მოგესალმებით მეგობრებო!
თავს უფლებას მივცემ, ასე მოგმართოთ, იმიტომ, რომ თქვენი სახით მე მყავს ყველაზე ობიექტური და სამართლიანი მეგობრები. თუ ვინმე აქამდე ასე არ ფიქრობდით, დღეს გთხოვთ, რომ ჩამწეროთ თქვენი მეგობრების სიაში და ყოველთვის, რა პოზიციაზეც არ უნდა ვიყო, მითხრათ სიმართლე ისევე შეულამაზებლად, როგორც ამას აკეთებდით აქამდე.
დღეს, სწორედ თქვენი სიმართლისთვის, თქვენი პროფესიონალიზმისთვის მინდა გადაგიხადოთ მადლობა. მე ყოველთვის ვამბობდი და ვიტყვი, რომ ისეთი ძლიერი ჟურნალისტური კორპუსით, როგორიც გურიას ჰყავს, ბევრი ვერ დაიტრაბახებს.
არ დაგიმალავთ და გეტყვით იმასაც, რომ წლების განმავლობაში, ყველაზე ანგარიშგასაწევი მაკონტროლებლები ჩემთვის იყავით თქვენ და ამისთვისაც გიხდით მადლობას.
როცა რომელიმე თქვენგანს ქუჩაში გამოსულს ვხედავ, ზუსტად ვიცი, რომ სადღაც რაღაც ხდება და ისიც ზუსტად ვიცი, რომ ამ ამბავს რამდენიმე წუთში გავიგებ იმ მედიასაშულებებიდან, რომელთაც თქვენ წარმოადგენთ.
მადლობას მოგახსენებთ იმისთვის, რომ მთელი წინასაარჩევნო პერიოდი და არჩევნების დღე გააშუქეთ ობიექტურად და მაღალპროფესიონალურ დონეზე.
დამეთანხმებით ალბათ, რომ ჩვენს ქვეყანაში ჩატარდა დემოკრატიული, კონკურენტული და ევროპული არჩევნები და სწორედ ამის შედეგად მივიღეთ მრავალპარტიული საკრებულოები. კოალიცია "ქართული ოცნების" თანმიმდევრულმა მმართველობამ, განხორციელებულმა საქმეებმა, დემოკრატიული პრინციპების ერთგულებამ, სამართლიანობის დამკვიდრებისკენ სწრაფვამ განაპირობა ის, რომ ხალხს მიეცა საკუთარი პოზიციის სრულად გამოხატვის საშუალება. და მინდა გითხრათ, რომ ამ ყველაფერში თქვენ უზარმაზარი წვლილი მიგიძღვით.
მე თვითმხილველი ვარ იმ თავდაუზოგავი შრომის, ზოგჯერ გმირობის ტოლფასის, რომელსაც წლების განმავლობაში ეწეოდით.
ახალგაზრდა ადამიანები ბრძანდებით და რაც პირადად თქვენ მინდა შეგპირდეთ, არის ის, რომ ყველაფერს გავაკეთებ იმისთვის იცხოვროთ ისეთ ოზურგეთში, საიდანაც არასდროს მოგინდებათ წასვლა.
როგორც ჟურნალისტებს, გპირდებით, რომ თქვენს მიერ დასმული არცერთი კითხვა არ დარჩება უპასუხოდ და თქვენს მიერ დაწერილი არცერთი პრობლემატური სტატია არ დარჩება რეაგირების გარეშე.
გპირდებით, რომ ჩვენი საქმიანობა იქნება ისეთი საჯარო და გამჭვირვალე, როგორც არასდროს. ჩემთვის თქვენი პროფესია გაცილებით მეტია, ვიდრე მეოთხე ხელისუფლება. მე თუ მკითხავთ, თქვენ ხელისუფლების ხელისუფლება ხართ და მოგიწოდებთ, გააგრძელოთ ჩემი გაკონტროლება და არ მომცეთ მოდუნების საშუალება.
დარწმუნებული ვარ, არჩევნების მეორე ტურსაც ისეთივე მაღალპროფესიონალურ დონეზე გააშუქებთ, როგორც ეს გააკეთეთ პირველ ტურზე.
(R)
