საქართველოს ევროპასთან ასოცირების შეთანხმების ხელშეკრულების ხელმოწერის შემდეგ, აფხაზეთის დე ფაქტო ხელისუფლებამ, ადგილობრივ ინტერნეტგამოცემა "apsnypress.info"-ში განცხადება გამოაქვეყნა, სადაც საუბრობენ, რომ "ევროპული არჩევანი", მხოლოდ საქართველოს ხელისუფლების პასუხისმგებლობა და არჩევანია. აფხაზეთს, როგორც მეზობელ, სუვერენულ დამოუკიდებელ ქვეყანას, ამასთან არანაირი კავშირი არ აქვს".
ასევე ამბობენ, რომ ბრიუსელისა და თბილისის გაღრმავებული ურთიერთობები, პოლიტიკურ-ეკონომიკური უსაფრთხოებისა და გეოპოლიტიკური კუთხით, ვერანაირ გავლენას ვერ მოახდენს აფხაზეთში. დე ფაქტო ხელისუფლება სტრატეგიულ პარტნიორობას შესთავაზებს რუსეთის ფედერაციას.
რა პასუხი აქვს აფხაზეთის დე ფაქტო ხელისუფლების განცხადებაზე საქართველოს მთავრობას, ამასთან დაკავშირებით "გურია ნიუსი" შერიგებისა და სამოქალაქო თანასწორობის საკითხებში სახელმწიფო მინისტრს პაატა ზაქარეიშვილს ესაუბრა.
_ ბატონო პაატა, "ევროპული არჩევანი" – მხოლოდ საქართველოს ხელისუფლების პასუხისმგებლობა და არჩევანია. აფხაზეთს, როგორც მეზობელ, სუვერენულ დამოუკიდებელ ქვეყანას ამასთან არანაირი კავშირი არ აქვს." რა შეფასებას მისცემთ აფხაზეთის დე ფაქტო ხელისუფლების მხრიდან ასეთ განცხადებას?
_ ამ თემას აფხაზეთის რეგიონთან კავშირი რომ არ ჰქონოდა, დე ფაქტო ხელისუფლება ამ ტიპის განცხადებებს არ გააკეთებდა, ისინი აშკარად მიხვდნენ, რომ ეს მათაც ეხებათ. განცხადებით, რომ "საქართველოს ევროპულ არჩევანთან აფხაზეთს კავშირი არ აქვს", დე ფაქტო ხელისუფლებამ დაადასტურა, რომ კავშირი სწორედაც რომ არის. ეს ნიშნავს იმას, რომ აფხაზური საზოგადოებისთვის ეს დამაფიქრებელი თემაა. ჩვენ არ უნდა გადავუხვიოთ ევროპული ინტეგრაციის ხაზიდან, რადგან ეს აშკარად შემოიტანს რეგიონში არსებული პოლიტიკის ალტერნატივას ევროპული პოლიტიკის სახით. ვფიქრობ, რამდენიმე წლის შემდეგ აფხაზურ საზოგადოებაში ევროპასთან მიმართებაში სრულიად სხვაგვარი განწყობა იქნება. ადამიანები ხმელთაშუა ზღვაში სიკვდილზეც კი მიდიან იმისთვის, რომ ევროპაში მოხვდნენ, მათი არჩევანია – ან სიკვდილი, ან ევროპა. ამ ფონზე, როცა ევროპა მიუკაკუნებს აფხაზურ საზოგადოებას კარზე, მათ არ ექნებათ არჩევანი სიკვდილსა და ევროპას შორის, მათ ექნებათ არჩევანი რუსეთსა და ევროპას შორის საქართველოს საშუალებით.
_ დე ფაქტო ხელისუფლების განცხადებით: "ასოცირების შესახებ შეთანხმებაზე ხელმოწერით ევროკავშირი უახლოეს მომავალში საქართველოს არ მიანიჭებს სახელმწიფოთაშორისი ალიანსში გაწევრიანების პერსპექტივას. მაგრამ, იმავდროულად ხელს უშლის მეზობელ ქვეყნებთან თანამშრომლობას – პირველ რიგში რუსეთის ფედერაციასა და აფხაზეთის რესპუბლიკასთან." რა თანამშრომლობის ხელის შეშლაზე საუბრობს აფხაზეთის დე ფაქტო ხელისუფლება?
_ ეს ალბათ, თავად აფხაზებს უნდა ვკითხოთ, რადგან თანამშრომლობა ფაქტობრივად, არ არსებობს – ჩვენ აფხაზებზე ველაპარაკებით რუსეთს. თავად აფხაზები ცალკე ჩართულები არსად არ არიან, ისინი შედიან რუსულ კონტექტში ჟენევის დისკუსიებზე. ეს ფორმატი შექმნილია რუსეთ–საქართველოს კონფლიქტიდან გამომდინარე სარკოზი–სააკაშვილისა და სარკოზი–მედვედევის ხელშეკრულებების შესაბამისად და მოიცავს საქართველო–რუსეთის ურთიერთობებს. ამ ფონზე არ არსებობს სხვა ფორმატი, რომელშიც აფხაზები იქნებოდნენ ჩართულები. ჩვენ ღია ვართ აფხაზებთან პირდაპირი დიალოგისთვის და ეს არაერთხელ დაგვიდასტურებია – წინა პრემიერ-მინისტრის დროსაც და ამის შესახებ ირაკლი ღარიბაშვილმაც არაერთხელ განაცხადა. ამის მიუხედავად, ისინი დღემდე რჩებიან რუსეთის ჩრდილის ქვეშ. მათი ეს პოლიტიკა არის მოწყვლადი და უპერსპექტივო, რადგან ყველამ ვნახეთ, რა ხდება უკრაინაში – ყირიმში. ამიტომ მე არ მიმაჩნია, რომ აფხაზური საზოგადოებისთვის რუსეთის პერსპექტივა უკეთესია, ვიდრე ევროპული პერსპექტივა საქართველოს საშუალებით.
_ დე ფაქტო ხელისუფლების თქმით, თბილისისა და ბრიუსელის გაღრმავებული ურთიერთობები, პოლიტიკურ და ეკონომიკური უსაფრთხოების კუთხით ვერანაირ გავლენას ვერ მოახდენს აფხაზეთში. ასევე არანაირ გავლენა არ ექნება გეოპოლიტიკური კუთხით. აფხაზეთი დე ფაქტო ხელისუფლება სტრატეგიულ პარტნიორობას შესთავაზებს რუსეთის ფედერაციას. რა პასუხის აქვს ამაზე საქართველოს ხელისუფლებას?
_ რუსეთი იმაზე მეტი დოზით, რაც უკვე განთავსებულია აფხაზეთის რეგიონში, ვერასოდეს ვერ მოთავსდება. ამიტომ, ცოტა ღიმილის მომგვრელია, როცა საუბარია უფრო მეტ ინტეგრაციაზე, რადგან არსებულზე მეტი ინტეგრაცია აღარ არსებობს. რუსეთი აფხაზეთის რეგიონში ისე იქცევა, როგორც სურს და ბოლო პოლიტიკურმა კრიზისმა ეს დაგვანახა. ამიტომ მე არ მიმაჩნია, რომ არსებითად შეიცვლება რუსეთის ჩართულობა აფხაზეთის რეგიონში არა იმიტომ, რომ რუსეთი ამას არ გააკეთებს, არამედ იმიტომ, რომ უკვე დიდი ხანია ჩართულია იმ დოზით, რომელზე მეტიც შეუძლებელია.
რაც შეეხება ცვლილებებს საქართველოსთვის, მართალია, 1-2 წელიწადში ევროკავშირის წევრი არ გავხდებით, მაგრამ დაიწყო პროცესი, რომელიც აუცილებლად მიგვიყვანს ევროკავშირში და ამას ყველაფერი ადასტურებს. ეს გრძელვადიანი პერსპექტივაა, მაგრამ ეს პერსპექტივა აფხაზებისთვისაც მნიშვნელოვანია და მათაც ვურჩევ, აღიჭურვონ მოთმინებით და მეტი სიკეთეები დაინახონ ევროპაში. ცვლილებები აუცილებლად იქნება და ეს ცვლილებები იქნება მხოლოდ უკეთესობისკენ. საქართველო იქნება უფრო მდგრადი, პასუხისმგებელი და დემოკრატიული ინსტიტუტებით მართული სახელმწიფო, ის გახდება სერიოზული ალტერნატივა რუსული მართვის სისტემისა, რომელშიც დღეს აფხაზები იმყოფებიან.
_ დე ფაქტო ხელისუფლება თვლის, რომ ამიერკავკასიის რეგიონში დასავლური პოლიტიკის – ნატოს გაფართოების გააქტიურებასთან დაკავშირებით, სამხედრო ტექნიკური თანამშრომლობა და სტრატეგიული პარტნიორობა უნდა განაგრძონ რუსეთის ფედერაციასთან, რათა თავიდან აიცილონ შესაძლო საფრთხეები და შეინარჩუნონ რეგიონული სტაბილურობა და უსაფრთხოება.
რა რეგიონულ სტაბილურობაზე და საფრთხეებზე საუბრობს აფხაზეთის დე ფაქტო ხელისუფლება ?
_ ამ კითხვაზე პასუხიც ისევ და ისევ დე ფაქტო ხელისუფლებას უნდა ვკითხოთ. საქართველო გამოდის რუსეთის გავლენიდან და იმიტომ მიისწრაფვის ევროპისკენ და ევროატლანტიკური სივრცისკენ. სწორედ ნატო და ევროატლანტიკური სივრცე არის გარანტია უსაფრთხოებისა – ნატოს წევრი ქვეყნები ერთმანეთში არ ომობენ, განსხვავებით დსთ–ს ქვეყნებისგან. დსთ–ს სივრცეში რამდენიმე მოუგვარებელი კონფლიქტია – ყარაბაღი, რუსეთ–უკრაინა, ასევე დსთ–ში საქართველოს ყოფნისას დაიწყო რუსეთ–საქართველოს კონფლიქტი. ფაქტები მეტყველებენ იმაზე, თუ სად არის უსაფრთხოების გარანტიები და სად არის საფრთხეები. მიმაჩნია, რომ დე ფაქტო ხელისუფლების წარმომადგენლების განცხადება არ შეესაბამება აფხაზურ საზოგადოებაში არსებულ განწყობებს. ჩვენს ხელთ არსებული ინფორმაციით, აფხაზურ საზოგადოებაში ცალსახად ყველას ნამდვილად არ ეშინია ევროპის, თუმცა, მათ აქვთ გარკვეული კითხვები და ჩვენ ამ კითხვებს ვპასუხობთ.
