ოზურგეთი თვითმმართველი ქალაქი გახდა. მას უკვე ჰყავს ახალი მერი, ბეგლარ სიორიძე. ვინ იქნება ქალაქ ოზურგეთის საკრებულოს თავმჯდომარე და მისი მოადგილე, ოფიციალურად ჯერ არ არის გადაწყვეტილი, თუმცა, ღიად თუ კულუარებში ამაზე უკვე საუბრობენ.
ქალაქის ახალი საკრებულო 2 აგვისტოს შეიკრიბება. ქალაქის მერია, დროებით მუნიციპალიტეტის გამგეობის შენობაში განთავსდება.
"გურია ნიუსის" წყაროს ინფორმაციით, ქალაქ ოზურგეთის საკრებულოს თავმჯდომარე "ქართული ოცნების" სიის მესამე ნომერი გელა კობალაძე გახდება, მისი მოადგილე კი "რესპუბლიკური პარტიის" წევრი, სიით მეორე ნომერი ნინო გოგუაძე იქნება.
ქალაქის საკრებულოს თავმჯდომარეობა სურს დამოუკიდებელ დეპუტატს, ქალაქ ოზურგეთის ყოფილ რწმუნებულს ლევან მგელაძეს. "გურია ნიუსის" წყაროს ინფორმაციით, მას ოპოზიციური პარტიების წარმომადგენელთა გარკვეული ნაწილი უჭერს მხარს.
"გურია ნიუსმა" ინფორმაციები აღნიშნულ პიროვნებებთან გადაამოწმა.
გელა კობალაძემ ჩვენთან საუბრისას აღნიშნა, რომ "ქართული ოცნების" პოლიტსაბჭოზე მის კანდიდატურასთან დაკავშირებით მსჯელობა ნამდვილად მიდის.
_ როგორ გადაწყდება ეს საკითხი, ნამდვილად არ ვიცი. მსჯელობა მიდის. იმედი მაქვს, რომ დეპუტატების უმრავლესობაც მხარს დამიჭერს, _ გვითხრა კობალაძემ.
"რესპუბლიკური პარტიის" წევრი ნინო გოგუაძე ამბობს, რომ, ჯერჯერობით, ამ საკითხთან დაკავშირებით ინფორმაციას არ ფლობს. თუმცა, აღნიშნავს, რომ თუ საკრებულოს თავმჯდომარის პოსტზე გელა კობალაძის კანდიდატურა დასახელდება, დარწმუნებულია, რომ მას დაუჭერენ მხარს.
_ მე და დეპუტატების უმრავლესობა მხარს ბატონ გელა კობალაძის კანდიდატურას დავუჭერთ, ამაში დარწმუნებული ვარ, თუმცა, ჯერჯერობით, გადაჭრით ვერ გეტყვით, ვიქნები თუ არა მოადგილე. ვერც უარვყოფ და ვერც დავადასტურებ ამ ინფორმაციებს, _ გვითხრა ნინო გოგუაძემ.
დამოუკიდებელი დეპუტატი ლევან მგელაძე ამბობს, რომ საბოლოო გადაწყვეტილება, დააყენებს თუ არა საკუთარ კანდიდატურას საკრებულოს თავმჯდომარის პოსტზე, ჯერ არ აქვს მიღებული:
_ ამ ეტაპისთვის ნამდვილად არ ვიცი, რას გადავწყვეტ. არ გამივლია კონსულტაციები დეპუტატებთან ამ თემასთან დაკავშირებით, მეც მყავს მხარდამჭერები.
_ ბატონო ლევან, ანუ თქვენ დააყენებთ თქვენს კანდიდატურას საკრებულოს თავმჯდომარის პოსტზე…
_ არ ვიცი, ან დავაყენებ, ან არა…
_ დაუჭერთ თუ არა მხარს გელა კობალაძეს, თუ მისი კანდიდატურა პოლიტსაბჭოზე გადაწყდება?
_ პოლიტსაბჭო არის "ქართული ოცნების", მე ვარ დამოუკიდებელი კანდიდატი. აქედან გამომდინარე, არავითარი ვალდებულება მათ მიმართ არ გამაჩნია. მე მივიღებ პიროვნულ გადაწყვეტილებას, რომელიც 2 აგვისტოს გაჟღერდება, _ გვითხრა ლევან მგელაძემ.
"გურია ნიუსის" წყაროს ინფორმაციით, შესაძლოა, ვიცე მერის პოსტი "ქართული ოცნების" სიის პირველმა ნომერმა, მედეა მახარობლიძემ დაიკავოს. თუმცა, აღნიშნულ ინფორმაციას არც ოზურგეთის ახალარჩეული მერი ბეგლარ სიორიძე და არც მედეა მახარობლიძე არ ადასტურებენ:
_ ჯერჯერობით, გადაწყვეტილი არ მაქვს, ვინ იქნება ჩემი მოადგილე. ქალბატონი მედეა მახარობლიძე ქალაქის საკრებულოში შესაბამისი სტატუსით დაინიშნება, _ გვითხრა სიორიძემ.
რაც შეეხება მუნიციპალიტეტის თემების საკრებულოს და გამგეობას, აქ მხოლოდ გამგებლის, მოადგილეების და საფინანსო-საბიუჯეტო სამსახურის უფროსის ვინაობაა ცნობილი.
ოზურგეთის მუნიციპალიტეტის გამგებლის მოადგილეები გუბერნიის თანამშრომელი არჩილ ყაზაიშვილი და ბიზნესმენი ალექსანდრე ყველაშვილი იქნებიან. საფინანსო-საბიუჯეტო სამსახურს, პოლიციის ყოფილი მაღალჩინოსანი, ამჟამად საქართველოს ფოსტის გურიის სამსახურის უფროსი, გია მამაკაიშვილი ჩაიბარებს.
აღნიშნული ინფორმაციები ჩვენთან საუბრისას გამგებელმა, მერაბ ჭანუყვაძემ დაადასტურა.
ოზურგეთის მუნიციპალიტეტის თემების საკრებულოს თავმჯდომარის პოსტისთვის "ქართული ოცნების" ოზურგეთის რაიონული ორგანიზაციის თავმჯდომარე დავით დარჩია და ნატანების მაჟორიტარი დეპუტატი დავით სიხარულიძე იბრძოლებენ.
დავით დარჩია ამბობს, რომ წინასწარ არაფერი არ იცის და ეს საკითხი 2 აგვისტოს გადაწყდება.
დავით სიხარულიძე ამ საკითხთან დაკავშირებით ამბობს: _ ჩემი სახელისა და გვარის გაჟღერება ამ პოსტზე, ალბათ, იმან განაპირობა, რომ გურიაში, ყველაზე დიდ სოფელში, ნატანებში ყველაზე მაღალი პროცენტი ავიღე. დეპუტატების გარკვეული ნაწილი თუ მიჭერს, მხარს, ამაშიც ცუდი, ალბათ, არაფერი არ არის. ვნახოთ, რა და როგორ გადაწყდება, _ გვითხრა დავით სიხარულიძე.
რაც შეეხება, ქალაქის მერიასა და მუნიციპალიტეტის გამგეობაში თანამშრომლების დასაქმების საკითხს, გამგეობის მიერ შედგენილი სტრუქტურა საკრებულოს სხდომაზე 2 აგვისტოს შევა დასამტკიცებლად _ "გურია ნიუსის" წყაროს ინფორმაციით", შესაძლოა, რამდენიმე სამსახური განყოფილებად გადაკეთდეს.
