"ფაქტია, რომ ეწეოდნენ მოსახლეობის მოსყიდვას _ პურის ფქვილს და აზოტს ურიგებდნენ, ასევე, ხელისუფლება წინასაარჩევნოდ ადმინისტრაციულ რესურსს იყენებს. ამის 
ნათელი მაგალითია ის, რომ არჩევნების პერიოდში შტატგარეშე თანამშრომლებს ამატებენ როგორც გამგეობაში, ასევე ა(ა)იპ-ებში", _ ამბობს ლანჩხუთის გამგებლობის ერთ-ერთი კანდიდატი ბარნაბ ჭყონია.
"პატრიოტთა ალიანსის" შტაბის პრესსამსახურის წარმომადგენლის დარეჯან ბურჭულაძის განცხადებით, ტერიტორიულ ორგანოებში წინასაარჩევნოდ სხვადასხვა სამსახურებში დასაქმების ფაქტები შეიმჩნევა. მისივე განცხადებით, ეს ირიბად ამომრჩევლის მოსყიდვაა.
_ შეგიძლიათ, გადაამოწმოთ, ზოგიერთ ტერიტორიული ორგანოს რწმუნებულს რამდენი თანაშემწე ჰყავდა და ახლა რამდენი ჰყავს. მათი უმრავლესობა ხელშეკრულებით არის აყვანილი. რასაც ებრძოდა "ოცნება" "ნაციონალების" დროს, წინასარჩევნოდ იმას აკეთებს, _ ამბობს დარეჯან ბურჭულაძე.
მის მიერ გადმოცემული სიის მიხედვით, მუნიციპალიტეტის მასშტაბით, 15 აპრილის შემდეგ, დასაქმებულია 50 ადამიანი, 4 მათგანი ახალი აყვანილია, დანარჩენ 46-ს ხელშეკრულება გაუგრძელდა. გამგეობასა და ტერიტორიულ ერთეულებში, ძირითადად, აყვანილები არიან სპეციალისტები, დამლაგებლები, ზედამხედველები, დარაჯები და ერთი ელექტრიკოსი. რაც შეეხება ა(ა)იპ -ებს, იქ აყვანილია 6 მაშველი და გრიგოლეთის ბაზაზე ორი დარაჯი. შტატგარეშედ დასაქმებულთა სახელფასო სარგო 100 ლარიდან 420 ლარამდე მერყეობს, თუ არ ჩავთვლით ერთ გამონაკლის შტატს, რომლის ხელფასი 800 ლარია.
"პატრიოტთა ალიანსის" შტაბის მოსაზრებას არ იზიარებს ლანჩხუთის გამგეობა და აცხადებს, რომ კადრების დამატება სამსახურებრივი აუცილებლობით იყო გამოწვეული.
გამგეობის პრესსამსახურის უფროსის მაკა სულაბერიძის თქმით, 15 აპრილიდან დღემდე 50 თანამშრომელი მართლაც არის აყვანილი სამუშაოდ: "15 აპრილიდან დღემდე, შტატგარეშედ აყვანილია 50 ადამიანი. აღსანიშნავია, რომ აქედან 45 მათგანი დასაქმებული იყო მთელი წლის განმავლობაში, მაგრამ ხელშეკრულების ვადის გაგრძელება დაემთხვა აღნიშნულ პერიოდს. რაც შეეხება 3 პიროვნებას, ზღვის სეზონის გამო, გრიგოლეთში საჭირო გახდა მეხანძრე-მაშველების დამატება (შეიძლება დაემატოს კიდევ რამდენიმე), ხოლო 2 თანამშრომელი სამსახურებრივი აუცილებლობის გამო იქნა აყვანილი", _ ამბობს მაკა სულაბერიძე.
"ახალგაზრდა იურისტთა ასოციაციის" ოზურგეთის ოფისის ადვოკატი ჯაბა ზერეკიძე ამბობს, რომ, "
