ამის შესახებ "გურია ნიუსს" "მწვანეთა პარტიის" თავმჯდომარე გია გაჩეჩილაძემ განუცხადა.
გაჩეჩილაძის თქმით, მასთან ოფისში მივიდნენ თურქული ფერმერული ორგანიზაციის წარმომადგენლები და დეტალური ინფორმაცია მიაწოდეს, რა იგეგმება მდინარე მტკვარზე, საქართველო-თურქეთის საზღვარზე.
"ფერმერებმა გვითხრეს, რომ არდაგანში მდ. მტკვარზე, "ბეშიკ ჰაიას" წყალსაცავზე შეიძლება დაიწყოს ჰიდროელექტროსადგურის მშენებლობა, რომელიც მტკვარს გადაკეტავს. ჭოროხის აუზის ზედა ნაწილში წყალსაცავებს "კილიჩისა" და "ისპირს" წყალი არ ჰყოფნის და მაგისთვის დააგუბებენ მტკვარს და გადაგდებენ. რაც იმას ნიშნავს, რომ, ფაქტობრივად, საქართველოს საზღვარზე მტკვარი აღარ შემოვა საერთოდ. შენაკადები კი შეუერთდება საქართველოში და შეავსებს, მაგრამ იმხელა დანაკლისი იქნება, რომ, მაგალითად, ბორჯომთან წყლის რაოდენობა შემცირდება 40-ჯერ. ახალციხის რაიონის ბოლოში 60%-თ, და თბილისში 16-დან 20 % იქნება წყალი მტკვარში. ფაქტობრივად, ეს მტკვრის წყალი აღარ იქნება".
"მწვანეთა პარტიის" თავმჯდომარის თქმით, მტკვარში წყლის რაოდენობის დაკლებით დაზარალდება, როგორც ქართული და თურქული, ასევე აზერბაიჯანული მხარეც.
"მტკვრის სანაპიროზე რომ ჩახვალთ, მოგეხსენებათ, ახლაც რა სუნია, რადგან მთელი კანალიზაცია იქ ჩაედინება. ზაფხულის პერიოდში მტკვარი გადაიქცევა კანალიზაციის კოლექტორად და აქ ცხოვრება გახდება შეუძლებელი. 2012 წელს ჩვენ ამაზე გვქონდა კონფერენცია. იმიტომ მოვიდნენ ახლა თურქი ფერმერები ჩვენთან. მაშინ მოვაგვარეთ ეს პრობლემა. თვითონ თურქეთის პარლამენტში ატყდა ამბავი. ძალიან იმარჯვა არდაგანის დეპუტატმა. მაშინ შეჩერდა მშენებლობები, ახლა ისევ თავიდან დაიწყო.
კიდევ ერთი პრობლემაა. მტკვარზე დაგეგმილია ჰესების მშენებლობა და რომელი წყლით აპირებენ "მტკვარიჰესის" აშენებას, წყალი რომ არ იქნება, არ ვიცი. ჰესის მშენებლობები დაწყებულია და რის გაკეთებას აპირებს წყლის გარეშე ინვესტორი, საკითხავია.
მტკვარში წყლის რაოდენობის დაკლებით, თავად თურქი ფერმერებიც ზარალდებიან. მეცხოველეობას, ფერმერულ მეურნეობას მისდევენ და წყალი სჭირდებათ. ფერმერების ასოციაციის წერილში მხოლოდ ის კი არაა ნათქვამი, რომ მარტო თავად ზარალდებიან. ამბობენ, რომ ეს ორ ქვეყანას შორის ურთიერთობებს გააფუჭებს. ეს მარტო ჩვენ არ გვეხება. აზერბაიჯანიც ჩართულია ამ პროცესში. აზერბაიჯანში მიწების დიდი ნაწილი მტკვარით ირწყვება. აქ დატრიალდება ტრაგედია და მივმართავ გარემოს დაცვისა და საგარეო საქმეთა მინისტრებს, მოაგვარონ ეს პრობლემა" _ აღნიშნა გია გაჩეჩილაძემ.
