(გურია ნიუსი, ლანჩხუთი) _ პარასკევს, ლანჩხუთის მუნიციპალიტეტის საკრებულოს მორიგი სესია გაიმართა, რომელზეც 6 ძირითადი და ერთი “სხვადასხვა” საკითხი განიხილეს. სესიის დაწყებამდე მედიისთვის ცნობილი გახდა, რომ სხდომა საკმაოდ დაძაბული და ხმაურიანი იქნებოდა _ ამის პირობა ოპოზიციონერმა დეპუტატმა დავით წულაძე დადო და სესიის მიმდინარეობისას შეასრულა კიდეც.
პირველად ტრიბუნასთან მუნიციპალიტეტის გამგებლის მოადგილე, ნუგზარ ღლონტი წარსდგა. იგი დეპუტატებს შპს “გზის” მოსალოდნელ ლიკვიდაციაზე ესაუბრა.
შემდეგ დღის წესრიგით გათვალისწინებული საკითხების განხილვა დაიწყო. გამგეობის ფინანსურის სამსახურის უფროსმა როლანდ ლაშხიამ ბიუჯეტში ახალი ცვლილებების შეტანაზე ისაუბრა. მისი თქმით, არასასოფლო-სამეურნეო მიწის გადასახადიდან ადგილობრივ ბიუჯეტში 300 ათას ლარზე მეტის მობილიზება მოხდა და დამატებითი შემოსავლების გამო, ბიუჯეტში ცვლილებები უნდა შევიტანოთო. ლანჩხუთის მთავარმა ფინანსისტმა ჭარბი შემოსავლების ხარჯვითი ნაწილიც წარმოადგინა. ერთმა პუნქტმა, სადაც საუბარი იყო ვიდეოთვალების განთავსებისთვის 100 ათასი ლარი გამოყოფაზე, ოპოზიციონერი დეპუტატის დავით წულაძის გაღიზიანება გამოიწვია: “ამერიკულმა პეპელამ შეგვჭამა. იძახით, ფული არ გვაქვს და იმიტომ ვერ ვებრძვითო, თქვენ კი 100 ათასი ლარი ვიდეოთვალის დასამონტაჟებლად გამოგიყვიათ. ვინ დაგავალათ ეს?!” _ საკმაოდ კატეგორიული იყო წულაძე.
საკრებულოს დეპუტატის რეპლიკას თავმჯდომარემ უპასუხა: “ორგანული კანონი მუნიციპალიტეტს ექსკლუზიურად გვავალდებულებს ადგილობრივი საგზაო წესების რეგულირებას”.
ამ განცხადებამ წულაძე კიდევ უფრო აღაშფოთა: “ამ თანხის ვიდეოთვალების დასამონტაჟებლად მიმართვა დანაშაულია” და როლანდ ლაშხიას მიუბრუნდა: “შენ, როლანდ, პირველ კომისიის სხდომაზე თქვი, მოვილაპარაკოთო. გუშინ მეორე სხდომა ისე ჩაატარეთ, არც გამაგებინეთ, გამომაპარეთ. ვისთან მოილაპარაკეთ, ვინ გითხრათ, რომ ეს თანხა ვიდეოთვალისთვის გამოგეყოთ?!”
წულაძეს ლაშხიამ უპასუხა, რომ ეს სამსახურების ერთობლივი მუშაობის შედეგად გადაწყდა.
ბიუჯეტის წარმოდგენილი ცვლილების პროექტი რევაზ ჩიტიძემ შეაჯამა: “ძალიან მნიშვნელოვანია, როცა ბიუჯეტში დამატებითი შემოსავლები ჩნდება. წელს 2 სკოლა აშენდა. ჩიბათში არსებული სკოლა უნდა დაინგრეს და ახალი აშენდეს. სანამ ეს მოხდება, მანამ სკოლის მუშაობას ხელი რომ არ შეეშალოს, ჩიბათშივე არსებული ყოფილი საგზაოს შენობა დროებით სარგებლობაში გადაეცემა სკოლას. იმისათვის რომ იქ სწავლის საშუალება იქნას, 4000 ლარის გამოყოფა მოგვიწევს და ვფიქრობთ, ამ წინადადებას მხარს დავუჭერთ…”
წულაძე ამჯერადაც აქტიური იყო: “რატომ ხდება ყოველთვიურად ბიუჯეტში ცვლილება, ცვლილება, ცვლილება, ცვლილება? ნუთუ წინასწარ ბიუჯეტის პროგნოზირება არ შეგვიძლია?!”.
წულაძემ საკრებულოს თავმჯდომარისგან განმარტება მიიღო: “წელს ბიუჯეტში 4 ცვლილება გახორციელდა. პირველი შეეხო სოფლის პროგრამებს, მეორე _ ინფრასტრუქტურისთვის გამოყოფილ თანხებს. მარტში გავზარდეთ ქონების გადასახადი და ამან გამოიწვია კიდევ ერთი ცვლილება. ასე იმიტომ მოხდა, რომ 2010 წლის დეკემბერში არ ვიცოდით, რა თანხა იქნებოდა გამოყოფილი სოფლის პროგრამებზე და ინფრასტრუქტურის კუთხით. მომავალ წელსაც ასე იქნება. როცა ცენტრალური ბიუჯეტიდან გამოყოფილი თანხის რაოდენობა გვეცოდინება, მაშინ მოვახდენთ შესაბამის ცვლილებას.”
საბოლოო ჯამში, წარმოდგენილ ცვლილებებს დეპუტატებმა მხარი დაუჭირეს _ მხოლოდ მარიკა თურნავა და დავით წულაძე იყვნენ წინააღმდეგნი. დავით წულაძემ ორივე ხელი ასწია: “მე ლევან ჩხაიძის (ის სესიას არ ესწრებოდა) მაგივრადაც ვარ წინააღმდეგი. 100 ათასი ლარი რომ გამოყევით ბიუჯეტიდან ვიდეოთვალის დასამონტაჟებლად, არ სჯობდა ერთი მიკროფონი გეყიდათ და ტრიბუნასთან დაგედგათ? ვერ ვყურობ, ბატონო, რას ლაპარაკობენ და რა ვქნა?!”
წულაძის კიდევ ერთ გააქტიურებაზე საკრებულოს თავმჯდომარემ აპარატს დავალება მისცა: “მე ვთხოვ აპარატს, დეპუტატის მიმართ საკრებულოს ოქმში გაფრთხილება შეიტანოს”, რაზეც წულაძემ იყვირა: “კაი, ვყურობ, ბატონო რეზო, ვყურობ!”. ამასობაში ოპოზიციონერი კიდევ ერთხელ აღმოჩნდა ყურადღების ცენტრში _ სკამი გაუფუჭდა და იძულებული გახდა შეეცვალა.
საკმაოდ ხანგრძლივი კამათის შემდეგ სესია ჩვეულ რიტმში გაგრძელდა და რამდენიმე საკითხი ხმაურის გარეშე გაიარეს. მუნიციპალიტეტის იურიდიული სამსახურის უფროსმა, შოთა ჩაგუნავამ ლანჩხუთის მუნიციპალიტეტში მიმდინარე სამშენებლო სამუშაოების ან მშენებლობების ეტაპის მშენებლობის ნებართვით დადგენილ ვადაში დაუსრულებლობის შემთხვევაში, ჯარიმის ოდენობების განსაზღვრის შესახებ ისაუბრა _ ყველა ვადაგადაცილებულ დღეზე 0,1 ლარით მოხდება მესაკუთრის დაჯარიმება ერთ კვადრატულ მეტრზე. თუმცა, დადგენილებაში განსაზღვრულია მესაკუთრის უფლებებიც. თუ ის მოცემულ ვადაში ვერ ასრულებს სამუშაოს, ან ვერ ახერხებს მშენებლობის გაგრძელებას, უნდა მიმართოს საკრებულოს და მოხდება გადავადება.
საკრებულოს თავმჯდომარემ ჩაგუნავას მიერ წარმოდგენილ საკითხზე განმარტება გააკეთა: “თუ მესაკუთრე აშენებს 200 კვ.მ.-ს და ის დაარღვევს ვადებს, ყოველთვიურად დაერიცხება ჯარიმა 600 ლარის ოდენობით.”
დღის წესრიგით გათვალისწინებულ ბოლო საკითხად “ლანჩხუთის მუნიციპალიტეტის თვითმმართველი ერთეულის პროგრამების დამტკიცების შესახებ” ლანჩხუთის მუნიციპალიტეტის საკრებულოს 2010 წლის 24 დეკემბრის #94 განკარგულებაში ცვლილების შეტანის თაობაზე” ლანჩხუთის მუნიციპალიტეტის საკრებულოს განკარგულება განიხილეს. აღნიშნულ პროგრამაში მხოლოდ ერთი ცვლილება შევიდა. საქმე ეხება დიალიზით დაავადებული ადამიანების ხელშეწყობის პროგრამას. ამისათვის ბიუჯეტიდან 8900 ლარი იქნება გამოყოფილი. თანხის მისაღებად დიალიზიანებმა განცხადებით უნდა მიმართონ მუნიციპალიტეტის შესაბამის სამსახურს, შემდეგ მათ გაეხსნებათ ბანკში პირადი ანგარიში. ეს თანხა მოხმარდება მათ ტრანსპორტირებას შესაბამის სამედიცინო დაწესებულებაში: “ყოველთვიურად ამ ადამიანებს 12-13-ჯერ უწევდათ ბათუმში წასვლა. ეს კი დამატებით ხარჯებთან იყო დაკავშირებული. აღნიშნული პროგრამით ეს პრობლემა მოეხსნებათ”, _ ითქვა საკრებულოს სესიაზე.
საკრებულოს სესიაზე დღის წესრიგით გათვალისწინებული საკითხები ამოიწურა და “სხვადასხვაში” დეპუტატ დავით წულაძეს მოუსმინეს. ტრიბუნასთან მისულ წულაძეს საკრებულოს თავმჯდომარემ განუმარტა, რომ განცხადების გასაკეთებლად, საკრებულოს რეგლამენტით, 3 წუთი ჰქონდა, თან უთხრა _ არ მესმისო, ამბობთ ბატონო დავით. ჟურნალისტები დარბაზის ბოლოში სხედან, თუმცა, ყველაფერი ესმით და იწერენ. თქვენ რაღა მოგივიდათ?
_ კი დამპირდა თქვენი ფრაქციის ლიდერი, საკრებულოდან გაგიტანო, მარა ვერ მოესწრება. ვინ ვის გაიტანს, ამასაც ვნახავ, _ მიუბრუნდა წულაძე ფრაქცია “ნაციონალების” თავმჯდომარეს დავით ჩხაიძეს. ამ უკანასკნელმა სესიის დასრულების შემდეგ თქვა, რომ “წულაძე დაბერდა უკვე და ეტყობა, იმიზა არ ესმის, რასაც სესიაზე ამბობენო”.
დავით წულაძე: “ამერიკული პეპელა ისე გვიტევს, რომ ერთ-ორ წელიწადში ხეების მაგივრად მარტო ძირები დაგვრჩება. ამას წინათ, კომისიის სხდომაზე მცენარეთა და იმის დაცვის სამსახური რომაა, მანქანაზე რომ აწერია, იმის უფროსი ქალბატონი შემომივარდა და ოფოფები ამიყარა _ რას ჰქვია, შენ ჩვენს სამსახურზე საუბრობო. თურმე, საკრებულოს დეპუტატს ამ სამსახურის შესწავლის მოთხოვნის უფლება არ ჰქონია. პირადად მოვითხოვ, შევისწავლოთ ამ სამსახურის მიერ ჩატარებული სამუშაოები. პრეზიდენტის წინაშეც დავაყენებ ამ საკითხს, მარა სად ვნახო _ ხან ზღვაშია და ხან _ ცაში! აქეთ ღორის გრიპიო, ქათმის გრიპიო, ახლა კიდევ პეპელა. პატრონი არ გვყავს?! თქვენ კი ადექით და 100 ათასი ლარი ვიდეოთვალებისთვის გამოყავით!”
წულაძეს ისევ საკრებულოს თავმჯდომარემ უპასუხა. რევაზ ჩიტიძის თქმით, მდგომარეობა მართლაც ცუდია: “გასულ წელს უკეთეს სიტუაციაში ვიყავით. ჩვენ გვქონდა ამასთან დაკავშირებით საუბარი სოფლის მეურნეობის სამინისტროში. წელს კახეთის მხარეს შეესია კალიები და ამიტომ, ძირითადი შეწამვლითი სამუშაოები იქ გახორციელდა. რაც შეეხება სურსათის უვნებლობის და მცენარეთა დაცვის სამსახურის მუშაობის შესწავლას, წულაძის მოთხოვნა ოქმში დაფიქსირდება და შესაბამის სამსახურს მივაწოდებთ ინფორმაციას. ეს სამსახური ჩვენ დაქვემდებარებაში არ არის და აქედან გამომდინარე, მას ვერ შევამოწმებთ. როგორც ვიცი, სოფლის მეურნეობის სამინისტროში ამერიკულ პეპელასთან საბრძოლველად ალტერნატიულ მეთოდზე მუშაობენ _ საუბარია ფრინველის და მწერის შემოყვანაზე. ეს, ალბათ, მომავალში იქნება. წელს უკვე ისეთი მდგომარეობაა, რომ ვერაფერს შევცვლით. მხარის გუბერნატორის, ვალერი ჩიტაიშვილის უშუალო დავალებით, ჩოხატაურსა და ოზურგეთში არსებული წამლის მარაგები და აპარატები ჩვენთან ჩამოიტანეს და მოხდა კერების შეწამვლა. ზოგან ორჯერაც კი შეიწამლა. სულ 14 ბიდონი წამალი იყო. ახლა რომც შეწამლო, ვერაფერს შეცვლი, რადგან მწერმა ზრდა უკვე დაასრულა. იმედს ვიტოვებ, რომ მომავალში უფრო ორგანიზებულად მოხდება ამერიკული პეპლის წინააღმდეგ ბრძოლა.”
