ჩოხატაურის მუნიციპალიტეტში, ბუკისციხის ადმინისტრაციულ ერთეულში შემავალი სოფლები _ დაბლაციხე და იანეული ერთმანეთს საფეხმავლო ხიდით უკავშირდებოდა. ახლა აქ სამანქანე ხიდი გაკეთდა, რომლის მშენებლობაც 2 430 876 ლარი დაჯდა.
აღნიშნული სოფლები მდინარე სუფსას ხეობაში მდებარეობს. ამ მონაკვეთზე არსებული ხიდები უზრუნველყოფს სოფლების კავშირს ერთმანეთთან და ცენტრალურ მაგისტრალთან. აღსანიშნავია, ისიც, რომ მდინარე სუფსაზე არსებული ხიდები ხშირად ზიანდება ადიდებული მდინარის ან სტიქიის გამო.
2014 წლის აღწერის მიხედვით, სოფელ ბუკისციხეში 341 კაცი ცხოვრობს, იანეულში _ 385, დაბლაციხეში _ 279 (წყარო: ვიკიპედია).
ჩოხატაურის წინა მოწვევის საკრებულოს დეპუტატი პარტია “გახარია საქართველოდან” გოგი ბოლქვაძე ჩვენს კითხვაზე, თუ როგორ აფასებს ამ მასშტაბურ პროექტს, გვპასუხობს:
_ ხიდის მშენებლობა, ერთი შეხედვით, შესაძლოა ზედმეტად ჩანდეს, რადგან ახლომახლო უკვე არსებობს მოქმედი გადასასვლელი, თუმცა, ჩვენ უნდა ვიფიქროთ არა მხოლოდ დღევანდელ დღეზე, არამედ მომავალზე. ეს ხიდი არის ინფრასტრუქტურული სარეზერვო ობიექტი იმ შემთხვევაში, თუ ძველი ხიდი დაზიანდება _ ამ შემთხვევაში ორი სოფელი _ ბუკისციხე და იანეული აღარ მოექცევა იზოლაციაში. გარდა ამისა, ახალი ხიდი ნიშნავს უსაფრთხოებას, განვითარებას და მომავალში მეტი შესაძლებლობის შექმნას იმ რაიონისთვის, სადაც დღეს მოსახლეობა მცირეა, მაგრამ პოტენციალი დიდი.
მართალია, სადაც ხიდი აშენდა დღეს მოსახლეობა ცოტაა, მაგრამ ხვალ, შესაძლოა, ეს გზა გადამწყვეტი გახდეს. მე, პირადად, ამ ხიდს ასეთი შეხედულებითაც ვაფასებ _ მინდა ყველამ ვისწავლოთ, მიუხედავად განსხვავებული პოლიტიკური შეხედულებების, რომ სტრატეგიული ობიექტების მშენებლობა ქვეყანას აძლიერებს, თუ რამ კორუფციული ან სხვა დანაშაულებრივი მოტივი უდევს მას სარჩულად, რასაც, იმედია, არ დატოვებენ გამოუძიებელს _ საკუთარ ხალხს იჭერენ, ზოგ შემთხვევაში ისეთებსაც კი, რომლებსაც საქმის მეტი არაფერი უკეთებიათ.
_ ბატონო გოგი, თქვენ საკრებულოს წევრი იყავით მაშინ, როცა ამ ხიდის მშენებლობაზე დაიწყო საუბარი და გახორციელდა კიდეც.. თქვენ რა ინფორმაცია გაქვთ, რით იყო განპირობებული ასეთი მასშტაბური ხიდის აშენება?
_ დიახ, მაშინ საკრებულოს წევრი ვიყავი და კარგად მახსოვს ის პერიოდიც, როცა ხიდის მშენებლობის განხილვა მიმდინარეობდა. პროექტი გაკეთდა იმ მიზნიდან გამომდინარე, რომ ალტერნატიული გზა ყოფილიყო იმ შემთხვევაში, თუ არსებული ხიდი დაზიანდებოდა ან შეზღუდული გახდებოდა მოძრაობა. და კიდევ _ ამ ხიდს ექნებოდა დროისა და ხარჯის დაზოგვის ფუნქცია იანეულის მოსახლეობისთვის. შესაძლოა, დღეს ბევრს მოეჩვენოს, რომ ამ მასშტაბის მშენებლობა ოდნავ გადაჭარბებულია იმ ადგილისთვის, მაგრამ გრძელვადიან პერსპექტივაში მსგავსი ინფრასტრუქტურული ობიექტები ხშირად ამართლებს უსაფრთხოებისა და განვითარების თვალსაზრისით. მთავარია, რომ ხიდი მომავალში რეალურად მოემსახუროს მოსახლეობას.
ინფორმაციისთვის, აღნიშნული ხიდი სტიქიის სალიკვიდაციო თანხებით გაკეთდა.
დაბლაციხე-იანეულის დამაკავშირებელი ხიდის აშენების შესყიდვის შესახებ ელექტრონული ტენდერი აუქციონის გარეშე ჩოხატაურის მუნიციპალიტეტის მერიამ 2024 წლის 17 ივნისს გამოაცხადა. შეთავაზებების მიღება 2024 წლის 3 ივლისს დაიწყო, ხოლო 8 ივლისს შეწყდა. ტენდერის გამარჯვებული, რომლის შესყიდვის სავარაუდო ღირებულება 2 430 890 ლარი იყო, შპს “სახარია” გახდა, სამუშაოების მიმდინარეობისას ტექნიკურ ზედამხედველობას კი შპს “ჯეოექსპერტი” ახორციელებდა.
ხელშეკრულების მოქმედების ვადა განისაზღვრა ხელშეკრულების დადების დღიდან 2024 წლის 1 აგვისტოდან 2025 წლის 30 აპრილამდე, გარდა ხელშეკრულებით განსაზღვრული იმ ვალდებულებებისა, რომელთა არსებობაც არ არის დამოკიდებული ხელშეკრულების მოქმედების ვადაზე.
თუმცა აპრილის დასაწყისში, ჩოხატაურის მაშინდელი მერის, დავით შარაშიძის პირველი მოადგილე მაია კუტუბიძე გადაცემაში “მაესტრო რეგიონები” აცხადებდა, რომ სტიქიამ ხიდის მშენებლობის ვადაზე ადრე დასრულებას ხელი შეუშალა:
“მთავრობის მიერ ამ ხიდის გასაკეთებლად 2 430 876.71 ლარი იყო გამოყოფილი. რომ არა ეს სტიქია აღნიშნული პროექტი უკვე დასრულებული იქნებოდა. დარჩენილია 263 450 ლარამდე ღირებულების სამუშაო, რომელიც მიმდინარე თვეში დასრულდება და გვექნება კარგი, მაღალი ხარისხის ინფრასტრუქტურა, რომელიც დააკავშირებს ორ სოფელს ერთმანეთთან და რომელიც მნიშვნელოვანი და მოთხოვნადი იყო მოსახლეობისგან“, _ განაცხადა 7 აპრილს მაია კუტუბიძემ.
როგორც ხელშეკრულებაში ვკითხულობთ, შესრულებული სამუშაოს საგარანტიო ვადა საბოლოო მიღება-ჩაბარების აქტის გაფორმებიდან 3 წელს შეადგენს.
როგორც tendersmonitors.ge-ს გვერდიდან ირკვევა, შპს “სახარიას” ერთპიროვნული მმართველი და 100%-იანი წილის მფლობელი დავით პაიჭაძეა.
აღნიშნულ კომპანიას, დღეის მდგომარეობით, სულ მონაწილეობა მიღებული აქვს 137 ტენდერში. აქედან 75 მოიგო, ხოლო 56 წააგო. 4 არ შედგა, ხოლო 2 მიმდინარეა.
მოგებული ტენდერების საერთო სავარაუდო ღირებულება 93 993 850 ლარია. მოგებული კონტრაქტების საერთო ღირებულება 85 167 266.71 ლარი. დანაზოგი 9.39%.
დავით პაიჭაძემ 2017 წელს “ქართულ ოცნებას” 30 000 ლარი შესწირა. გარდა ამისა, ის შპს “ირეუს” 50%-იანი წილის მფლობელია, რომელსაც 2021 წელს გამოქვეყნებული დოკუმენტების თანახმად, შემოსავლების სამსახურის შეტყობინების საფუძველზე 2019 წელს ყადაღა დაადეს. ამის შემდეგ კომპანიის ამონაწერი აღარ განახლებულა.
ამ დროისთვის, მოქალაქეები ხიდით ჩვეულებრივად სარგებლობენ, თუმცა, ოფიციალური ინფორმაცია ხიდის გახსნის შესახებ მერიის გვერდზე არ იძებნება.
მერიის პრესსამსახურში გვპასუხობენ, რომ ხიდი დასრულებულია, თუმცა, ხიდის გახსნა არ გაუშუქებიათ.
ავტორი
