ფინანსთა სამინისტროს საგამოძიებო სამსახურმა სამსახურეობრივი მდგომარეობის გამოყენებით, სახელმწიფო ბიუჯეტის კუთვნილი დიდი ოდენობის თანხების გაფლანგვის ბრალდებით გიგი უგულავა სისხლის სამართლის პასუხისგებაში მისცა. მას ბრალი დღეს, 30 ივნისს წარედგინა.
"თბილისის მერმა გიგი უგულავამ ცენტრალური ბიუჯეტის განზრახ იგნორირებით კანონთან შეუსაბამო ბრძანების საფუძველზე სიტი პარკისთვის დამატებითი შეღავათების დაწესებით კომპანიის სასარგებლოდ მთლიანობაში გაფლანგა სახელმწიფოს კუთვნილი დიდი ოდენობით თანხა: 1 086 718 ლარი. საქმეზე გამოძიება გრძელდება სისხლის სამართლის კოდექსის 182-ე მუხლის მეორე და მესამე ნაწილებით, რაც სასჯელის სახედ და ზომად თავისუფლების აღკვეთას 7-დან 11 წლამდე ვადით ითვალისწინებს", – აცხადებენ ფინანსთა სამინისტროს საგამოძიებო სამსახურში.
სიტი პარკსა და თბილისის მერიას შორის ხელშეკრულება 2007 წელს გაფორმდა. სწორედ ამ ფაქტთან დაკავშირებულ საკითხებზე ედავება საგამოძიებო სამსახური უგულავას.
ჯერ კიდევ რამდენიმე თვის წინ, ორგანიზაცია "ახალგაზრდა ადვოკატები" თბილისის მთავრობასა და კომპანია "C.T.PARK"-ს შორის დადებული ხელშეკრულების გასაჯაროებას მოითხოვს. როგორც ადვოკატებმა "გურია ნიუსს" განუცხადეს, კომპანიასა და თბილისის მერიას შორის, 2007 წლის 7 დეკემბერს გაფორმებული ხელშეკრულება, რომლის თანახმადაც, კომპანიას თბილისის მერიამ დედაქალაქში პარკირების სფეროს მართვის უფლება იჯარით 2024 წლის 31 დეკემბრამდე გადასცა, კონფიდენციალურია, რაც არღვევს საჯარო ინტერესს და კითხვებს აჩენს შესაძლო კორუფციულ გარიგებებზე.
"თბილისის მთავრობასა და კომპანია C.T.PARK“ შორის გაფორმებული ხელშეკრულების საფუძველზე, მხარეები ვალდებულნი არიან არ გაამჟღავნონ ყველა დოკუმენტაციის შინაარსთან დაკავშირებული ნებისმიერი ინფორმაცია." – ნათქვამია კომპანიის მიერ გამოგზავნილ პასუხში.
ორგანიზაციამ ხელშეკრულების მოწოდებაზე თბილისის მთავრობასაც მიმართა, თუმცა მოთხოვნილი ინფორმაცია არც დედაქალაქის მერიამ გაასაჯაროვა.
"ახალგაზრდა ადვოკატებმა" მონიტორინგის ფარგლებში, კომპანია C.T.PARK–ს შემდეგი მნიშვნელოვანი ინფორმაციის გამოთხოვის მიზნით მიმართა:
-
2014 წლის იანვრის მდგომარეობით, რამდენი მოქალაქე ფლობდა ქ. თბილისის ტერიტორიაზე პარკირებისთვის დადგენილ ერთწლიანი მომსახურების პაკეტს, რომელიც შეადგენს 50 ლარს?!
-
2014 წლის იანვრის მდგომარეობით, რამდენი მოქალაქე ფლობდა ქ. თბილისის ტერიტორიაზე პარკირებისთვის დადგენილ 6 თვიან მომსახურების პაკეტს, რომელიც შეადგენს 25 ლარს?!
-
2014 წლის იანვრის მდგომარეობით, რამდენი მოქალაქე ფლობდა ქ. თბილისის ტერიტორიაზე პარკირებისთვის დადგენილ 1 კვირის მომსახურების პაკეტს, რომელიც შეადგენს 4 ლარს?!
-
როგორია შპს "სი-ტი პარკ"–ის ერთი სტატისტიკური თვის მაჩვენებელი – არსებული მონაცემით, ერთი თვის მანძილზე, რამდენი ავტომობილის მიმართ ხდება საჯარიმო ღონისძიების გატარება?!
-
არსებული მონაცემით, ერთი თვის მანძილზე, რამდენს შეადგენს საჯარიმო ღონისძიების შედეგად მიღებული თანხა?
-
გეგმავს თუ არა "სი-თი პარკი" 2014 წლის მანძილზე, თბილისში ახალი საპარკინგო ზოლის შექმნას, როგორია კომპანიის მოკლევადიანი და გრძელვადიანი გეგმა თბილისში საპარკინგო ზოლის განვითარებასთან დაკავშირებით და რამდენი პარკირების ადგილი არსებობს თბილისის მასშტაბით
თბილისის მერიის წერილის თანახმად, კომპანია C.T.PARK–მა, 2011–2013 წლების მონაცემებით, ადგილობრივი ბიუჯეტის სასარგებლოდ, 15 451 658,42 ლარი გადაიხადა.
ასეთი ფინანსური მაჩვენებელი იმ რეალობის გათვალისწინებითაა, როდესაც თბილისში, ფაქტობრივად, პარალიზებულია საპარკინგო სისტემის ფუნქციონირება, მძღოლები ყიდულობენ პარკირების პაკეტს, თუმცა საპარკინგო ადგილი იმდენად მცირეა, შეუძლებელი ხდება მომსახურების მიღება.
იურისტების განმარტებით, კამათის საგანს იწვევს კომპანიის მხრიდან მძღოლების დაჯარიმების ფაქტების სამართლიანობაც, მაშინ, როდესაც 2014 წლის 22 მარტის თბილისის საქალაქო სასამართლოს გადაწყვეტილების თანახმად, უკონონოდ იქნა ცნობილი სატრანსპორტო საშუალების სპეციალურ სადგომზე გადაყვანა და გაუქმდა საჯარიმო ქვითარი, რადგანაც C.T.Park-ი მხედველობაში არ იღებდა გარემოებას, ფერხდებოდა თუ არა საგზაო მოძრაობა, ან ექმნებოდა თუ არა პრობლემა გზის უსაფრთხოებას, რითაც მნიშვნელოვნად აზიანებდა სატრანსპორტო საშუალების მესაკუთრეთა ინტერესებს, მათ შორის აყენებდა მატერიალურ ზიანს, რაც ცალსახად წარმოადგენდა კომპანიისთის შემოსავლის გაზრდის მთავარ საშუალებას.
ამ კითხვებზე პასუხის გაცემა გიგი უგულავას მოუხდება. საქმეზე გრძელდება გამოძიება საქართველოს სისხლის სამართლის კოდექსის 182-ე მუხლის მეორე და მესამე ნაწილებით, რაც სასჯელის სახედ და ზომად ითვალისწინებს თავისუფლების აღკვეთას 7-დან 11 წლამდე ვადით.
