ოზურგეთის მუნიციპალიტეტის გამგებლის გია ტაკიძის დაკავებამ საზოგადოების აღშფოთება გამოიწვია. სხვადასხვა თავშეყრის ადგილებსა თუ კერძო საუბარში ძალიან ხშირად გაიგონებთ, _ აი, თურმე, მაღალჩინოსნები რამდენ ფულს “ჭამენ”, გაჭირვებულ, დახმარების სათხოვნელად მისულ ადამიანებს კი ეუბნებიან, ბიუჯეტში ფული არაა და ვერაფერს მოგცემთო. გურიაში ბევრი შეჭირვებული ოჯახია. ერთ-ერთი ასეთი ოზურგეთის მუნიციპალიტეტის სოფელ ლიხაურის მკვიდრი აპოლონ ბურჭულაძის ოჯახია, რომელმაც დახმარებისთვის “გურია ნიუსის” ოზურგეთის განყოფილებას მიმართა და თავისი გასაჭირის საკუთარი თვალით ნახვა სთხოვა.
31 წლის თეა ბურჭულაძე დაბადებიდან ინვალიდის ეტლს არის მიჯაჭვული. როგორც მისი მშობლები, აპოლონ ბურჭულაძე და ნანი ადეიშვილი “გურია ნიუსთან” საუბარში ამბობენ, მათ ოჯახს არანაირი შემოსავალი არ აქვს.
_ მეზობლები ძალიან გვიწყობენ ხელს. წლიდან წლამდე არანაირი შემოსავალი ჩვენ არ გვაქვს, რომ თავი გავიტანოთ. ჩაი უსარგებლო გვაქვს, რადგან ტყედ არის ქცეული, იმის შესაძლებლობა არ გვქონდა, რომ ყანა დაგვეთესა. ვართ უმუშევრები, ჩემი მეუღლე ფიზიკურად მუშაობს, აქა-იქ, ოღონდ რაიმე სამუშაო გამოჩნდეს, _ გვიყვება ქალბატონი ნანი.
მისი თქმით, დახმარების სახით, მხოლოდ ერთჯერადად მიიღეს 100 ლარი.
_ საავადმყოფოში იწვა ჩვენი შვილი და ამიტომ მოგვცეს ეს მიზერული თანხა. სოციალურად დაუცველთა ბაზაში ჩვენ ვერ მოვხვდით, არც ფულადი შემწეობა და არც ჯანმრთელობის პოლისი შეგვხვდა. შეზღუდული შესაძლებლობების მქონე შვილი რომ ეყოლება, იმას დახმარება არ უნდა ჰქონდეს? ახლა გვითხრეს, პოლისი მოგიწევთო. წელს, მართალია, არავისთვის მიგვიმართავს, აზრი არ ჰქონდა. ვიცით, რომ ახლაც არ ექნება აზრი, მაგრამ გვინდა ყველამ დაინახოს, წაიკითხოს, რომ ასეთ ადამიანებს და ოჯახებს არ ეხმარებიან; სამართალი თუ არის სადმე, არ შეგვიძლია ჩვენ, სხვასავით ატუზული ვიყოთ გამგეობის მისაღებში, ვიყვიროთ, შევაწუხოთ ზედმეტად ვინმე. ინვალიდის ეტლიც თბილისიდან ახლობლებმა ჩამოგვიტანეს, გვაჩუქეს. სამების ტაძარში მუშაობს ჩვენი ნათესავი, იქ ვიღაცას შემოუწირავს და თეას გამოუგზავნა. რამდენჯერ მოვითხოვეთ გამგეობაში ეტლი, მაგრამ _ არაფერი. არავის სიამოვნებს შენი გაჭირვების მოსმენა. როცა ესაუბრები, გრძნობ, რომ ისე გისმენენ, ერთი სული აქვთ, როდის დატოვებ მათ ოთახს. თუ გამგებელი ათეულ ათასებს იღებდა ქრთამის სახით, ჩვენთვის ინვალიდის ეტლი რატომ არ უნდა მოეცათ?!
გაზის შემოყვანა მოვითხოვეთ, გზიდან ძალიან პატარა მონაკვეთია ჩვენამდე, მარტო ჩვენ ვართ დარჩენილი, არ გვაქვს საშუალება და რა მოხდება, ასეთ ოჯახს დაგვეხმაროთ, შეღავათი გაგვიწიოთ და გამონაკლისი დაუშვათ-მეთქი, მაგრამ არაფერი, პირიქით, წინასწარ უნდა გადაიხადოთო, გვითხრეს, _ გვითხრა ნანი ადეიშვილმა.
_ ინვალიდი შვილი რომ გეტყვის, დედი, ლიმონათი მინდაო და იმას ვერ უყიდი, ეგაა საქმე? ამის გარდა, სახლში კიდევ ორ შვილი, რძალი და შვილიშვილები გვყავს; ძალიან გვიჭირს. ნუთუ, ასეთ ოჯახზე დახმარება არ უნდა იყოს? იქნებ, თქვენ გაგვაგებინოთ! წამლები სულ გვჭირდება და ერთი ძროხის იმედით ვართ. გამგებელმა გვითხრა, არაა ფინანსები ბიუჯეტში და რით დაგეხმაროთ, არაა ასეთ ინვალიდებზე დახმარებაო… ჩვენთვის, გაჭირვებულებისთვის არაფერი არაა და მაგათთვის ყველაფერია? ასეთი ოჯახების ცოდვა არ გაახარებს ხელისუფლებას. ხან სულ მშიერები ვართ. არ უნდა ექცეოდეს ასეთი კატეგორიის ადამიანებს ყურადღება? ან ოჯახის წევრები დაგვასაქმონ, პური და შაქარი რომ მაინც მივიტანოთ სახლში, თურქეთში წასვლა სანატრელი გამიხდა, მაგრამ ვერ წავალ, ავადმყოფი შვილი ვის დავუტოვო? დედის გარეშე მომიკვდება, _ გვიამბო თავისი გასაჭირი ქალბატონმა.
ოზურგეთის მუნიციპალიტეტის საკრებულოს კულტურის, ჯანდაცვის და ახალგაზრდულ საქმეთა კომისიის თავმჯდომარე ირინე საჯაია “გურია ნიუსთან” საუბარში ამბობს, რომ შევებულებაშია და კომენტარს ვერ გააკეთებს.
_ სამსახურში არ ვიმყოფები, ასე ზეპირად კომენტარს ვერ გავაკეთებ, უფლებაც არ მაქვს, მასალებში ხომ უნდა ჩავიხედო? დახმარება რა თქმა უნდა ეკუთვნის, როგორც კი გამოვალ შვებულებიდან, მაშინვე გადავხედავ საქმეს, _გვითხრა საჯაიამ.
სოციალური მომსახურების სააგენტოს ოზურგეთის განყოფილების უფროსი ოთარ რევიშვილი “გურია ნიუსთან” საუბარში კი აღნიშნავს, რომ ინვალიდობა არ არის სოციალური დახმარების მიღების გარანტია.
_ ამ ოჯახთან დაკავშირებით მხოლოდ ერთი რამ შემიძლია გითხრათ: ასახულია ყველა ის ინფორმაცია, რაზეც არის საუბარი, რომ ეს ადამიანი არის მკვეთრად გამოხატული შეზღუდული შესაძლებლობით, რაც გულისხმობს, უკვე სექტემბრიდან 100-ლარიან პენსიას; მას, შესაბამისად, პენსიაც აქვს დანიშნული. რაც შეეხება სოციალურ დახმარებას, ინვალიდობა არ არის გარანტია სოციალური დახმარების მიღებისა. სოციალური დახმარება ეს არის ოჯახის მდგომარეობიდან გამომდინარე სოციალური შეღავათი, რომელსაც იძლევა სახელმწიფო. კატეგორიით არ ხდება სოციალური დახმარების დანიშვნა, შეზღუდული შესაძლებლობების მქონე ადამიანებისთვის კატეგორიით ხდება მხოლოდ პენსიის დანიშვნა, თუმცა, ერთმანეთს არ გამორიცხავს, ანუ შესაძლებელია ოჯახი იყოს ღატაკი და ჰყავდეს შეზღუდული შესაძლებლობების მქონე წევრი და დაენიშნოს სოციალური დახმარება. ამ კონკრეტულ შემთხვევაში, ამ ადამიანს აქვს პირველი ჯგუფის ინვალიდობის პენსია. რაც შეეხება დღევანდელ სიტუაციას, აქვს ქულების ის რაოდენობა, რაც ითვალისწინებს პოლისს, უნდა გავიდეს კანონით დადგენილი ვადა და ამ ოჯახს მიეცემა სამედიცინო პოლისი, _ თქვა რევიშვილმა.
