელიც არანაირ კანონის ფარგლებში არ ჯდება. ქალაქის ქუჩებში ავტომანქანით გავლა პრაქტიკულად შეუძლებელია. გვახსოვს, “პსპ”-ს მშენებლობაზე როცა იყო საუბარი, გვარწმუნებდნენ, არანაირი პრობლემა მანქანების მიმოსვლასთან დაკავშირებით არ იქნებაო, მაგრამ, როდესაც შენობა აშენდა, იქ ძალიან ქაოსური სიტუაცია შეიქმნა.
პირველ რიგში, მინდა აღვნიშნო, რომ ჩვენ არასდროს ვეხებით ისეთ საკითხს, რომელიც საფუძვლიანად არ გვაქვს შესწავლილი. ამიტომ, მივიღეთ გადაწყვეტილება, ჩამოვაყალიბოთ კომისია, რომლის შემადგენლობაში შევლენ არქიტექტორები, ტრანსპორტის სპეციალისტები და სხვა კომპეტენტური პირები, _ აღნიშნა სალუქვაძემ, რომელიც კონკრეტულ მშენებლობებს შეეხო და თქვა, რომ მდგომარეობა საგანგაშოა: _ ჩვენ არაერთხელ გვითქვამს საკრებულოს სხდომაზე და დაგვიყენებია ეს საკითხი, მაგრამ კიდევ ერთხელ გვინდა გავაგებინოთ ხელისუფლებას, რომ ქალაქს მოვლა სჭირდება. ეს თითოეული ჩვენგანის გულისტკივილია. ამას ჰქვია “თავისუფალი დემოკრატების” განგაში. დაუშვებელია ქალაქის განაშენიანების გეგმის გარეშე მიმდინარეობდეს ამდენი მშენებლობა, _ თქვა სალუქვაძემ.
შეხვედრის დასასრულ, ოპოზიციონერმა დეპუტატმა, ოზურგეთის მუნიციპალიტეტის გამგებლის მოვალეობის შემსრულებელს, ილია ვაშაყმაძეს მიმართა: _ მინდა მივმართო ოზურგეთის მუნიციპალიტეტის გამგებლის მოვალეობის შემსრულებელს, სასწრაფოდ გაეცნოს არსებულ მდგომარეობას, შეაფასოს და ცალსახად დააფიქსიროს საკუთარი პოზიცია აღნიშნულ საკითხებთან დაკავშირებით. ასეთი რამ, მგონი არც ერთ რეგიონში და არც ერთ ქალაქში არ ხდება _ ქალაქის მკვიდრმა მშობლიური რაიონი ასე გაანადგუროს და დაამახინჯოს, წარმოუდგენელია! ვაშაყმაძემ უნდა გამოიყენოს მის ხელთ არსებული ყველა ბერკეტი, რათა წინ აღუდგეს ამ აღვირახსნილობას.
