“გურია ნიუსთან” საუბარში უამრავი მოქალაქე გამოთქვამს აღშფოთებას. ისინი ამბობენ, რომ არასრულყოფილი შეწამვლის შედეგია. ჩვენი ერთ-ერთი რესპონდენტი ოზურგეთის მუნიციპალიტეტის სოფელ დვაბზუში მცხოვრები თიკო ბასილაშვილია:
_ დარწმუნებული ვარ, ყველა თანამდებობის პირი თავის საკუთარ კარმიდამოს შეაწამლინებდა. ისეთი შეგრძნება მეუფლება, რომ ხელისუფლებას არ უყვარს ოზურგეთი და გურია. ამაზე მეტი ეკოლოგიური კატასტროფა რაღაქ გინდათ?! რომელ ტურისტებზეა საუბარი, როცა ელემენტარულად, ბუნება ნადგურდება? აბსოლუტურად “ფეხებზე მკიდია” სიტუაციაა!
გაღმა დვაბზუში ვცხოვრობ და ისეთი მდგომარეობაა, უკვე შეუძლებელია ცხოვრება _ თავზე გვეყრება მატლები, ყველაფერი გადაჭამეს, რაც მწვანეა, წიწვოვანის გარდა, ბალახსაც კი შეესივნენ. მივაკითხე გამგებლის მოადგილეს და ვიკითხე, თუ რატომ არ ხდება შეწამვლა. ასე მითხრა, აპარატები და წამალი დარიგებულია სოფლებზე, რომ თავად მოსახლეობამ შეწამლოსო.
აღნიშნული პრობლემის შესახებ “გურია ნიუსი” ოზურგეთის მუნიციპალიტეტის გამგებლის მოადგილეს ლაშა ღლონტს ესაუბრა:
_ ბატონო ლაშა, თქვენს მიერ ჩატარდა თუ არა მონიტორინგი, მუნიციპალიტეტში ამერიკული პეპლის საწინააღმდეგო ღონისძიების შესამოწმებლად?
_ მონიტორინგი ჩატარდა მხოლოდ პირველ ეტაპზე, მეორე ეტაპისთვის არ გვქონდა ხარჯები გამოყოფილი და არც ჩატარებულა. არც აზრი აქვს, რომ ჩავატაროთ მეორე ეტაპის მონიტორინგი. ამინდებიდან გამომდინარე, მავნებელს განვითარების შესანიშნავი საშუალება მიეცა. ვიცით, რომ ეს თემა თითქმის ყველა სოფელში პრობლემატურია; ჩატარებული ღონისძიებების შესახებ გვაქვს ინფორმაციები სოფლების რწმუნებულებისგან და ვიცით, რა მდგომარეობაცაა.
_ რა დაადგინა პირველმა მონიტორინგმა?
_ პირველმა მონიტორიგმა აჩვენა ძალიან კარგი შედეგი, მუშაობა იყო ეფექტური. მეორე ეტაპისთვის სერიოზული აფეთქება იყო და შესაბამისად, ცუდი სიტუაციაა.
_ შეისწავლეთ თუ არა ცალკეულ სოფელში მავნებლების გამოსვლის დრო, ადგილი და რაოდენობა?
_ რა თქმა უნდა. ამ ინფორმაციას სურსათის უვნებლობის სააგენტო ფლობდა, რწმუნებულები აწვდიდნენ. ძირითად ინფორმაციებს მაინც ისინი იძლევიან.
_ მავნებლების წინააღმდეგ ბრძოლის რომელი მეთოდი ურჩიეთ პირველ ეტაპზე?
_ რეკომენდაციები მათ ყოველ წელს ეძლევათ. რიგდება ბუკლეტები, სადაც აღწერილია, როგორ ებრძოლოს საზოგადოება მწერებს, როგორ ჩაატაროს მექანიკური სამუშაოები. სამინისტროს მიერ გამოგზავნილი შესაწამლი მანქანა, გადასროლილი იქნა აღმოსავლეთ საქართველოში, იტალიური კალიების შემოსევის გამო. ჩვენ მარტო “სოლო აპარატებით” ვმუშაობდით.
_ რა თანხები იყო გამოყოფილი სამინისტროს მიერ და რა რაოდენობით გამოყო მუნიციპალიტეტმა?
_ მუნიციპალიტეტს, ბრძოლის ღონისძიებისთვის 300 ლარი ჰქონდა გამოყოფილი _ აპარატების შესაკეთებლად, რომლებიც რეგულარულად ფუჭდება და რემონტდება, 400 ლარი კი, მონიტორინგისთვის.
_ დაგვიკონკრეტეთ, საერთოდ, რა თანხებზეა საუბარი და როგორ შედეგზე?
_ შედეგი, ეს რომ არ ჩატარებულიყო, მაშინ გენახათ, რა იქნებოდა! ხეებს რომ საერთოდ ფოთოლი აქვს შერჩენილი, ესეც პირველი ეტაპის დამსახურებაა. იმ ადგილებში, სადაც ვერ ჩავატარეთ, რადგან არ იყო სახსრები, უფრო სავალალო მდგომარეობაა. სადაც დამუშავდა მასივები, იქ ბევრად უფრო უკეთესი მდგომარეობაა. თანხებზე, ზუსტად ვერ გეტყვით, მერე დავაჯამებთ და ვნახოთ. სამინისტროდან მე თვითონ ჩამოვიტანე და ეს იყო, თუ არ ვცდები, 17 500 ლარის ოდენობის პრეპარატები და უსაფრთხოების ტანსაცმელი, ნიღბები, ხელთათმანები.
_ რა ნორმატიული აქტით დადგინდა, რომ წამლობა უნდა ჩატარებულიყო იმ მეთოდით, რა მეთოდითაც ჩატარდა ჩვენთან ?
_ იმ ადგილებზე, სადაც საკურორტო ზონაა, მაგალითად, ურეკი, შეწამვლა მოხდა მანქანებით. პირველი ეტაპისთვის ნატანების და ქალაქის დამუშავება მოხდა. შრომა, მერია, ხვარბეთი და ქალაქი დამუშავდა მთლიანად; მერე დაემატა დვაბზუ.
_ ჩატარდა თუ არა, წამლობის პირველი ეტაპი სრულად ოზურგეთის მუნიციპალიტეტში? თუ არ ჩატარდა, რატომ?
_ ყველა სოფელში იმიტომ არ ჩატარდა, რომ არც საკმარისი ფინანსები და არც პრეპარატები გვქონდა. ივანიშვილი გვაფინანსებდა ხელფასებით, ვინც “სოლო აპარატებზე” მუშაობდა და პლუს ამას, საწვავს, ბენზინს და ზეთს გვაძლევდა. წინა წლებში, იგი მთლიანად აფინანსებდა პირველ ეტაპს.
_ მოსახლეობა პრეტენზიას გამოთქვამს, უხარისხოდ შესრულებული სამუშაოების და დაგვიანებული შეწამვლის გამო.
_ ეს არ არის მართალი. არავითარი დაგვიანება არ ყოფილა _ წინააღმდეგ შემთხვევაში, ხილის მოსავალს საერთოდ ვერ აიღებდა მოსახლეობა; უბრალოდ, გაზაფხული გვიან დაიწყო წელს, ტემპერატურა იყო დაბალი და ამიტომ არ გამოვიდა ადრე მავნებელი. არასრულყოფილებას რას ეძახიან, ვერ გეტყვით. როცა მიდიოდა შესასხურებლად წარმომადგენელი, მას ჰქონდა ლიმიტი, რა რაოდენობის ფართობი უნდა დაემუშავებინა. ეს გათვლილია და როცა იყო დაძალებები, მთლიანად შემიწამლეო, ბუნებრივია, ამის საშუალება არ იყო. შეიძლება, ადამიანს სამი ჰექტარი ჰქონდეს მიწა და მთლიანად შესაწამლი ყოფილიყო, მაგრამ ამის სახსრები არ არსებობს. ამიტომ, მოსახლეობა მექანიკური საშუალებებით უნდა ებრძოლოს მავნებელს თავის კარმიდამოში. ოზურგეთში კი არა და, უკვე ამერიკაშიც აღარ ებრძვიან _ ელოდებიან, ბუნება როდის გადააშენებს თავისით. აზრი არ აქვს უკვე, იმდენ ეტაპად დებს კვერცხს. 4-5-ჯერ უნდა დამუშავდეს და ეს წარმოუდგენელია ჩვენი ფინანსებით.
_ მცენარეთა დაცვის სამსახურის მუშაობა რა კავშირშია მუნიციპალიტეტის მუშაობასთან?
_ კოორდინირებულად ვმუშაობდით. გვქონდა ყოველდღიური კონტაქტი, მაქსიმალურად ვცდილობდით, ის რესურსები, რაც გვქონდა, გამოგვეყენებინა. წლევანდელი ბრძოლა ამით ამოიწურა _ სხვა საშუალებები ჩვენ არ გვაქვს.
სურსათის ეროვნული სააგენტოს გურიის რეგიონული სამმართველოს სპეციალისტი მადონა ჩიტაიშვილი “გურია ნიუსთან” საუბარში აღნიშნავს, რომ პირველ თაობაზე წამლობითი ღონისძიება ჩატარდა “სოლო აპარატებით”, ჩამოუტანიათ სპეციალური მანქანებიც.
_ დრო და დოზირება ჩვენზეა დამოკიდებული, მაგრამ სად უნდა გავაკეთოთ, ჩვენზე არ არის დამოკიდებული. ეს იყო ივანიშვილის კეთილი ნება, დახმარებოდა რეგიონს. სოფლის მეურნეობის სამინისტროს მისთვის თანხები არ გამოუყვია, არც ადგილობრივი ბიუჯეტიდან მიუციათ რაიმე. მეორე თაობაზე რომ ღონისძიება დაიგეგმა, თანდათან შემცირდა დაფინანსება, რაც იმის ბრალი იყო, რომ ყველა სოფელში ვერ ჩატარდა შეწამვლა. ძირითადად, სადაც უფრო ძლიერ იყო გავრცელებული, შევეცადეთ, რომ იმ სოფლებში ჩაგვეტარებინა. ეს არის ქვედა ზონა, ზღვისპირა მხარე.
_ სწორედ იმ ზღვისპირა ზოლშია ცუდი სიტუაცია…
_ კი, ცუდი სიტუაციაა, იმდენად ძლიერია ეს მავნებელი. ყოველ მეოთხე წელს ამ მავნებელს აქვს მაქსიმალური განვითარების პერიოდი და ეს წელიც დაემთხვა.
_ მიაწოდეთ თუ არა მოსახლეობას ინფორმაცია შეწამვლის დროს?
_ მოსახლეობამ ჩვენზე უკეთ იცის, რა მეთოდით უნდა ებრძოლოს ამ მავნებელს. ამასწინათ, ლანჩხუთზე იყო გადაცემა; შეგვჭამეს პეპლებმაო… ქალი იდგა თავისზე დაბალ ხესთან და აკეთებდა კომენტარს, ეს ხე პეპლებმა შეჭამაო. სანამ მავნებელი შეგვჭამს, ადამიანმა უნდა ებრძოლოს მექანიკური ხერხით. თუ ხელით მივწვდებით, სამინისტროს და ხელისუფლებას არ უნდა მოვთხოვოთ, დამეხმარეო _ უნდა მოჭრა და დაწვა, ძალიან ინერტულია ამ მხრივ მოსახლეობა.
P.S. ოზურგეთში გავრცელებული ინფორმაციით, ბიძინა ივანიშვილი, მომავალ წელს აღარ აპირებს კვლავ დააფინანსოს მავნებელთან ბრძოლის ღონისძიებები. ეს არც არის გასაკვირი, რადგან არავინ იცის რას ხმარდება გაღებული სახსრები; ისიც გაუგებარია, რატომ არ იბერტყავს ყურს ძვირადღირებული კონცერტებით გართული საქართველოს ხელისუფლება ან რატომ “ხარჯავს” სოფლის მეურნეობის სამინისტრო მხოლოდ უსარგებლო სიმინდის თესლში 60 მილიონ ლარს, როცა დასავლეთ საქართველოში უკიდურესად მძიმე სიტუაციაა შექმნილი და ეკოლოგიური კატასტროფა სახეზეა!
