გაზაფხულზე, ჩოხატაურის მუნიციპალიტეტის გამგეობამ და საკრებულომ, რეგიონის ხელმძღვანელობასთან ერთად, ზემოხეთში, საჭამიასერში, ზემოსურებში, ჩხაკაურასა და ზოტში უფასო მედიკამენტები დაარიგეს, მოსახლეობასაც შეხვდნენ და მათი პრობლემებიც მოისმინეს. ხელისუფლებამ ეს აქცია ახლა კიდევ გაიმეორა და ამჯერად, სოფლების _ ერკეთის, ხევის, დაბლაციხის, ვანისა და შუასურების მოსახლეობას გადასცა მედიკამენტები. ამ დღეს შუასურებში ექიმების ბრიგადაც იმყოფებოდა _ თერაპევტმა ნინო კუტუბიძემ, ქირურგმა პოლინა დგებუაძემ, პედიატრმა ქეთინო გაჩეჩილაძემ 37 პაციენტი გასინჯეს. როგორც მოსახლეობა ამბობს, მიტანილი მედიკამენტები ძვირადღირებულია და მეტად საჭირო.
ჩოხატაურის რაიონის სოფელ შუასურებს ძალიან ბევრი პრობლემა აქვს _ უგზოობა, უექიმობა, უტრანსპორტობა, მოსაცდელისა და წისქვილის არქონა, გარეული ნადირის შემოსევა… როგორც ამ შეხვედრაზე აღნიშნეს, ნადირის გასანადგურებლად ტყვია-წამალი დარიგებულია, შეპირებული მოსაცდელი რამდენიმე დღეში დამთავრდება, წისქვილის ასაგებად მასალები მოზიდულია…
შუასურებში ასულმა რაიონისა და რეგიონის ხელმძღვანელობამ სოფლის ყველა ობიექტი მოინახულა. სამედიცინო ოთახი (ექთანი ვერა ყაჭეიშვილი, როგორც სოფელში ამბობენ, ყველას იმედია, რადგან ექიმი არ ჰყავთ), მშენებარე მოსაცდელი და ეკლესია, რომელსაც ადგილობრივი მკვიდრი პაატა ტრაპაიძე აშენებს თავისი სახსრებით, საჯარო სკოლა 22 მოსწავლითა და ერთი პირველკლასელით. სკოლაში მისულ ხელმძღვანელობას მასწავლებლები ადგილზე დახვდნენ _ ისინი ახლადგარემონტებულ შენობას ალაგებდნენ. გუბერნატორმა ვალერი ჩიტაიშვილმა ყველა საკლასო ოთახი დაათვალიერა, გაესაუბრა მასწავლებლებს, დირექტორს ქალბატონ ნათელა სიხარულიძეს, მოუწონა სასწავლო წლისათვის და ზამთრისთვის მზადება. დაინტერესდა პირველკლასელთა ოთახით, რომელიც ახალი ავეჯით ძალიან ლამაზად არის მოწყობილი, ასევე პატარა მუზეუმით, რომელიც სკოლის ისტორიას ასახავს.
_ თუ სოფელს გზა არ ექნება, დაცარიელდება ეს მშვენიერი ხეობა და თუ შესაძლებელია, იქნებ, მოგვეხმაროთ, _ სთხოვა სკოლის დირექტორმა გუბერნატორს. გუბერნატორმა თანმხლებ პირებთან ერთად მიიღო გადაწყვეტილება, რომ კაპიტალურად გაკეთდეს ბუკისციხის შემდეგ სურების მიმართულებით სანიაღვრე არხები, ღორღით მოსწორდეს წინასწარ გადახნული გზის საფარი, რაც მნიშვნელოვნად გააუმჯობესებს გზის მდგრადობას და ხარისხს. ახალგაზრდა ქალბატონმა მაია ბერიშვილმა პატარა ბავშვის ოპერაციისათვის, რომელსაც დამწვრობის გამო ხელი გამრუდებული აქვს, თანხა ითხოვა. გუბერნატორმა მასაც დახმარება აღუთქვა.
_ სოფელი ექიმის გარეშე არ შეიძლება, კვირაში ერთი დღეც რომ იყოს, ესეც დიდი შეღავათია; იქნებ, დაგვეხმაროთ, _ ეს იყო გუბერნატორისთვის მორიგი სათხოვარი.
_ მაქსიმალურად შევეცდებით, გამონაკლისის სახით, იქნებ დავაშვებინოთ, რომ კვირაში ორი დღით რომელიმე ექიმი გამოუშვან აქ, _ კვლავ გულუხვად გასცა დაპირება ჩიტაიშვილმა.
ჩვენ ამ დაპირების შესრულებას აუცილებლად მივადევნებთ თვალს და გვინდა დავიჯეროთ, რომ მათი ნაწილი მაინც, ფუჭი საარჩევნო “სიტყვის მასალა” არ აღმოჩნდება.
