"რამდენი ხანია, გარემოს დაცვის სფეროში ვარ და მე ასეთი გვარი, ხოკრიშვილი, ჯერ არ გამიგია. ეს არის ურთულესი დარგი, რომელიც პრინციპულობას და შემართებას მოითხოვს. მით უმეტეს, ისეთ მძიმე მდგომარეობაში მყოფი ქვეყნისთვის, ეკოლოგიური თვალსაზრისით, როგორიც საქართველოა. ელგუჯა ხოკრიშვილი პროფესიით არ არის გარემოს დამცველი და მე ვფიქრობ, ამ მიმართულებითაც ვერ გააკეთებს ვერაფერს. ვერ გავიგე, გარემოსდამცველი დაილია ამ ქვეყანაში?" _ ასე გამოეხმაურა "მწვანეთა პარტიის" თავმჯდომარე გია გაჩეჩილაძე გარემოს დაცვის მინისტრ ხათუნა გოგალაძის ინფრასტრუქტურის მინისტრ ელგუჯა ხოკრიშვილით, შეცვლის ფაქტს.
გია გაჩეჩილაძემ "გურია ნიუსთან" საუბარში გარემოს დაცვისა და ბუნებრივი რესურსების უკვე ყოფილი მინისტრის საქმიანობაც შეაფასა და მის მიერ გამოვლენილ სისუსტეებზეც გაამახვილა ყურადღება.
"რაც შეეხება ხათუნა გოგალაძეს, ის, ყოველშემთხვევაში, გარემოს დაცვის სექტორიდან იყო მოსული და ეს სფერო გაეგებოდა. მას კარგი მიღწევები ჰქონდა. მაგალითად, გარემოს დაცვის კანონმდებლობაში საკმაოდ მნიშვნელოვანი ცვლილებები განახორციელა.
ყოფილ გარემოს დაცვის მინისტრს ჰქონდა სისუსტეები, რაც დაკავშირებული იყო ზესტაფონთან, ბოლნისთან, ჭიათურასთან. მოგეხსენებათ, ამ ქალაქებში ძალიან რთული ეკოლოგიური ვითარებაა. მან ვერ შეძლო ამ პრობლემების მოგვარება. ზესტაფონში, ფეროშენადნობა წარმოება გარემოს დაცვის ნებართვის გარეშე ფუნქციონირებს, ანუ რეალურად, უკანონოდ მუშაობს და ეს გარემოს დაცვის სამინისტროს მინუსია. რაც შეეხება ბოლნისს, იქ მდინარე მაშავერა მძიმე ლითონებითაა დაბინძურებული, რაც მოსახლეობის ჯანმრთელობაზე უარყოფით ზეგავლენას ახდენს. ეს გარემოს დაცვის სამინისტრომ უნდა გადაწყვიტოს, მით უმეტეს, რომ ამის ბერკეტები აქვს", _ აღნიშნა გაჩეჩილაძემ.
"მწვანეთა პარტიის" თავმჯდომარეს და პარლამენტის წევრს, გია გაჩეჩილაძეს მიაჩნია, რომ ხათუნა გოგალაძის მოხსნა დიდ ჰესებს და კონკრეტულად, ხუდონჰესს უფრო უკავშირდება.
"ჩემი აზრით, მისი მოხსნა, გიგანტური ჰესების მშენებლობებთანაც კავშირშია. გარემოს დაცვის სამინისტრო წინააღმდეგობას უწევდა ჰესების მშენებლობას. იმიტომაც უფრო, რომ "ქართული ოცნების" პროგრამაში იდო დაპირება, რომ გიგანტური ჰესები არ უნდა აშენებულიყო საქართველოში და გარემოს დაცვის სამინისტრო იცავდა ამ დაპირებას".
გაჩეჩილაძე გამოთქვამს ვარაუდს, რომ გარემოს დაცვის მინისტრად ხოკრიშვილის დანიშვნით ამ სფეროში უარესობისკენ წავა საქმე და მის კანდიდატურას პარლამენტში მხარს არ დაუჭერს.
გარემოს დაცვის უკვე ყოფილმა მინისტრმა, ხათუნა გოგალაძემ კომენტარი გააკეთა პრემიერ-მინისტრის გადაწყვეტილებაზე:
"რა ხარვეზები იყო და არ მოსწონდა პრემიერს ჩემს საქმიანობაში, ალბათ, სჯობს, რადგან პრემიერმა მიიღო ეს გადაწყვეტილება, მისგან გავიგოთ პასუხი. მაგრამ კიდევ ვიმეორებ, ამ წელიწადისა და 9 თვის განმავლობაში ძალიან ბევრი გაკეთდა კარგი, საკმაოდ ბევრი ცვლილება დაიწყო და მინდა გამოვთქვა იმედი, რომ ეს სასიკეთო რეფორმები ასევე გაგრძელდება ბატონი გუჯას მინისტრობის პერიოდში და მჯერა, რომ ელგუჯა ხოკრიშვილს ისევე ეტკინება ეს სფერო, როგორც მე მტკიოდა", _ აღნიშნა გოგალაძემ.
შეგახსენებთ, რომ დღეს საქართველოს პრემიერ-მინისტრმა, ირაკლი ღარიბაშვილმა, გარემოს დაცვის მინისტრი ხათუნა გოგალაძე, კულტურისა და ძეგლთა დაცვის მინისტრი გურამ ოდიშარია, ლტოლვილთა და განსახლების მინისტრი დავით დარახველიძე, სოფლის მეურნეობის მინისტრი შალვა ფიფია, სასჯელაღსრულების მინისტრი სოზარ სუბარი, რეგიონალური განვითარებისა და ინფრასტრუქტურის მინისტრი ელგუჯა ხოკრიშვილი, დიასპორის საკითხებში საქართველოს სახელმწიფო მინისტრი კონსტანტინე სურგულაძე, დაკავებული თანამდებობიდან გაათავისუფლა.
