,,ახლა შეტანილი სარჩელი მიზნად ისახავს ზუსტად იმავე სქემის დატრიალებას, რაც მოხდა რუსთავი 2-ში თავის დროზე – ყადაღის დადებას წილებზე, შესაძლოა, დროებითი მმართველის შეშვებას ფორმულაში“, – ასე გამოეხმაურა მთავარი არხის დირექტორი, ნიკა გვარამია თავდაცვის სამინისტროს მიერ ტელეკომპანია “ფორმულას” დამფუძნებლის, დავით კეზერაშვილის წინააღმდეგ სასამართლოში სარჩელის შეტანას.
“სრულიად ნათელი გახდა, რატომ გამოიტანა გამამტყუნებელი განაჩენი სასამართლომ აბსოლუტურად წარმოუდგენელ სამართლებრივ ვითარებაში. ახლა შეტანილი სარჩელი 5 მილიონის ოდენობით, მიზნად ისახავს ზუსტად იმავე სქემის დატრიალებას, რაც მოხდა რუსთავი 2-ში თავის დროზე – ყადაღის დადებას წილებზე, შესაძლოა, დროებითი მმართველის შეშვებას ფორმულაში და ასე შემდეგ.
კარგად იცოდეს ყველამ, „რუსთავი 2“ ამ ქვეყანაში აღარ განმეორდება, გამორიცხულია. დავიცავთ, ამჯერად უკვე ფორმულას, ყველა ერთად”, _ განაცხადა ნიკა გვარამიამ მთავარი არხის ეთერში.
ცნობისთვის, საქართველოს თავდაცვის სამინისტრომ ყოფილი თავდაცვის მინისტრის, დავით კეზერაშვილისა და მისი თანამდებობაზე ყოფნის დროს სახელმწიფო შესყიდვების დეპარტამენტის უფროსის, ალექსანდრე ნინუას წინააღმდეგ საქალაქო სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ “დანაშაულებრივი ქმედებით მიყენებული ზიანის” ანაზღაურებას ითხოვენ.
შეგახსენებთ, რომ 7 სექტემბერს უზენაესმა სასამართლომ ყოფილ მაღალჩინოსანსა და ტელეკომპანია ფორმულას დამფუძნებლს, დავით კეზერაშვილს 5-წლიანი პატიმრობა მიუსაჯა. როგორც კერზერაშვილის ადვოკატმა განაცხადა, რომ თავდაცვის ყოფილ მინისტრს, პროკურატურა საწვრთნელ პროექტში 5 მილიონზე მეტი თანხის გაფლანგვას ედავებოდა, თუმცა, მას ბრალი ვერ დაუმტკიცდა ვერც საქალაქო და ვერც სააპელაციო სასამართლოში.
[sexy_author_bio]
