როგორც ჩვენი წყარო გვაუწყებს, შინაგან საქმეთა სამინისტროს გურიის სამხარეო მთავარი სამმართველოს უფროსს გიგა ჯაფარიძეს უახლოეს დღეებში აღნიშნული თანამდებობის დატოვება მოუხდება. წყაროს თქმით, მან გათავისუფლების შესახებ განცხადება უკვე დაწერა მინისტრ ივანე მერაბიშვილის სახელზე.
დაახლოებით ერთი თვის წინ, ოზურგეთში აგრარული ბაზრის მიმდებარე ტერიტორიაზე, შინაგან საქმეთა სამინისტროს სპეციალური ოპერატიული დეპარტამენტის თანამშრომლებმა ნარკოტიკების, როგორც მომხმარებლები, ასევე, გამსაღებლები აიყვანეს. დაკავებულია ოზურგეთში მცხოვრები ერთი ახალგაზრდა, ხოლო მეორემ გაქცევა მოახერხა. დაკავებულმა, ნარკოტიკის შემოტანა თურქეთ-საქართველოს გამშვები პუნქტის გავლით მოახერხა და მის რეალიზაციას ოზურგეთის ქუჩებში, დღისით-მზისით, ახერხებდა. ქუჩაში ნარკოტიკული საშუალებების თავისუფლად გაყიდვის სხვა ფაქტებიც დაფიქსირდა, კონკრეტულად, თეატრის მიმდებარე ტერიტორიაზე, თუმცა, სამართალდამცავებს ნარკორეალიზატორები დღემდე არ დაუკავებიათ.
წყაროს ინფორმაციით, სწორედ ნარკოტიკების რეალიზაციასთან დაკავშირებულ საქმეს შეეწირება ჯაფარიძის სავარძელი. თუმცა, წყარო ამბობს, რომ სამხარეო პოლიციის უფროსსა და კონსტიტუციური უსაფრთხოების დეპარტამენტის აჭარა-გურიის სამხარეო სამმართველოს მაღალჩინოსნებს შორის დაპირისპირებაა. ჯაფარიძე, ამასთანავე, მინისტრ რამაზ ნიკოლაიშვილის კადრად მოიაზრება.
ჯაფარიძემ, 4 აგვისტოს, “გურია ნიუსს” ფოტორეპორტიორს გიორგი გირკელიძეს ფოტოკამერიდან ფოტოები ამოუშალა _ “ამოშალე ახლავე, არ გაქვს გადაღების უფლება!”, _ უთხრა მან გირკელიძეს მას შემდეგ, რაც ფოტორეპორტიორმა სამმართველოს შენობის წინ ფოტო გადაიღო.
“ახლავე ამოშალე, დროზე! მაჩვენე, ამოშალეთ თუ არა! რა უფლება გაქვთ, რომ ოპერატიულ მასალას იღებთ?! არსებობს მინისტრის ბრძანება, რომლის თანახმადაც არ გაქვთ გადაღების უფლება,” _ მკაცრად გვესაუბრებოდა ჯაფარიძე, თუმცა, შესაბამისი ბრძანების ნომერი, მიუხედავად ჩვენი არაერთგზის მოთხოვნისა, ვერ დაგვისახელა.
მსგავსი ქმედება ჯაფარიძის მხრიდან პირველი შემთხვევა არ ყოფილა _ მან ვიდეო-ფოტო გადაღების შეწყვეტისკენ “გურია ნიუსის” რეპორტიორს 11 ივლისსაც მოუწოდა: “რას მიღებთ? საქართველოს აგენტების გარდა, სხვა მხარდასაჭერი ვერ ნახეთ?!”, _ მიმართა ჯაფარიძემ ჟურნალისტს, რომელიც პოლიციის სამმართველოსთან დაკავებული ფოტორეპორტიორების მხარდასაჭერი აქციის მსვლელობას აფიქსირებდა.
