პოლიტოლოგი ვახტანგ ძაბირაძის განცხადებით, მმართველი გუნდი დაშლისთვის არის განწირული, რაც, მისი განცხადებით, ქართული პოლიტიკის ტრადიციის ნაწილია. როგორც პოლიტოლოგი აცხადებს, 2020 წელს მმართველი გუნდი საბოლოოდ ორად გაიყოფა.
,,ის, რაც დღეს ,,ქართულ ოცნებაში“ ხდება, ქართული პოლიტიკაში ტრადიციად იქცა, მოყოლებული 90-იანი წლებიდან ეს პროცესი ერთი ერთში მეორდება. ყველა პოლიტიკური ძალა ხელისუფლებაში მოდის ბლოკის სახით, შემდეგ კი ეს ბლოკი იშლება. თუ გახსოვთ, მოქალაქეთა კავშირი დაიშალა და მივიღეთ ,,ნაციონალური მოძრაობა“, შემდეგ კი ,,ნაციონალური მოძრაობაც“ დაიშალა“,_ განაცხადა ძაბირაძემ.
_ ბატონო ვახტანგ, როგორც მმართველი გუნდის წევრმა ბექა ნაცვლიშვილმა განაცხადა, იმ შემთხვევაში თუ ,,ქართულ ოცნებაში“ მნიშვნელოვან საკითხებთან დაკავშირებით შეთანხმებას ვერ მიაღწევს, შესაძლოა, მმართველი გუნდი დატოვოს. ,,ქართული ოცნების“ შესაძლო დატოვებაზე განცხადება გააკეთა ზაზა პაპუაშვილმაც. ფიქრობთ, რომ წინამორბედების მსგავსად მმართველი გუნდიც დაიშლება?
_ გარემო არ იცვლება, სამწუხაროდ, საზოგადოებრივ-პოლიტიკური ვითარება არის ერთნაირი. ყველაფერი, რაც კი ხდება, მეორდება და სხვაგვარად როგორ წარმოგიდგენიათ?! რა თქმა უნდა, ეს პროცესი მოსალოდნელი იყო და გაგრძელდება, დეპუტატებმა რამდენიც უნდა ილაპარაკონ და ეცადონ, რომ შეინარჩუნონ ერთიანობა, ვერ მოხერხდება და ალბათ, 2020 წლისთვის მივიღებთ გაყოფილ ,,ქართულ ოცნებას“, გუნდში არის ამის დამადასტურებელი სერიოზული ნიშნები. ,,ქართული ოცნების“ შიგნით ჩამოყალიბდნენ ჯგუფები, რომლებიც იბრძვიან ძალაუფლებისთვის, ბრძოლაში კი გაიმარჯვებს ერთი და დანარჩენი გადავა ოპოზიციაში. ასეთ ვითარებას მივიღებთ ძალიან მალე.
